2~Crónicas 33 - CHUYA QELLQA La Biblia en Quechua de Ayacucho 2012

Rey Manasespa munaychakusqanmanta

¹ Manasesqa chunka iskayniyuq watanpim munaychakuyta qallaykurqa. Jerusalén llaqtapim pichqa chunka pichqayuq wata munaychakurqa.

² Payqa Tayta Diospa qayllanpim mana allinkunata ruwarqa. Israelpa mirayninkunapa qayllanmanta Tayta Diospa qarqosqan runakunapa millakuypaq ruwasqankunatam ruwarqa.

³ Taytan Ezequiaspa tuñichisqan capillakunatapas kaqllamanta hatarichispanmi Baal idolopaqña altarkunata ruwarqa, ruwarqataqmi Asera idolokunatapas. Cielokunapi tukuy ima kaqkunatapas yupaycharqam.

⁴ “Ñoqam sutiyta Jerusalén llaqtapi churasa” nispa Tayta Dios nichkaptinpas Manasesqa Tayta Diospa templonpim altarkunata ruwachirqa.

⁵ Tayta Diospa templonpa iskaynin pationkunapipas cielokunapi tukuy imakunapaqmi altarkunata ruwachirqa.

⁶ Churinkunatapas Ben-hinom way-qopim sacrificarqa, layqa kayman qokuruspanmi alma qayaqkunatawan qatipaqkunatapas kikinpuni hatarichirqa. Chay millakuypaq mana allin kaqkunata ruwaspanmi tayta Diosta piñachirqa.

⁷ Tayta Diospa templonpipas kikinpa ruwasqan idolotam churarurqa. Chay templomantam Davidmanwan churin Salomonman Tayta Dios kaynata nirqa: Israelpi llapallan ayllukunamanta akllasqay Jerusalén llaqtapi kaq temploypim sutiyta wiñaypaq churasaq,

⁸ ñawpaq taytankuman qosqay allpamantaqa manam qarqosaqchu, ichaqa paykunam kawsananku serviqniy Moiseswan willachisqay kamachikuykunaman chaynataq yachachikuykunaman hina, nispa.

⁹ Manasesmi Judá nacionpi kaqkunatawan Jerusalenpi yachaqkunata pantayman aparurqa, chaynapi Israelpa mirayninkunapa qayllanmanta Tayta Diospa chinkachisqan runakunamantapas astawanraq millakuypaq kaqkunata ruwanankupaq.

¹⁰ Tayta Diosmi profetankunatakama Manasestawan llaqtanta rimapayarqa, paykunam ichaqa mana uyarirqakuchu.

¹¹ Chayraykum paykunapa contranpi, Asiria reypa tropankunapa kamachiqninkunata Tayta Dios pusaramurqa. Paykunam rey Manasesta hapiruspanku cadenawan wataruspa Babilonia llaqtaman pusarqaku.

¹² Chayna ñakariypi kaspanmi Mana-sesqa yupaychasqan Tayta Diosta mañakurqa, ñawpaq taytankunapa yupaychasqan Tayta Diospa qayllanpim uchuychakurqa.

¹³ Chaynapim mañakusqanta Dios uyariykuspan, Jerusalén llaqtapi munaychakunanpaq kutichirqa. Chayraqmi Manasesqa Tayta Diosqa cheqap Dios kasqanta reqsikuykurqa.

¹⁴ Chaykunapa qepantam rey Manasés ruwachirqa “Davidpa Llaqtanwan” sutichasqanku llaqtapa hawa lawninpi murallanta, chay murallam Gihón pukyupa intipa seqaykunan lawninpi qallaykuspa wayqonta chutarikuspan Challwawan sutichasqa punkukama chayarqa, hinaspam Ofel lawninta muyumurqa. Chay murallataqa alto-altotam hoqarirachirqa. Judá nacionpi kaq murallasqa llaqtakunapipas tropakunapa kamachiqninkunatam churarqa.

¹⁵ Tayta Diospa templonmantapas huklaw llaqtayuq runakunapa idolonkunatawan kikinpa churasqan idolotam hurqorqa. Hurqorqataqmi Tayta Diospa templonpa kasqan moqopi chaynataq Jerusalenpi ruwachisqan altarkunatapas, hinaspam llaqtapa hawa lawninman wikaparachirqa.

¹⁶ Chaymantam Tayta Diospa altarninta allichachispan Dioswan allinlla kasqanmanta ofrendatawan Diosman gracias qonan ofrendata ofrecerqa, hinaspanmi Judá nacionpi runakunata kamachirqa Israelpa yupaychasqan Tayta Diosta servinankupaq.

¹⁷ Chaywanpas runakunaqa hinallam moqokunapi kaq capillakunapi sacrificiokunata kañarqaku, paykunamantaqa Tayta Diospaqmi chayta ruwarqaku.

¹⁸ Rey Manasespa imakunam ruwasqanwan yupaychasqan Tayta Diosta mañakusqan hinaspa Tayta Diospa sutinpi profetakunapa rimapayasqanpas, Israelpi reykunamanta willakuq libropim qellqasqa kachkan.

¹⁹ Mañakuyninpas, chay mañakuyninpa contestasqa kasqanpas, imakunawanmi huchallikusqanpas, Tayta Diosta qepanchasqanpas, maykunapim capillakuna ruwachisqanpas, manaraq Tayta Diospa qayllanpi uchuychakuchkaspa Asera idolokunatawan rikchaqmana idolokunata ruwachispan maykunapim churasqanpas, profetakunapa qellqasqan libropim qellqasqa kachkan.

²⁰ Manasés wañukuptinmi palacionpa huertanpi pamparurqaku. Paypa rantinpim churin Amonña munaychakurqa.

Judá nacionpi Amonpa munaychakusqanmanta

²¹ Amonqa iskay chunka iskayniyuq watanpim munaychakuyta qallaykurqa, iskay watam Jerusalenpi munaychakurqa.

²² Taytan Manasés hinam rey Amonpas Tayta Diospa qayllanpi mana allinkunata ruwarqa, hinaspanmi taytanpa ruwasqan idolokunata servispan sacrificiokunata ofrecerqa.

²³ Manam taytan Manasés hinaqa uchuychakurqachu, aswanraqmi payqa huchaman qokururqa.

²⁴ Rey Amonpa serviqninkunam paypa contranpi hoqarikuruspanku hina palaciollanpi wañurachirqaku.

²⁵ Ichaqa llaqta runakunam rey Amonpa contran-pi hatariq runakunata wañurachirqaku, hinaspam paypa rantinpi churin Josiastaña rey kananpaq churarqaku.