2~Crónicas 19 - CHUYA QELLQA La Biblia en Quechua de Ayacucho 2012

Rey Josafat qaqchasqa kasqanmanta

¹ Judá nacionpa reynin Josafatmi Jerusalén llaqtapi palacionman hawkalla kutiramurqa.

² Hinaptinmi Hananipa churin profeta Jehú taripaykuspan rey Josafatta, nirqa: ¿Imanasqataq mana allin ruwaq runakunata yanapanki hinaspa Tayta Dios cheqniqkunata kuyanki? Chayraykum Tayta Diospas qampaq piñakurun.

³ Ichaqa qanmi allinkunata ruwarqanki, Asera idolokunata kañaruspam kay nacionmanta qechururqanki, hinaspam tukuy sonqoykiwan Tayta Diospa yanapakuyninta maskarqanki, nispa.

Juezkunata rey Josafat churasqanmanta

⁴ Rey Josafatmi Jerusalenpi yacharqa, hinaspam llaqtakunata watukurqa, Beersebamanta qallarispa Efraín orqokunakama, chaytaqa ruwarqa runakunata ñawpaq taytankunapa Diosninman kutirichinanpaqmi.

⁵ Judá nacionpi llapallan murallasqa llaqtakunapim juezkunata churarqa,

⁶ hinaspam chay juezkunata nirqa: Sumaqta yuyaymanaspa imatapas ruwaychik, qamkunaqa manam imatapas arreglankichik runakunapa sutinpichu aswanqa Tayta Diospa sutinpim, juzgaptikichikqa paymi qamkunawan kachkan.

⁷ Chaynaqa, Tayta Diosta kasukuspaykichikyá allinta ruwaychik, Tayta Diosqa manam munanchu mana allin ruwaq kanaykichiktaqa, nitaq pimanpas sayapakuspa soborno chaskinaykichiktapas, nispa.

⁸ Jerusalenpipas levitakunatawan, sacerdotekunata hinaspa Israel ayllukunapa kamachiqninkunatam churarqa, juezkuna hina kaspanku llapa runakunapa quejakunata allichanankupaq. Paykunaqa Jerusalén llaqtapim yacharqaku.

⁹ Chaymi paykunata rey kamachirqa: Tayta Diosta manchakuspam cheqap kaqwan hinaspa sumaq sonqollawan imatapas ruwankichik.

¹⁰ Sichum llaq-tamasikichikkuna quejakunawan hamusunkichik, runa wañusqamanta otaq Tayta Diospa kamachikuyninkunata, yachachikuyninkunata, decretonkunata mana kasukusqankumanta juzganaykichikpaq, hinaptinqa paykunatam yachachinkichik Tayta Diospa contranpi ama huchallikunankupaq, chaynapi Tayta Diospa piñakuynin qamkunapa chaynataq paykunapa hawanman mana chayamunanpaq. Chaynata ruwaspaqa mana huchayuqmi kankichik.

¹¹ Sumo sacerdote Amariasmi Tayta Diospa kamachikuyninkunata yachachisunkichik, Judá ayllupa kamachiqnin Ismaelpa churin Zebadiasmi reypa kaqninkunapi kamachisunkichik, levitakunañataqmi kanqa yanapasuqnikichik. Chaynaqa, ¡kallpanchakuspayá llamkayta qallariychik! ¡Tayta Diosyá allin ruwaqkunawan kachun! nispa.