2~Crónicas 31 - CHUYA QELLQA La Biblia en Quechua de Ayacucho 2012

¹ Tukuy chaykuna tukuruptinmi, chaypi kaq Israel runakuna Judá nacionpi llaqtakunaman lloqsispanku rumimanta idolokunatawan Asera idolokunata ñutuparurqaku; Judá, Benjamín, Efraín hinaspa Manasés lawkunapi kaq altarkunatapas lliwtam tuñirachirqaku. Chaymantam Israelpa mirayninkunaqa maymi kasqankuman sapakama kutikurqaku.

² Chaykunapa qepantam rey Ezequiasqa, levitakunatawan sacerdotekunata churarqa, muyuyninpi sapakama imam ruwayninkupi servikunankupaq, lliw kañana sacrificiota, Dioswan allinlla kasqankumanta ofrendakunata ofrecespanku graciasta qospanku Tayta Diosta templopa pationpi yupaychanankupaq.

³ Rey Ezequiasmi animalninkunamanta qorqa, sapa achikyayta sapa tardeykuyta, samana punchawpi, musoq killakunapi hinaspa hatun fiestakunapi lliw kañana sacrificiota ofrecenankupaq; chaynataqa ruwarqa Tayta Diospa kamachikuyninpa nisqaman hinam.

⁴ Jerusalén llaqtapi yachaqkunatapas kamachirqam sacerdotekunaman hinaspa levitakunaman tupaqninta qonankupaq, chaynapi paykuna Tayta Diospa kamachikuyninman hina imam ruwanankuta ruwanankupaq.

⁵ Chay kamachikuy lloqsiramuptinmi Israelpa mirayninkuna achkanpi qorqaku trigomanta, vinomanta, aceitemanta, mielmanta hinaspa chakrankupi tukuy ima qespiqkunamanta primiciankuta. Achkanpim tukuy imamanta hurqosqanku diezmokunatapas apamurqaku.

⁶ Israel nacionpiwan Judá nacionpi yachaq runakunapas, vacakunamantawan ovejakunamanta diezmonkutam apamurqaku. Apamurqakutaqmi Tayta Diospaq sapaqchasqanku kaqkunapa diezmonkunatapas. Tukuy chaykunatam montonninpi churarqaku.

⁷ Kimsa kaq killapim diezmonku apamuyta qallaykurqaku, hinaspam qanchis kaq killapi tukurqaku.

⁸ Rey Ezequiaswan kamachikuqkunam hamuruspanku chay montonasqa ofrendakunata qawaykuspanku Tayta Diosta chaynataq Israel runakunatapas bendecirqaku.

⁹ Chaymantam rey Ezequías tapurqa sacerdotekunatawan levitakunata chay montonninpi apamusqanku ofrendakunamanta.

¹⁰ Hinaptinmi Sadocpa ayllunmanta kaq sumo sacerdote Azarías nirqa: Tayta Diospa templonman ofrendakuna apamusqanku punchawmantam achkanpi mikuniku, chaywanpas achkaraqmi puchurun. Llaqtanta Tayta Dios bendeciykuptinmi ofrenda apamusqankumanta achkallaña puchurun, nispa.

¹¹ Chayraykum rey Ezequías kamachirqa Tayta Diospa templonpi cuartokunata allichanankupaq, chaynapi puchusqanku ofrendakunata waqaychanankupaq.

¹² Chaymanmi apaykurqaku apamusqanku ofrendakunatawan diezmokunata chaynataq Tayta Diospaq sapaqchasqanku kaqkunapa diezmonkunatapas. Chaykunata nanachikunanpaqmi churarqaku Leví ayllumanta kaq Conaniasta, yanapananpaqñataqmi wawqen Simeita.

¹³ Rey Ezequiaswan sacerdote Azariasqa churarqakutaqmi: Jehielta, Azazíasta, Nahatta, Asaelta, Jerimotta, Jozabadta, Elielta, Ismaquiasta, Mahatta hinaspa Benaiata. Conaniastawan Semeita Tayta Diospa templonpi kasukunankupaq.

¹⁴ Leví ayllumanta kaq Imnapa churin Coreyñataqmi intipa qespimunan lawpi kaq punku waqaychaq karqa, paymi nanachikurqa Diospaq kikinkumanta apamusqanku ofrendakunata, hina paytaqmi rakinarqa Tayta Diospaq apamusqanku ofrendakunatawan Diosllapaqña sapaqchasqa kaqkunatapas.

¹⁵ Sacerdotekunapa yachasqan llaqtakunapim Coreypa yanapaqninkuna karqaku: Edén, Miniamín, Jesúa, Semaías, Amarías hinaspa Secanías; paykunam muyuyninpi mana tipiyta castamasinkunaman machumanpas jovenmanpas tupaqninkuta aypuqku.

¹⁶ Aypurqakutaqmi kimsa watayuq-manta hanayman listasqa qariku-namanpas chaynataq ruwanankuman hina Tayta Diospa templonpi sapa punchaw muyuyninpi llamkaqkunamanpas.

¹⁷ Qorqakutaqmi ayllunkuman hina listasqa sacerdotekunamanpas chaynataq muyuyninpi ruwayninkuman hina iskay chunka watayuqmanta hanayman listasqa levitakunamanpas.

¹⁸ Paykunaqa warmintin hinaspa churi-wawantinmi listasqa karqaku, Tayta Diospa kaqkunata ruwanankupaq tukuy sonqonkuwan sapaqchakusqankurayku.

¹⁹ Sapa llaqtapim churasqa karqa akllasqa runakuna, paykunam tupaqninkuta qoq Aaronpa mirayninmanta kaq sacerdotekunaman chaynataq listasqa levitakunamanpas, paykunam yacharqaku sacerdotekunapa yachanan llaqtakunapa echaderonkunapi.

²⁰ Chaynatam rey Ezequías ruwarqa lliw Judá nacionpi. Payqa yupaychasqan Tayta Diospa qayllanpim alli kaqkunata hinaspa cheqap kaqkunata ruwarqa.

²¹ Tukuy imatam Diospa templonpi serviciopaq ruwarqa, chaykunataqa ruwarqa tukuy sonqomanta hinaspa Tayta Diospa kamachikuyninman chaynataq yachachikuyninman hinam, chayraykum tukuy ima ruwasqanpipas allin lloqsirqa.