2~Crónicas 25 - CHUYA QELLQA La Biblia en Quechua de Ayacucho 2012

Rey Amasiaspa munaychakusqanmanta

¹ Amasiasqa iskay chunka pich-qayuq watanpim munaychakuyta qallarirqa. Iskay chunka iskayniyuq watam Jerusalén llaqtapi munaychakurqa. Mamanmi karqa Jerusalén llaqtayuq Joadán.

² Rey Amasiasqa Tayta Diospa qayllanpim allinkunata ruwarqa, ichaqa manam tukuy sonqonwanchu.

³ Munaychakuyninpi allinta takyaykuspanmi, taytanta wañuchiq serviqninkunata wañurachirqa.

⁴ Chay runakunapa churinkunatam ichaqa mana wañuchirqachu, Moisespa qellqasqan kamachikuy libropim Tayta Dios kaynata kamachirqa: Tayta-mamanqa manam churinpa huchanmantaqa wañunqachu, nitaqmichurikunapas tayta-mamanpa huchan-mantaqa wañunqachu. Huchallikusqan-kumantaqa sapakamam wañunqaku, nispa.

⁵ Amasiasmi Judá runakunatawan Benjamín ayllukunata huñurachispan, sapa aylluman hina pachakpi hinaspa waranqapi kamachikuqkunata churarqa. Chaymantam iskay chunka watayuqmanta hanayman listarachiptin karqaku kimsa pachak waranqa guerrapaq akllasqa runakuna, paykunaqa karqaku lanzayuqkama hinaspa escudoyuqkamam.

⁶ Israel nacionmantapas, kimsa waranqa kimsa pachaknin kilo qollqewanmi pachak waranqa soldadokunata contratarqa.

⁷ Ichaqa rey Amasiastam Diospa profetan hamuruspan nirqa: Reynilláy, Israel tropakunaqa ama qanwanqa lloqsichunchu, Tayta Dios-qa manam Israel runakunawanqa nitaq Efrainpa mirayninkunawanpas kachkanchu.

⁸ Sichum paykunawan kuska peleaq riptikiqa, Diosmi enemigoykikunawan vencerachisunki. Diosqa atiyniyuqmi yanapasunaykipaq otaq tuñichisunaykipaqpas, nispa.

⁹ Hinaptinmi Diospa profetanta Amasías tapurqa: ¿Imatataq ruwasaq Israel nacionniyuq tropakunapaq kimsa waranqa kimsa pachaknin kilo qollqe qosqaymantaqa? nispa. Diospa profetanñataqmi nirqa: Tayta Diosmi chaymantaqa aswan masta kutichipusunki, nispa.

¹⁰ Chaymi yanapananpaq Efrainmanta hamuq tropakunata Amasías rakirurqa, hinaspam wasinkuman kutikunankupaq aviarurqa, ichaqa paykunam Judá nacionpaq llumpayta piñakuruspanku wasinkuman piñasqallaña kutirqaku.

¹¹ Amasiasmi kallpanchakuruspan “Kachi qechwa” nisqanman tropankunata pusarqa, hinaspam Seir llaqtayuq tropakunata chunka waranqata wañurachirqa.

¹² Judá runakunaqa presocharurqakutaqmi chunka waranqa soldadokunatapas. Paykunatam qaqa patanman pusaruspanku wikapaykamurqaku, hinaptinmi cuerponkupas ñutusqa wañurqaku.

¹³ Amasiaspa guerraman mana riysinanpaq wasinkuman kutichisqan Israel soldadokunañataqmi Judá nacionman yaykuramuspanku, Samaria llaqtamanta qallarispa Bet-horón llaqtakama, kimsa waranqa runakunata wañurachirqaku, tukuy ima kapuqninkutapas qechuspam achkallataña apakurqaku.

¹⁴ Edom tropakuna wañuchimusqan-manta kutimuspanmi, Seir runakunapa idolonkunata rey Amasías apamurqa, hinaspam diosninkunapaq hapiykuspan inciensota kañapuspan yupaycharqa.

¹⁵ Hinaptinmi Amasiaspa contranpi Tayta Dios piñakururqa, hinaspam profetanta kacharqa kaynata nimunanpaq: ¿Imanasqataq huklaw nacionpa dios-ninkunataraq yupaychachkanki llaqtan-tapunipas makikimanta mana librachkaptinqa? nispa.

¹⁶ Diospa profetan manaraq rimayta tukuchkaptinmi Amasías nirqa: ¿Reyta consejaqpaqchu qamta churarqaykiku? Upallay ¿icha wañuytachu munanki? nispa. Rimayta tukuruptinmi profetañataq nirqa: Nisqaykunata mana kasukuspa chay-kunata ruwasqaykimantam wañu-chisunaykipaq Tayta Diosqa tantearunña, nispa.

¹⁷ Chaywanpas Judá nacionpa reynin Amasiasqa hukpa consejonta chaskispanmi Israel nacionpa reynin Joasman comisionta kacharqa kaynata nimunankupaq: Hamuy qawanakunanchikpaq, nispa. Joasqa karqa Jehupa willkanmi hinaspa Joacazpa churinmi.

¹⁸ Hinaptinmi Israelpa reynin Joasñataq Judá nacionpa reynin Amasiasta nirqa: Líbano montepi wiñaq kichka qoram Líbano montepi kaq cedro sachata nichimurqa: “Warmi churikita qari churiywan casarachiy”, nispa. Ichaqa Líbano monte animalmi chayninta pasaruspan kichka qorata saruparurqa.

¹⁹ Qanmi Edom nacionta vencerusqaykiwan qari tukuspa alabakuchkanki. Hawkalla wasikipi kakuy. ¿Imanasqataq peleayta munanki qampas chaynataq Judá nacionpi kaqkunapas llakillapi rikurinaykichikpaqqa? nispa.

²⁰ Amasiasmi ichaqa mana kasurqachu; chaymi Edompa idolonkunaman hapipakusqanmanta Joaspa makinman qoykunanpaq Diospuni tantearurqa.

²¹ Hinaptinmi Israelpa reynin Joasqa Judá nacionpa reynin Amasiaswan tupanakurqa Bet-semes llaqtapi peleanankupaq, chay llaqtaqa kachkan Judá nacionpim.

²² Judá nacionta Israel soldadokuna venceruptinmi wasinkuman sapakama lluptikurqaku.

²³ Israelpa reynin Joasmi Judá nacionpa reynin Amasiasta Bet-semes llaqtapi presocharurqa, hinaspam Jerusalén llaqtaman pusarqa, chaypim llaqtapa murallanta Efraín punkumanta qallarispa esquina punkukama, pachak pusaq chunka metro largoyuqta tuñirachirqa.

²⁴ Diospa templonpi kaq llapa qori-qollqetawan serviciokunatapas apakurqam, chaykunataqa Obed-edonmi nanachikurqa, apakurqataqmi reypa palacionpi kaq qori-qollqetapas. Ancha reqsisqa runakunapa churinkunatapas presocharuspanmi Samaria llaqtaman kutikurqa.

²⁵ Israel nacionpa reynin Joacazpa churin Joás wañukusqanmantam, Judá nacionpa reynin Joaspa churin Amasiasqa chunka pichqayuq watataraq kawsarqa.

²⁶ Amasiaspa imaynam kawsasqanwan imakunam ruwasqanpas, qallariyninmanta tukupayninkamam, Judá nacionpi hinaspa Israel nacionpi reyninkunapa vidanmanta willakuq libropi qellqasqa kachkan.

²⁷ Tayta Diosmanta Amasiaspa rakikusqan punchawmantam Jerusalén llaqtapi yachaqkuna paypa contranpi hoqarikururqaku, chaymi Amasiasqa Laquis llaqtaman lluptikurqa, ichaqa qatispankum chaypi wañurachimurqaku.

²⁸ Ayantapas caballokunapi apamuspankum Judá nacionpi ñawpaq taytakunapa pampakusqanpi pamparurqaku.