2~Crónicas 16 - CHUYA QELLQA La Biblia en Quechua de Ayacucho 2012

Rey Ben-adadwan rey Asapa contrato ruwasqanmanta

¹ Kimsa chunka soqtayuq watamanña rey Asa munaychakuchkaptinmi Israel nacionpa reynin Baasa Judá nacionpa contranpi peleaq rirqa. Ramá llaqtata allinta murallarachispanmi Judá nacionpi reypa kasqanmanqa mana pitapas kacharirqachu, nitaqmi chaymanta kutimunantapas saqerqachu.

² Chaymi rey Asaqa Tayta Diospa templonpi chaynataq reypa palacionpi kaq qoritawan qollqeta hurqoramuspan, Damasco llaqtapi yachaq Siria nacionpa reynin Ben-adadman kaynata nispan apachirqa:

³ Imaynam taytaykiwan ñoqapa taytay contrato ruwasqankuta hinayá ñoqanchikpas contratota ruwasunchik. Qoritawan qollqetam apachimuchkayki Israel nacionpa reynin Baasawan contrato ruwasqaykita tukunaykipaq, chaynapi ñoqamanta anchurikunanpaq, nispa.

⁴ Rey Asapa nisqanta uyarispanmi rey Ben-adadqa tropankunapa kamachiq-ninkunata kacharqa Israel nacionpi llaqtakunata atacamunankupaq. Vence-ruspanmi hapikuykurqa Ijón llaqtata, Dan llaqtata hinaspa Abel-maim llaqtatapas, hapikuykurqataqmi Neftalí lawpi kawsaykuna waqaychana llaqtakunatapas.

⁵ Chayta yacharuspanmi rey Baasañataq Ramá llaqta murallachiyta saqerurqa, manañam llamkachirqachu.

⁶ Rey Asañataqmi Judá nacionpi runakunata huñuruspan Ramá llaqtamanta rey Baasapa ruwachisqan rumikunatawan qerukunata apakurqaku, chaykunawanmi Geba llaqtatawan Mizpa llaqtata aswantaraq allichachirqa.

⁷ Chay tiempopim profeta Hanani Judá nacionpa reynin Asaman hamuspa nirqa: Tayta Diosman mana hapipakuspayki aswanqa Siria nacionpa reyninman hapipakusqaykiraykum, Siriapa soldadonkuna qanmanta lluptirunku.

⁸ Etiopía tropakunawan Libia tropakunaqa, ¿manachum achkallaña karqaku? ¿Manachum carretakunawan sillada tropankunapas achkallaña karqaku? Chaywanpas Tayta Diosman hapipakusqaykiraykum makikiman churaykurqa.

⁹ Tayta Diosqa kay pachapi tukuy ima pasakusqantam qawamuchkan, chaynapi paypa qayllanpi allin sonqoyuqkunaman atiyninta qawachinanpaq. Loco hinam kaykunataqa ruwarunki, kunanmantaqa guerrallañam qampa contraykipi kanqa, nispa.

¹⁰ Chayta uyariykuspanmi rey Asaqa llumpayta piñakuruspan profeta Hana-nita carcelarachirqa, payqa chay willa-kusqanwanmi llumpayta piñakururqa. Chay tiempokunapim rey Asa wakin runakunatapas llumpayta ñakarichirqa.

Rey Asapa wañukusqanmanta

¹¹ Rey Asapa imaynam kawsasqanwan imakunam ruwasqanpas, qallariynin-manta tukupayninkamam Judá nacionpi hinaspa Israel nacionpi reykunapa vidanmanta willakuq libropi qellqasqa kachkan.

¹² Kimsa chunka isqonniyuq wataña munaychakuchkaspanmi rey Asaqa chaki nanaywan llumpayta onqorurqa, onqoruchkaspanpas manam Tayta Diostaqa maskarqachu aswanqa doctorkunamanmi hapipakurqa.

¹³ Payqa tawa chunka hukniyuq wataña munaychakuchkaspanmi wañukurqa.

¹⁴ Chaymi “Davidpa Llaqtan” nisqankupi pamparurqaku kikinpa ruwachikusqan sepulturapi. Chakanapi chutaykuspankum miskillaña asnaq perfumekunata hinarqaku, chaykunam karqa allin perfume ruway yachaqkunapa ruwasqan. Paypaqmi hatun lenwachkaq ninata ratachirqaku.