2~Crónicas 3 - CHUYA QELLQA La Biblia en Quechua de Ayacucho 2012

Templota Salomón ruwachisqanmanta

¹ Salomonmi Tayta Diospa templon ruwayta qallaykurqa Jerusalén llaqtapi, taytan Davidman Diospa rikuriykusqan Moriah moqopi; chaytam David rantirqa Tayta Diospa templonta ruwachinanpaq. Chay sitioqa karqa Jebús llaqtayuq Ornanpa eranmi.

² Rey Salomonmi, tawa wataña munaychakuchkaspan, chay watapa iskay kaq killanpa iskay kaq punchawninpi templo ruwayta qallarirqa.

³ Kay medidakunawanmi Tayta Diospa templonta rey Salomón cimientachirqa: Largonmi karqa iskay chunka qanchisniyuq metro, anchonñataqmi isqon metro.

⁴ Corredorninpa largonwan anchonmi isqon metrokama karqa, altonpas karqa isqon metrotaqmi, chay corredorpa ukuntam suma-sumaq qoriwan llusichirqa.

⁵ Hatunnin cuartopa perqantam ciprés tablakunawan tableachispan suma-sumaq qoriwan llusichirqa, chaypa hawanpim palmerakunatawan cadenakunata tallachirqa.

⁶ Templotam adornachirqa alhaja rumikunawan hinaspa Parvaim lawmanta kaq qoriwan.

⁷ Ukuntawan, vigankunata, marconkunata, perqankunata hinaspa punkunkunatapas qoriwanmi llusichirqa. Perqankunapipas querubinkunatam tallachirqa.

⁸ Templopa “Chuyay-chuyay” sutiyuq cuartontam ruwachirqa isqon metro largoyuqta hinaspa isqon metro ancho-yuqta, hinaspam iskay chunka wa-ranqa kilo suma-sumaq qoriwan llusi-chirqa.

⁹ Qorimanta clavokunam sapakama llasarqa medio kilo masnintakama. Altosninpi cuartokunatapas qoriwanmi llusichirqa.

¹⁰ Chuyay-chuyay sutiyuq cuartopim iskay querubinkunata kullumanta tallachirqa, hinaspam qoriwan llusichirqa.

¹¹ Chay iskaynin querubinkunapa raprankunam karqa isqon metro largoyuq. Huknin rapranpa largonmi karqa iskay metro cuarton, chaymi templopa perqankama hayparqa, huknin rapranpa largonpas iskay metro cuartonmi karqa, chaymi huknin querubinpa rapranwan tupanakurqa.

¹² Huknin querubinpa huknin rapranpas iskay metro cuartonmi karqa chaymi templopa perqankama chayarqa, huknin rapranpas iskay metro cuartontaqmi karqa chaymi huknin querubinpa rapranwan tupanakurqa.

¹³ Chay querubinkunapa kicharayaq raprankum karqa isqon metro, chay querubinkunam sayaspa hatun cuarto lawman qawarqaku.

¹⁴ Velotapas morado qaytumanta, grosella qaytumanta, guindo qaytumanta hinaspa fino linomantam ruwachirqa, chay velopa hawanpim querubinkunata bordachirqa.

Iskay pilarkunata ruwachisqanmanta

¹⁵ Templopa ñawpaqninpim Salomón ruwachirqa iskay pilarkunata chunka soqtayuq metro altoyuqtakama, chaykunapa puntanpim karqa iskay metro cuarton sayayniyuq adornokuna.

¹⁶ “Chuyay-chuyay” sutiyuq cuartopipas cadenakunatam ruwachirqa, chaykunatam pilarpa adornonkunapa hawanman churarqa. Ruwachirqataqmi pachak granadakunatapas hinaspam cadenakunapa hawanman churarqa.

¹⁷ Chay pilarkunatam templopa punkunman churarqa, huknintam alleqnin lawman, huknintañataqmi ichoqnin lawman; alleq lawpi kaqtam suticharqa “Jaquín” nispa, ichoq lawpi kaqtañataqmi “Boaz” nispa.