2~Crónicas 20 - CHUYA QELLQA La Biblia en Quechua de Ayacucho 2012

Moabtawan Amón nacionta Josafat vencesqanmanta

¹ Chaykuna pasaruptinmi Moabpa hinaspa Amonpa mirayninkuna hamururqaku rey Josafatpa contranpi peleaq, paykunawantaqmi hamurqa wakin Meún runakunapas.

² Chaymi wakin runakuna rey Josafatman hamuspanku willarqaku: Lamar qochapa waklawnin Edom lawmantam achka-achka tropakuna hamuruspa En-gadi lawpiña otaq Hazezon-tamarpiña kachkanku, nispanku.

³ Chaymi Josafatqa mancharikuspan Tayta Diosta mañakurqa yanapananpaq, Judá nacionpi llapallan runakunamanmi willachirqa ayunanankupaq.

⁴ Hinaptinmi Judá nacionpi kaqkuna huñunakururqaku Tayta Diospa yanapakuyninta mañakuspanku, hamurqakutaqmi Judá nacionpi llapallan llaqtakunapi kaqkunapas.

⁵ Judá nacionmanta chaynataq Jerusalén llaqtamanta kaqkuna, Tayta Diospa templonpa musoq pationpa chimpanpi huñunasqa kachkaptinkum, rey Josafatqa chawpinkupi sayaykuspan

⁶ qayakurqa: Ñawpaq taytaykupa yupaychasqan Dios taytallayku, qamqa hanaq pachapi Diosmi kanki, qamqa llapallan nacionkunapim munaychakunki. Atiypas kallpapas makikipim kachkan, manam pipas qanwanqa atipanakunmanchu.

⁷ Diosnillayku, qanmi Israel llaqtaykipa qayllanmanta kay allpapi yachaqkunata qarqorurqanki, hinaspam amigoyki Abrahampa mirayninkunaman wiña-wiñaypaq qoykurqanki.

⁸ Dios Taytallayku, kay allpapi yachaspankum temploykita ruwaspa nirqaku:

⁹ Sichum ñoqaykuman hamunqa ima ñakariypas chaynataq wañuchinakuypas, peste onqoypas chaynataq yarqaypas, kay templopi kasqaykiraykum ñawpaqnikiman asuykamusaqku, sasachakuyniykupi qayakamuptiykum uyariykuspa salvaykuwankiku, nispanku.

¹⁰ Kunanmi Amonpa churinkuna, Moabpa mirayninkuna, Seir orqopi yachaqkuna, kaypiña kachkanku. Israel llaqtaykita Egiptomanta hurqomuspaykim paykunapa allpanta pasamunanta mana munarqankichu, chay llaqtakunata mana wañurachinankupaqmi llaqtaykita huklaw ñanninta pusarqanki.

¹¹ Chaywanpas kunanqa paykunañam kay qowasqaykiku allpamanta qarqowaykuta munachkanku.

¹² ¡Diosnillayku! ¿Manachu paykunata castiganki? Kay nana-nanaq runakunawan peleanaykupaqqa mana kallpayuqmi kachkaniku, manataqmi ima ruwaytapas atinikuchu, chayraykum yanapawanaykikupaq qamllaman hapipakamuykiku, nispa.

¹³ Judá runakunañataqmi warmintinkama, churintinkama taksa wawakunapas, Tayta Diospa qayllanpi sayarqaku.

¹⁴ Chaypitaqmi kachkarqa Zacariaspa churin Jahazielpas. Zacariasqa karqa Benaiapa churinmi, Benaiañataqmi Jeielpa, Jeielñataqmi karqa Leví ayllu Asafpa mirayninmanta kaq Mataniaspa churin. Jahazielmanmi Tayta Diospa Espiritun huntaykurqa,

¹⁵ chaymi nirqa: Judá runakuna, Jerusalenpi yachaqkuna, qampas rey Josafat, uyariwaychik. Tayta Diosmi kaynata nisunkichik: Kay nana-nanaq tropakunapa qay-llanpiqa ama manchakuychikchu nitaq hukmanyaychikchu, kay guerraqa manam qamkunapachu, aswanqa Diospam.

¹⁶ Paqarinyá paykunata atacaychik, paykunam Sis sutiyuq wichayta hamuchkanku, paykunataqa Jeruel chunniqpa chimpan wayqopa patanpim tarinkichik.

¹⁷ Manam qamkunachu chay guerrapiqa peleankichik, chaynaqa maymi kasqaykichikpim qasillalla kankichik, hinaspam qawankichik imaynam Tayta Diospa librasusqaykichikta. Chaynaqa, Judá runakuna hinaspa Jerusalenpi kaqkuna, ama manchakuychikchu nitaq hukmanyaychikchu, paykunapa contranpi paqarin lloqsinkichik, Tayta Diosmi qamkunawan kanqa, nispa.

¹⁸ Hinaptinmi rey Josafat qonqoranpa pampaman kumuykuptin, Judá runakunawan Jerusalenpi yachaqkunapas yupaychanankupaq Tayta Diospa qay-llanpi qonqorakuykurqaku.

¹⁹ Chaymi Coatpa mirayninmanta hinaspa Coreypa mirayninmanta kaq levitakuna, Israelpa yupaychasqan Tayta Diosta hatun qapariywan yupaycharqaku.

²⁰ Paqarinnintinmi Tecoa chunniqman lloqsirqaku, chaymi lloqsichkaptinku rey Josafat sayarispan nirqa: Judá runakuna hinaspa Jerusalenpi kaqkuna uyariwaychik: Tayta Diosman hapipakuptikichikqa yanapawasunmi, profetakunapipas hapipakuychiktaq, hinaptinqa imapas allinmi lloqsisunkichik, nispa.

²¹ Runakunawan tanteanakuyta tukuruspanmi, takiqkunata churarqa chuya pachawan pachasqatakama, paykunam tropakunapa ñawpaqninta rispa Tayta Diosta yupaychaspanku kaynata nirqaku: “Tayta Diostayá hatunchaychik, kuyapayakuyninqa wiña-wiñaypaqmi”, nispanku.

²² Kusikuywan takiyta qallariptinkum Judá nacionpa contranpi hamuq Amonpa soldadonkunata, Moabpa soldadonkunata chaynataq Seir orqomanta kaqkunatapas kikin Tayta Dios chaqwarachirqa, chaymi kikinkupura wañurachinakur-qaku.

²³ Amonpa tropankunawan Moab-pa soldadonkunam, Seir orqopi ya-chaqkunata atacarurqaku, hinaspam lliwta wañurachirqaku, wañuchiyta tukuruspankuñataqmi kikinkupuraña wañuchinakuspa tukunakururqaku.

²⁴ Judá runakunañataqmi chunniqta qawarina qasaman chayaruspanku, chay nana-nanaq tropakunata qawarispanku tukuy pampapi wañusqa chutarayachkaqtaña rikuykurqaku, manam mayqellanpas lluptisqachu.

²⁵ Chaymi Josafatqa runankunapiwan rirqaku tukuy imankunatapas apakamunankupaq, hinaspam achka-achka animalkunata, armakunata, pacha-kunata hinaspa valorniyuq kaqkunata huñururqaku. Llumpay achka kasqanraykum kimsa punchawpi huñurqaku manaña apaypas atinankukama.

²⁶ Tawa punchawninmanmi Beraca sutiyuq qechwapi huñunakururqaku, chaypim Tayta Diosta yupaycharqaku, chayraykum chay sitiota Beraca qechwawan suticharqaku, chaynam kunankamapas sutin.

²⁷ Chaymantam Judá runakunawan Jerusalenpi runakuna, Josafatta ñawparichikuspanku kusisqallaña Jerusalenman kutimurqaku, kusisqaqa kutirqaku enemigonkumanta Tayta Dios libraykusqanraykum.

²⁸ Jerusalenman chayaramuspankum arpata, salteriota hinaspa trompetakunata tocastin Tayta Diospa templonman yaykurqaku.

²⁹ Israel nacionpa enemigonkunapa contranpi Tayta Dios peleasqanta uyariruspankum, llapa nacionpi reykunapas Tayta Diosta manchakururqaku.

³⁰ Chaynapim rey Josafatpa munaynin hawkayaypi karqa, Tayta Diosmi muyuriqninpi nacionkunawan hawkayaypi kawsachirqa.

Rey Josafatpa munaychakuynin tukusqanmanta

³¹ Chaynatam rey Josafatqa Judá nacionpi munaychakurqa. Payqa kimsa chunka pichqayuq watanpim munaychakuyta qallarirqa. Jerusalén llaqtapim iskay chunka pichqayuq wata munaychakurqa, mamanmi karqa Silhipa churin Azuba.

³² Rey Josafatqa taytan Asa hinam tukuy allinkunata ruwarqa, mana imallapipas pantaykuspanmi Tayta Diospa munasqanman hina kawsarqa.

³³ Chaywanpas moqokunapi capillakunataqa manam chinkachirqachu, llapa runakuna ñawpaq taytankupa Diosninman mana tukuy sonqowan kutirikusqankurayku.

³⁴ Josafatpa imaynam kawsasqanwan imakunam ruwasqanpas qallariyninmanta tukupayninkamam Hananipa churin Jehupa qellqasqan libropi qellqasqa kachkan, chay libropas Israel nacionpi reykunamanta willakuq librokunapa hukninmi.

³⁵ Chaykunapa qepantam Judá nacionpa reynin Josafatqa, Israel nacionpa reynin Ocoziasman hukllawakururqa, Ocoziasqa karqa millakuypaq kaqkuna ruwaqmi.

³⁶ Paymanqa hukllawakururqa barcokunata ruwaspanku Tarsis llaqtaman rinankupaqmi. Chay barcokunatam Ezión-geber llaqtapi ruwarqaku.

³⁷ Hinaptinmi Maresa llaqtayuq Dodavapa churin Eliezer, rey Josafatpa contranpi kaynata profetizarqa: Rey Ocoziasman hukllawakusqaykiraykum ruwasqayki barcokunata Tayta Dios chinkarachinqa, nispa. Nisqanman hinam chay barcokuna pakipakururqa, hinaptinmi manaña Tarsis llaqtaman rirqakuñachu.