2~Crónicas 18 - CHUYA QELLQA La Biblia en Quechua de Ayacucho 2012

Rey Acab wañusqamanta

¹ Rey Josafatmi llumpayta apuyaruspan ancha reqsisqa rikurirurqa, hinaspam Acabpa warmi churinwan casarakururqa.

² Chaymanta achka watakuna pasaruptinmi, Samaria llaqtaman rey Josafat rirqa rey Acab watukuq, rey Acabñataqmi rey Josafatpaqwan riqmasinkunapaq achka ovejakunatawan torokunata nakachispan Galaad lawpi Ramot llaqtata atacamunankupaq rimapayarqa.

³ Judá nacionpa reynin Josafattam Israelpa reynin Acab tapurqa: ¿Munawaqchum ñoqawan rispa Galaad lawpi kaq Ramot llaqta atacamuyta? nispan. Chaymi rey Josafat nirqa: Qanwan ñoqaqa hukllam kanchik, llaqtanchikpas hukllataqmi, qanwanmi guerraman risaqku.

⁴ Ichaqa puntatayá Tayta Diosta tapuykuy, nispa.

⁵ Hinaptinmi Israelpa reynin tawa pachak profetakunata huñurachispan paykunata tapurqa: ¿Risaqkuchu Galaad lawpi kaq Ramot llaqtata atacamunaykupaq icha manachu? nispa. Profetakunañataqmi nirqaku: Riypu-ni, Diosmi makikiman churamunqa, nispanku.

⁶ Ichaqa rey Josafatmi nirqa: ¿Manachu kaypi kanman Tayta Diospa profetan, payta tapukunanchikpaq? nispa.

⁷ Chaymi Josafatta Israelpa reynin nirqa: Kaytaqa kachkanmi huk profeta, paynintakama Tayta Diosta tapunanchikpaq; ichaqa cheqninim, payqa manam haykapipas allintaqa willawanchu aswanqa mana allinllatam. Payqa Imlapa churin Micaiasmi, nispa. Hinaptinmi Josafat nirqa: Ama chaynataqa rimaychu, nispan.

⁸ Chaymi Israelpa reyninqa serviqnin eunucota qayarachimuspan kamachirqa: Imlapa churin Micaiasta chaylla pusamuway, nispa.

⁹ Israelpa reyninwan Judá nacionpa reynin Josafatmi rey pachawan pachasqakama trononkupi sapakama tiyachkarqaku, Samaria llaqtaman yaykuna erapi, llapallan profetakunapas qayllankupim profetizachkarqaku.

¹⁰ Quenaanapa churin Sedequiasmi fierromanta waqrakunata ruwaruspan qaparispa profetizachkarqa: Tayta Diosmi kaynata nin: “Kay waqrakunawanmi Siria runakunata atacaruspa chinkarachinki”, nispa.

¹¹ Llapallan profetakunam chaynallata profetizaspanku nirqaku: Galaad lawpi kaq Ramot llaqtataqa atacamuypuni, Tayta Diosmi makikiman churamunqa, nispanku.

¹² Micaiasta qayamunanpaq kachasqan runañataqmi Micaiasta nirqa: Llapallam profetakunam chaynallata profetizaspanku allin kaqllata reyman nichkanku. Chaynaqa, ruegakuykim, qampas paykuna hinayá allinta nimuy, nispa.

¹³ Micaiasñataqmi nirqa: Kawsaq Tayta Diosraykum jurani, ñoqaqa Diosniypa imam niwasqallantam rimasaq, nispa.

¹⁴ Reypa kasqanman hamuruptinmi rey tapurqa: Micaías ¿Risaqkuchu Galaad lawpi kaq Ramot llaqtata atacamunaykupaq icha manachu? nispa. Chaymi Micaías nirqa: Riypuni, Diosmi makikiman churamunqa, nispa.

¹⁵ Ichaqa reymi nirqa: ¿Hayka kutikamataq nisqayki Tayta Diospa sutinpi cheqapllata niwanaykipaq? nispa.

¹⁶ Chaymi Micaías nirqa: Ñoqam Israel runakunata rikurqani, mana michiqniyuq ovejakunata hina orqokunapi cheqesqata, chaymi Tayta Dios nirqa: “Paykunaqa mana kamachiqniyuqmi kachkanku, sapakama wasinkuman hawkalla kutikuchunku”, nispa.

¹⁷ Chaymi rey Josafatta Israelpa reynin Acab nirqa: ¿Manachu nirqayki kay runaqa manam imatapas allinniypaqqa willawanchu aswanqa mana allinllatam nispay?

¹⁸ Hinaptinmi Micaías nirqa: Tayta Diospa nisqanta uyariychik: Ñoqam rikurqani Tayta Diosta trononpi tiyachkaqta, rikurqanitaqmi hanaq pachapi llapallan serviqninkunatapas alleqninpi hinaspa ichoqninpi sayachkaqta.

¹⁹ Chaymi Tayta Dios tapukurqa: ¿Pitaq Acabta engañarunman Galaad lawpi kaq Ramot llaqtata atacamuspan chaypi wañuchisqa kananpaq? nispa. Chaymi sapakama imaymanata nirqaku.

²⁰ Ichaqa huk espiritum Tayta Diospa ñawpaqninman yaykuykuspan, nirqa: “Ñoqam engañaramusaq”, nispa. Hinaptinmi Tayta Diosñataq tapurqa: ¿Imaynatataq ruwamunki? nispa.

²¹ Hinaptinmi chay espíritu nirqa: Llapallan profetankunapa siminmanmi llulla rimayllata churamusaq, nispa. Chaymi Tayta Dios nirqa: Engañamuspa chaynata ruwamuy, nispa.

²² Chaynaqa, yachankiñam, Tayta Diosmi profetaykikunapa siminman llulla espirituta churarun, chaynallataqmi Tayta Diosqa wañunaykitapas tantearunña, nispa.

²³ Hinaptinmi Quenaanapa churin Sedequías asuykuspan Micaiasta uyanpi takarurqa, hinaspam nirqa: ¿Maynintataq Tayta Diospa espiritun ñoqamanta lloqsirurqa qamtaraq rima-payasunaykipaq? nispa.

²⁴ Micaiasñataqmi nirqa: Chaytaqa yachanki cuarton-cuarton pakakusqayki punchawmi, nispa.

²⁵ Chaymi Israelpa reynin nirqa: Micaiasta hapispa llaqtapi gobernador Amonmanwan churiy Joasman pusaychik,

²⁶ hinaspa nimuychik: Reymi kaynata nin: “Kay runata carcelpi wichqaspa mikunanpaqpas tantatawan yakullata qoychik, vencespa kutimunaykama”, nispa.

²⁷ Micaiasñataqmi nirqa: Sichum vencespa kutimunki hinaptinqa manam Tayta Dioschu ñoqantakama rimarirqa, nispa. Chaymantapas nirqataqmi: Llapallan llaqtakuna uyariychik, nispa.

²⁸ Israelpa reyninwan Judá nacionpa reynin Josafatmi Galaad lawpi kaq Ramot llaqtaman rirqaku.

²⁹ Hinaptinmi Josafatta Israelpa reynin nirqa: Ñoqam huk pachawan pachakuruspay peleaq yaykusaq, qamñataqmi hina rey pachallaykiwan kanki, nispa. Chaymi Israelpa reyninqa huk pachawan pachakuruspan peleaq yaykurqa.

³⁰ Siria nacionpa reyninmi ichaqa carretankunapi kaq capitankunata kaynata kamachirqa: Amam piwanpas peleankichikchu aswanqa Israel nacionpa reynillanwanmi, nispa.

³¹ Chaymi carretakunapi kaq capitankuna rey Josafatta rikuruspanku nirqaku: Paymi Israel nacionpa reyninqa, nispanku. Hinaspam muyuriqninman churakuruspa peleanankupaq pasaykuptinku, rey Josafatñataq yanapakuyta mañakuspan qaparirqa, chaymi Tayta Dios yanapaykuspa enemigonkunata paymanta asurachirqa.

³² Carretakunapi kaq capitankunam mana Israelpa reynin kasqanta qawaykuspanku anchurikururqaku.

³³ Ichaqa hukkaqnin soldadom llutanpi flechaspan Israel nacionpa reyninta qasqonpi hapirachirqa harkachikunanpa tupanakuqninpi, chaymi reyñataq carretan manejaqta nirqa: Carretata muyuchiy hinaspa kaymanta hurqoway, llumpay kirisqam kachkani, nispa.

³⁴ Ichaqa chay punchawpi guerra llumpay kasqanraykum Israel nacionpa reyninqa hina carretallanpi sayarqa, Siria tropakunapa chimpanpi, hinaspam inti seqaykuyta wañukurqa.