2~Crónicas 32 - CHUYA QELLQA La Biblia en Quechua de Ayacucho 2012

Judá nacionpa contranpi rey Senaquerib hamusqanmanta

¹ Diospa munasqanman hina kasukuspa rey Ezequiaspa rurasqankunapa qepantam, Asiria nacionpa reynin Senaquerib hamururqa, hinaspam Judá nacionman yaykuruspan murallasqa llaqtakunata atacananpaq muyurirurqa.

² Rey Ezequiasñataqmi, Jerusalén llaqtata atacananpaq rey Senaqueribpa hamurusqanta qawaykuspan,

³ llapa kamachikuqkunawan hinaspa allinnin qari-qari runankunawan tanteanakurqa, chaynapi llaqtapa hawa lawninpi kaq pukyukunata taparunankupaq, chaymi llapallanku “allinmi” nirqaku.

⁴ Hinaptinmi achkallaña runakuna huñunakuruspanku llapallan pukyukunatawan yarqakunatapas taparurqaku, chaynapi Siria nacionpa reyninkuna hamuspanku achka yakukunata mana tarinankupaq.

⁵ Rey Ezequiasqa kallpanchakuspanmi llapa tuñisqa perqakunatapas allichachirqa, chaypa hawanpipas torrekunatam ruwachirqa. Ñawpaq perqapa hawa lawninpipas huk perqatam ruwachirqa. Murallachirqataqmi “Davidpa Llaqtanwan” sutichasqanku llaqtatapas. Lanzakunatawan escudokunatapas achkallatañam ruwachirqa.

⁶ Guerrapi peleanankupaqmi tropakunapa kamachiqninkunata churarqa; paykunatam llaqtapa punkunpi huñuruspan kaynata nispan kallpancharqa:

⁷ Kallpanchakuspa qarinchakuychik, ama manchakuychikchu Asiria nacionpa reynintaqa nitaq paywan hamuq tropakunatapas; paywan kaqkunamantapas ñoqanchikwan kaqmi aswan atiyniyuqqa kachkan.

⁸ Payqa runakunapa kallpallanwanmi kachkan, ñoqanchikwanmi ichaqa Tukuy Atiyniyuq Diosninchik kachkan, peleaptinchikqa paymi yanapawasun, nispa. Hinaptinmi Judá nacionpa reynin Ezequiaspa nisqanwan llapa runakuna kallpanchakururqaku.

⁹ Asiria nacionpa reynin Senaqueribmi llapallan tropankunawan Laquis llaqtata atacachkarqa, hinaspanmi serviqninkunata Jerusalén llaqtaman kacharqa, Judá nacionpa reynin Ezequiasman hinaspa Jerusalén llaqtapi yachaq Judá casta runakunaman kaynata nimunankupaq:

¹⁰ Asiria nacionpa reynin Senaqueribmi kaynata nin: “Muyurirusqaña Jerusalén llaqta kachkaptinqa ¿pimantaq hapipakuchkankichik?

¹¹ Rey Ezequiasmi kaynata nisuchkankichik: Asiriapa reyninmantaqa Diosninchikmi librawasunchik, nispa. ¿Manachu Ezequiasqa engañasuchkankichik yarqaymanta yakumanta wañuchisunaykichikpaq?

¹² ¿Manachum Ezequiasqa chay Diospa moqokunapi capillankunatawan altarninkunatapas lliwta chinkarachirqa? Payqa Judá nacionpi kaqkunatawan Jerusalenpi kaqkunatam nichkan: Kay altarpa ñawpaqllanpim yupaychankichikqa, kay altarllapitaqmi inciensotapas kañankichik, nispa.

¹³ ¿Manachu yachankichik ñopas ñawpaq taytakunapas kay pachapi llaqtakunata imam ruwasqaykuta? Chay nacionkunapa diosninkunaqa manam mayqanpas ñoqamantaqa librayta atirqakuchu.

¹⁴ ¿Ñawpaq taytaykunapa purmachisqan nacionkunapa mayqan diosnintaq llaqtanta makiymanta librarqa? ¿Imanasqataq Diosnikichik ñoqamanta librasunaykichikta tanteankichik?

¹⁵ Amañayá Ezequiaswanqa engañachikuychikchu nitaq pantaymanqa pusachikuychikchu, ama paytaqa creeychikchu. Sichum chay nacionkunapa diosninkuna llaqtanta ñoqamanta nitaq ñawpaq taytaykunamantapas mana librayta atichkaptinqa ¿imaynataq ñoqamanta Diosnikichik librasunkichikman?” nispa.

¹⁶ Rey Senaqueribpa serviqninkunaqa astawanraqmi Tayta Diospa hinaspa serviqnin Ezequiaspa contranpi rimarqaku.

¹⁷ Chaywanpas rey Senaqueribqa Israelpa yupaychasqan Tayta Diosmanta burlakuspanmi cartakunata kayna niqta qellqarqa: “Wakin nacionkunapa diosninkupas manam llaqtanta ñoqamanta librayta atirqachu, Ezequiaspa Diosninpas manam ñoqamanta llaqtan libraytaqa atinqachu”, nispa.

¹⁸ Chaymi rey Senaqueribpa serviqninkuna judiokunapa rimayninpi hatun qapariywan qayakurqaku, Jerusalenpa murallanpa hawanpi kaq runakunata mancharichinanpaq hinaspa hukmanyasqa kachkaptinku chay llaqtata vencerunankupaq.

¹⁹ Jerusalén llaqtapa Diosninpa contranpim rimarqaku, imaynam wakin nacionkunapa diosninmanta hina, chay dioskunaqa runakunapa ruwasqallanmi karqa.

²⁰ Chayraykum rey Ezequiaswan Amoz-pa churin profeta Isaías, Tayta Diosta mañakurqaku.

²¹ Hinaptinmi huk angelta Tayta Dios kachaykamurqa, chaymi llapallan allinnin qari-qari soldadonkunatawan kamachikuqkunata hinaspa capitankunatapas Asiria reypa campamentonpi wañurachirqa. Chaynapim rey Senaqueribqa penqakuymanta nacionninman kutikurqa, hinaspam diosninpa templonman yaykuruptin churinkunalla espadawan wañurachirqaku.

²² Chaynatam Ezequiastawan Jeru-salenpi yachaqkunata, Asiria nacionpa reynin Senaqueribmanta chaynataq llapa enemigonkunamantapas Tayta Dios libraykurqa, hinaspam muyuriqninpi kaqkunawanpas hawkallata kawsachirqa.

²³ Chaymi achkallaña runakuna Tayta Diospaq ofrendakunata Jerusalén llaqtaman apamurqaku, Judá nacionpa reynin Ezequiasmanpas sumaq regalokunatam apamurqaku; chaymantapacham Ezequiasqa nacionkunapipas ancha reqsisqa karqa.

Rey Ezequiaspa onqosqanmanta

²⁴ Chay punchawkunapim wañuy patanpi kanankama rey Ezequías onqorurqa, chaymi Tayta Diosta mañakuptin huk señalta qorqa.

²⁵ Rey Ezequiasmi ichaqa allinkunata chaskichkaspanpas mana reqsikurqachu, aswanmi hatun tukuqllaña rikurirurqa, chayraykum paypa contranpi, Judá nacionpa contranpi hinaspa Jerusalenpa contranpi Tayta Dios piñakururqa.

²⁶ Ichaqa hatun tukuq kachkaspanpas rey Ezequiasqa Tayta Diospa qayllanpim uchuychakurqa, Jerusalenpi yachaq-kunapas chaynallatam ruwarqaku, chaymi Ezequías kawsanankamaqa Diospa piñakuyninpas mana paykunaman hamurqachu.

Rey Ezequiaspa apuyasqanmanta

²⁷ Rey Ezequiasqa apullaña hinaspa ancha reqsisqam karqa; payqa qori-qollqetawan alhaja rumikunata, perfumekunata, escudokunata hinaspa tukuy rikchaq kuyayllapaq kaqkunatapas achkallatañam huñukururqa.

²⁸ Chaynallataqmi ruwachirqa Trigota, vinota hinaspa aceiteta waqaychananpaq almacenkunatapas. Tukuy rikchaq hatun animalkunapaqwan taksa animalkunapaqpas kanchakunatam ruwachirqa.

²⁹ Paytaqa Diosmi apuyachirqa, chayraykum animalninkunapas taksa hatun achkallaña kapurqa, llaqtakunatapas ruwachirqam.

³⁰ Tapachirqataqmi Gihón pukyupa punkuntapas hinaspam chay yakuta “Davidpa Llaqtanwan” sutichasqa llaq-takama pusachirqa. Chaynapim rey Ezequiasqa tukuy ima ruwasqanpipas bendecisqa karqa.

Babiloniamanta hamuqkunata rey Ezequías chaskisqanmanta

³¹ Babilonia lawpi kamachikuqkunam runankunata kachamurqaku Judá nacionpi milagro apakusqanmanta yachanankupaq. Ezequiaspa sonqonpi tukuy ima kaqkunata pruebananpaqmi paymanta Tayta Dios karunchakururqa.

Rey Ezequiaspa wañukusqanmanta

³² Rey Ezequiaspa imakunam ruwasqanwan chaynataq allinkuna ruwasqanpas, Amospa churin profeta Isaiaspa qellqasqan libropiwan Israelpi reykunamanta chaynataq Judapi reykunamanta willakuq libropim qellqasqa kachkan.

³³ Ezequías wañukuptinmi, reykunapa pampakunanpa allinnin lawninpi pamparurqaku. Judá nacionpi kaqkunawan Jerusalenpi kaqkunam hatunchaspanku Ezequiasta pamparurqaku. Paypa rantinpim churin Manasesña munaychakurqa.