2~Crónicas 30 - CHUYA QELLQA La Biblia en Quechua de Ayacucho 2012

Pascua fiestata rey Ezequías ruwasqanmanta

¹ Rey Ezequiasmi Israel nacionpi chaynataq Judá nacionpi llapallan runakunaman willakuqkunata kacharqa, Efraín ayllumanwan Manasés ayllumanpas cartakunatam apachirqa, Jerusalén llaqtapi Tayta Diospa templonman hamuspanku Israelpa yupaychasqan Tayta Diospaq Pascua fiestata ruwanankupaq.

² Reymi kamachikuqkunawan hinaspa Jerusalenpi yachaq runakunawan tanteanakururqaku iskay kaq killapi Pascua fiestata ruwanankupaq.

³ Achka sacerdotekuna mana chuyanchasqa kasqankuraykum hinaspa runakunapas Jerusalén llaqtapi mana huñunakusqanraykum Pascua fiesta tiempollanpi ruwayta mana atirqakuchu.

⁴ Chay tanteanakusqankum reypaq chaynataq runakunapaqpas allinpaq rikchakapurqa.

⁵ Chaymi Beerseba llaqtamanta qallarispa Dan llaqtakama Israelpi llapallan runakunaman willachirqaku, Israelpa yupaychasqan Tayta Diospaq Pascua fiestata ruwaq Jerusalén llaqtaman hamunankupaq. Unay watañam Pascua fiestataqa mana ruwarqakuchu, chay ruwananpaq kamachikuy kachkaptinpas.

⁶ Willakuqkunam reypa hinaspa kamachikuqkunapa cartan aparisqa Israel nacionmanwan Judá nacionman lloqsirqaku, reypa kamachisqanman hina kaynata nimunankupaq: Israelpa mirayninkuna, Abrahampa, Isaacpa hinaspa Israelpa yupaychasqan Tayta Diosman kutirikuychik, hinaptinqa Asiria nacionpa reyninmanta puchuqkunamanmi paypas kutirimusunkichik.

⁷ Qamkunaqa amayá ñawpaq taytaykichik nitaq aylluykichikkuna hinachu kaychik. Paykunam ñawpaq taytankupa yupaychasqan Tayta Diosta qepancharurqaku, chaymi qawasqaykichikpi hinapas purmachisqa kanankupaq kachaykurqa.

⁸ Chaynaqa, amayá ñawpaq taytay-kichikkuna hina rumi sonqoqa kaychikchu. Tayta Diosman kutirikuspayá chuyanchasqan santuarionman hamuspa yupaychasqanchik Tayta Diosta serviychik, hinaptinqa piñakuyninmi qamkunamanta asurinqa.

⁹ Sichum Tayta Diosman kutirikuptikichikqa aylluykichikkunata hinaspa churikichikkunata preso apaq enemigokunam llakipayarispan kay allpaman kutichimunqaku. Yupaychasqanchik Tayta Diosqa llakipayakuq hinaspa kuyapayakuqmi, payman kutirikuptikichikqa manam saqesunkichikchu, nispa.

¹⁰ Carta apaqkunam llaqtan-llaqtan rispanku Efraín, Manasés hinaspa Zabulón lawkunakama chayarurqaku; runakunam ichaqa asikuspanku paykunamanta burlakurqaku.

¹¹ Chaywanpas Aser ayllumanta, Manasés ayllumanta hinaspa Zabulón ayllumantam wakin runakuna uchuychakuykuspanku Jerusalén llaqtaman hamurqaku.

¹² Judá nacionpi runakunapas Tayta Diospa kallpanchasqanmi, tukuy sonqonkuwan reypa chaynataq kamachikuqkunapa kamachisqanta kasukurqaku. Chaynataqa ruwarqaku Tayta Diospa nisqanman hinam.

¹³ Jerusalén llaqtapim achkallaña runakuna huñunakururqaku, mana leva-durayuq tanta fiestata ruwananku-paq; chay fiestataqa iskay kaq killapim ruwarqaku.

¹⁴ Chay fiestata ruwa-nankupaqmi, Jerusalén llaqtapi altar-kunatawan incienso kañananku altarkunatapas tuñichispanku Cedrón wayqoman wischumurqaku.

¹⁵ Hinaspankum Iskay kaq killapa chunka tawayuq punchawpi Pascua carnerota wañuchirqaku. Llapa sacerdotekunawan levitakunapas penqakuymanta chuyanchakuspankum Tayta Diospa templonman animalkunata apamurqaku lliw kañana ofrendapaq.

¹⁶ Hinaspankum costumbrenkuman hina sapakama imam ruwanankuta ruwarqaku, Diospa serviqnin Moisespa kamachisqanman hina. Llapa sacerdotekunam levitakunapa haywasqan yawarwan altarman challarqaku.

¹⁷ Chay huñunakuypiqa mana chuyanchasqa runakunapas achkallañam karqaku, chayraykum paykunapa rantinpi llapa levitakunaña Pascua animalkunata wañuchirqaku, chaynapim Tayta Diospaq sapaqcharqaku.

¹⁸ Achka runakunam Efraín, Manasés, Isacar hinaspa Zabulón ayllukunamanta mana chuyanchasqachu karqaku, chayna kachkaspankupas Pascua animalpa aychantam mikurqaku, chaynataqa manam qellqaman hinachu ruwarqaku. Aswanqa rey Ezequiasmi paykunapaq mañakurqa kaynata: Dios Taytalláy, qamqa kuyapayakuqmi kanki, tukuy sonqonwan maskasuqnikikunatayá pampachaykuy.

¹⁹ Dios Taytalláy, ñawpaq taytankupa Diosnin, temploman yaykunankupaq mana chuyanchasqa kachkaptinkupas paykunatayá pampachaykuy, nispa.

²⁰ Chaymi Ezequiaspa mañakusqanta Tayta Dios uyariykuspan llaqtanta pampachaykurqa.

²¹ Chaynatam Jerusalén llaqtapi kaq Israelpa mirayninkuna, qanchis punchaw llumpay kusikuywan mana levadurayuq tanta fiestata ruwarqaku. Levitakunawan sacerdotekunapas sapa punchawmi Tayta Diosta yupaycharqaku tocanakunata tocaspanku.

²² Chaymi tukuy sonqowan Tayta Diosta serviq levitakunata sumaq rimaykunawan rey Ezequías kallpancharqa. Qanchis punchawmi fiestapi wañu-chisqanku animalkunata mikurqaku, Dioswan allinlla kasqankumanta ofrendatapas ofrecespankum ñawpaq taytankupa yupaychasqan Tayta Diosman graciasta qorqaku.

²³ Llapallan runakunam tantearurqaku qanchis punchawtawanraq fiestata ruwanankupaq, chaynatam kusikuyllawanña ruwarqaku.

²⁴ Judá nacionpa reynin Ezequiasmi llapa runakunaman qoykurqa waranqa torokunatawan qanchis waranqa ovejakunata. Kamachikuqkunapas waranqa torokunatawan chunka waranqa ovejakunatam qorqaku. Sacerdotekunapas achkallañam chuyanchakurqaku.

²⁵ Judá runakunawan, sacerdotekuna, levitakuna hinaspa Israelmanta hamuqkunapas anchallatañam kusikurqaku; kusikurqakutaqmi Israelmanta hamuq huklaw llaqtayuqkunawan Judá nacionpi yachaq huklaw llaqtayuqkunapas.

²⁶ Jerusalén llaqtapiqa hatu-hatun kusikuymi karqa, chay llaqtapiqa Israel nacionpa reynin Davidpa churin Salomonpa tiemponkunamantaraqmi chayna kusikuyqa mana karqañachu.

²⁷ Chaymantam levitakunawan sacerdotekuna sayarispanku llapa runakunata bendecirqaku, hinaptinmi Tayta Diospas hanaq pachamanta uyariykamurqa.