2~Crónicas 24 - CHUYA QELLQA La Biblia en Quechua de Ayacucho 2012

Judá nacionpi Joás munaychakusqanmanta

¹ Joasqa qanchis watanpim munaychakuyta qallaykurqa, tawa chunka watam Jerusalén llaqtapi munaychakurqa. Mamanmi karqa Sibia, payqa karqa Beerseba llaqtayuqmi.

² Sacerdote Joiada kawsanankamaqa, Tayta Diospa munayninman hinam Joasqa allin kaqta ruwarqa.

³ Joiadam iskay warmikunawan casarachirqa, hinaptinmi churinkunapas qarikuna warmikuna karqa.

⁴ Chaykuna pasaruptinmi Tayta Diospa templon allichachiyta Joás yuyaymanarqa.

⁵ Chaymi sacerdotekunatawan levitakunata huñurachispan nirqa: Judá nacionpi llaqtakunaman lloqsispayá Israelpi runakunamanta qollqeta huñumuychik, chaynapi Diosninchikpa templonta watan-watan allichachinanchikpaq. Chaytaqa utqaymanyá ruwamuychik, nispa. Llapa levitakunam ichaqa mana chayllachu ruwarqaku.

⁶ Hinaptinmi sumo sacerdote Joiadata qayachimuspan rey nirqa: ¿Imanasqataq llapa levitakunata mana hikutarqankichu Judá nacionmantawan Jerusalenmanta impuestokunata apamunankupaq? Chaytaqa Tayta Diospa serviqnin Moiseswan Israel runakunam tanteanakurqaku Diosman asuykuna carpaman apamunankupaq, nispa.

⁷ Mana allin ruwaq Ataliawan wawankunam Tayta Diospa templonman yaykuruspanku llapa idolonkuta yupay-chanankupaq Tayta Diospaq sapaqchasqa serviciokunata aparurqaku.

⁸ Rey kamachikuptinmi qollqe huñuna cajata ruwaruspanku Tayta Diospa templonpa hawa punkunman churarurqaku.

⁹ Chaymantam Jerusalenpi hinaspa Judá nacionpi yachaqkunaman willachimurqa, Tayta Diosman ofrendankuta apamunankupaq. Chaytam Israel runakunata chunniqpi kachkaptinku Tayta Diospa serviqnin Moisés kamachirqa.

¹⁰ Chaymi llapallan kamachikuqkunawan llapallan runakunapas kusikuywan ofrendankuta apamurqaku, hinaspam huntanankama qollqe huñuna cajaman churarqaku.

¹¹ Llapa levitakunam chay cajata qawananpaq reyman apaqku; sichum huntaña kaptinqa reypa secretarionwan sumo sacerdotepa churasqa runam chay qollqeta tallimuqku, hinaspam chay cajata maymi kasqanman kaqlla churaqku. Sapa punchaw chaynata ruwaspankum achka-achka qollqeta huñururqaku.

¹² Reywan Joiadañataqmi chay qollqeta Tayta Diospa templonpi llamkaqkunaman qoqku, paykunañataqmi contratarqaku rumi labraqkunata, carpinterokunata hinaspa fierropi broncepi llamkaqkunata, Tayta Diospa templonta allichanankupaq.

¹³ Paykunañataqmi llamkaspanku allinta allicharqaku, chaymi Diospa templonqa sumaq allichasqa karqa, imaynam ñawpaq tiempopi kasqanman hinaraq.

¹⁴ Llamkayta tukuruspankum, puchuq qollqeta reyman hinaspa sacerdote Joiadaman aparqaku, chaywanmi ruwachirqaku Tayta Diospa templonpi serviciokunata, sacrificio ofrecenanku serviciokunata, cucharonkunata, vasokunata, qorimanta qollqemanta wakin serviciokunatapas. Joiada kawsanankamaqa Tayta Diospa templonpim sapa punchaw lliw kañana sacrificiota ofrecerqaku.

¹⁵ Joiadaqa llumpay yuyaqñam karqa, hinaspam pachak kimsa chunka watanpi kachkaspan wañukurqa.

¹⁶ Chaymi “Davidpa Llaqtanwan” sutichasqankupi pamparurqaku, reykunapa pampakunanpi; chaynataqa ruwarqaku Israel runakunapaqpas, Tayta Diospa templonpaqpas allinkuna ruwasqanraykum.

¹⁷ Joiada wañukuptinmi, Judá nacionpi kamachikuqkuna hamuspanku reypa qayllanpi qonqorakuspanku hatuncharqaku, hinaspam mana allinkunata umachayta qallaykurqaku.

¹⁸ Hinaptinmi ñawpaq taytankupa yupaychasqan Tayta Diospa templonta qepanchaspanku, Asera sutiyuq idolokunatawan tukuy rikchaq idolokunataña yupaycharqaku. Chay huchankuraykum Judá nacionmanwan Jerusalenman Tayta Diospa piñakuynin chayarqa.

¹⁹ Chaywanpas Tayta Diosmi profetankunata kacharqa payman kutirikamunankupaq. Ichaqa llapa runakunam profetakunapa anyasqanta mana kasukurqakuchu.

²⁰ Hinaptinmi sacerdote Joiadapa churin Zacariasman Tayta Diospa Espiritun huntaykurqa, chaymi altoniqman qespiruspan llapa runakunata nirqa: Tayta Diosmi kaynata nin: ¿Imanasqataq ñoqa Tayta Diospa kamachisqaykunata mana kasukunkichikchu? ¿Imanasqataq sasachakuynikichikta maskankichik? Chayraykum mana allinkuna hamusunkichik. Saqewasqaykichikraykum ñoqapas qamkunata saqerusqaykichik, nispa.

²¹ Ichaqa llapa runakunam Zacariaspa contranpi hatarirurqaku, hinaspankum reypa kamachisqanman hina rumiwan chamqaspa Tayta Diospa templonpa pationpi wañurachirqaku.

²² Rey Joasqa, Zacariaspa taytan Joiada llakipayasqantapas manam yuyarqachu, aswanqa churin Zacariastam wañurachirqa. Zacariasmi wañuypa patanpiña kachkaspan kaynata qaparirqa: ¡Tayta Diosyá kayta qawachun, paymi cuentata mañasunki! nispa.

²³ Tarpuy tiempopim Siria nacionniyuq tropakuna rey Joaspa contranpi hamururqaku, hinaspam Judá naciontawan Jerusalén llaqtata atacanankupaq muyuruspanku nacionpi kamachikuqkunata wañurachirqaku, chaymantam llapa imankuta qechuspa Damascopa reyninman apachirqaku.

²⁴ Siria tropakunaqa asllam hamurqaku, ichaqa Tayta Diosmi Judá nacionpa achka-achka tropankunata paykunaman qoykurqa; chaynataqa ruwarqa ñawpaq taytankupa yupaychasqan Tayta Diosta qepanchasqankuraykum. Chaynatam Joasta Tayta Dios castigarqa.

²⁵ Siria runakunam Joasta wañuypa patanpiña kachkaqta saqerurqaku, hinaptinmi serviqninkuna paypa contranpi hatariruspanku, sacerdote Joiadapa churin wañuchisqanmanta, hina camallanpi wañurachirqaku, hinaspam “Davidpa Llaqtanwan” sutichasqankupi pamparurqaku, paytaqa manam reykunapa pampakunanpichu pamparqaku.

²⁶ Rey Joaspa contranpi hatariqkunam karqa: Amón lawmanta kaq Simeatpa wawan Zabad hinaspa Moab lawmanta kaq Simritpa wawan Jozabad.

²⁷ Rey Joaspa churinkunamantapas, ofrendakuna huñusqanmantapas chay-nataq Tayta Diospa templonta allichachisqanmantapas, reykunapa vidanmanta willakuq libropim qellqasqa kachkan. Paypa rantinpim churin Amasiasña munaychakurqa.