2~Crónicas 27 - CHUYA QELLQA La Biblia en Quechua de Ayacucho 2012

Rey Jotampa munaychakusqanmanta

¹ Jotamqa iskay chunka pichqayuq watanpim munaychakuyta qallaykurqa. Chunka soqtayuq watam Jerusalén llaqtapi munaychakurqa. Mamanmi karqa Sadocpa churin Jerusa.

² Jotamqa taytan Uzías hinam Tayta Diospa qayllanpi allin kaqkunata ruwarqa. Ichaqa manam Tayta Diospa templonman yaykurqachu. Runakunam ichaqa hinalla huchallikuypi karqaku.

³ Rey Jotammi Tayta Diospa templonpa altonpi kaq punkutapas ruwachirqa, Ofel sutiyuq murallapipas tukuy imatam ruwachirqa.

⁴ Judá nacionpa orqonkunapipas llaqtakunatam ruwachirqa, montekunapipas mana yaykuy atina wasikunatawan torrekunatam ruwachirqa.

⁵ Amón runakunapa reynintapas guerrapim vencerurqa, chayraykum Amón runakunaqa Jotamman chay watapi pagarqaku kimsa waranqa kimsa pachak kilo qollqeta, chunka waranqa tonelada trigota hinaspa chunka waranqa tonelada cebadata. Hina chaynallatam qatiqnin watakunapipas qorqaku.

⁶ Rey Jotamqa Tayta Diospa qayllanpi allinta kawsasqanraykum llumpay atiyniyuq rikurirurqa.

⁷ Jotampa imaynam kawsasqanwan, guerrapi peleasqankunapas chaynataq imakunam ruwasqanpas Judá nacionpi reykunapa chaynataq Israel nacionpi reykunapa vidanmanta willakuq libropim qellqasqa kachkan.

⁸ Rey Jotamqa iskay chunka pichqayuq watanpim kamachikuyta qallaykurqa, payqa chunka soqtayuq watam Jerusalén llaqtapi munaychakurqa.

⁹ Wañukuptinmi “Davidpa Llaqtanwan” sutichasqankupi pamparurqaku. Paypa rantinpim churin Acazña munaychakurqa.