2~Crónicas 17 - CHUYA QELLQA La Biblia en Quechua de Ayacucho 2012

Rey Josafatpa munaychakusqanmanta

¹ Rey Asapa rantinpim churin Josafatña munaychakurqa, paymi Israelpa contranpi allinta kallpanchakururqa.

² Judá nacionpi kaq murallasqa llaqtakunapim tropakunata churarurqa, churarqataqmi lliw Judá allpapiwan taytan Asapa hapikuykusqan Efraín law llaqtakunapipas.

³ Tayta Diosmi rey Josafatta yanaparqa, payqa ñawpaq taytan Davidpa kawsasqanta hinam kawsarqa, manam Baal idolokunataqa servirqachu,

⁴ aswanqa taytanpa Diosninta maskaspanmi kamachikuyninkunata kasukurqa, Israel nacionpi runakunapa ruwasqantapas manam qatipakurqachu.

⁵ Chayraykum paypa munaychakuyninta Tayta Dios takyachirqa; Judá runakunapas regalokunatam qorqaku, chaynapim payqa achka kapuqniyuq kaspan ancha reqsisqa karqa.

⁶ Payqa tukuy sonqonwanmi Tayta Diospa munasqanman hina kawsarqa. Chinkarachirqataqmi Judá law moqokunapi capillakunatapas chaynataq Asera sutiyuq idolokunatapas.

⁷ Kimsa wataña munaychakuchkaspanmi, churasqan kamachikuqkunata kacharqa Judá llaqtakunapi yachachimunankupaq, paykunam karqa: Ben-hail, Abdías, Zacarías, Natanael hinaspa Micaías.

⁸ Paykunawantaqmi levitakunatapas kacharqa, paykunam karqaku: Semaías, Netanías, Zebadías, Asael, Semiramot, Jonatán, Adonías, Tobías hinaspa Tobadonías. Paykunawantaqmi rirqa sacerdote Elisamawan sacerdote Jorampas.

⁹ Paykunam Tayta Diospa kamachikuyninkunata Judá nacionpi yachachimurqaku. Judá nacionpi llapallan runakunata yachachistinmi llaqtan-llaqtan purirqaku.

¹⁰ Judá nacionpa muyuriqninpi nacionkunam Tayta Diosta manchakururqaku, chayraykum rey Josafatpa contranpi mana peleayta munarqakuchu.

¹¹ Filisteokunapas impuestota pagaspankum rey Josafatman regalokunata apamuqku. Arabia law runakunapas qanchis waranqa qanchis pachaknin carnerokunatawan qanchis waranqa qanchis pachaknin chivatokunatam apamurqaku.

¹² Rey Josafatmi munaychakuyninpi aswan atiyniyuq rikurirurqa; Judá nacionpim hatarichirqa murallasqa llaqtakunatawan mikuy waqaychana llaqtakunata.

¹³ Judá llaqtakunapipas achka-achkam karqa tukuy imankunapas, Jerusalén llaqtapipas guerrapi peleaq allinnin qari-qari soldadonkunam karqa.

¹⁴ Paykunam ayllunkuman hina karqaku: Soldadokunapa kamachiqnin Judá ayllumanta kaq Adnas. Paywanmi karqa kimsa pachak waranqa allinnin qari-qari soldadokuna.

¹⁵ Adnaspa qepanmanmi karqa Johanán, paywanmi karqa iskay pachak pusaq chunka waranqa soldadokuna,

¹⁶ Johananpa qepanmanmi karqa Zicripa churin Amasías, paymi kikinmanta yaykurqa Tayta Diosta servinanpaq. Paywanmi karqa iskay pachak waranqa allinnin qari-qari soldadokuna.

¹⁷ Benjamín ayllumantam karqa Eliada sutiyuq allinnin qari-qari soldado, paywanmi karqa iskay pachak waranqa soldadokuna, flechayuqkama hinaspa escudoyuqkama.

¹⁸ Eliadapa qatiqninñataqmi karqa Jozabad, paywanmi karqa guerrapaq armasqa pachak pusaq chunka waranqa runakuna.

¹⁹ Paykunam reypa serviqninkuna karqaku, Judá nacionpa muyuriqnin murallasqa llaqtakunapi kaqkunaqa manam yupasqachu karqaku.