2~Crónicas 14 - CHUYA QELLQA La Biblia en Quechua de Ayacucho 2012

¹ Abías wañuruptinmi “Davidpa Llaqtan” nisqankupi pamparurqaku, paypa rantinpim churin Asaña munaychakurqa. Paypa munaychakuyninpim chunka watapuni nacionpi hawkayay karqa.

Asapa Judá nacionpi munaychakusqanmanta

² Rey Asaqa Tayta Diosninpa munasqanman hinam ruwarqa.

³ Huklaw nacionniyuq runakunapa diosninkupa altarninkunatapas, moqokunapi kaq capillakunatapas, rumimanta ruwasqa idolokunatapas, Asera sutiyuq idolo-tapas ñutuparurqam.

⁴ Judá runakunatapas kamachirqam ñawpaq taytankupa yupaychasqan Tayta Diosta maskaspa yachachikuyninkunatawan kamachikuyninkunatapas kasukunankupaq.

⁵ Judá nacionpi llaqtakunapa moqonkunapi kaq capillakunatapas chaynataq incienso kañana altarkunatapas tuñirachirqam. Pay munaychakusqan watakunapiqa hawkayaymi karqa.

⁶ Judá nacionpim allin murallasqa llaqtakunata ruwachirqa, nacionpi hawkayay kasqanrayku. Paypa tiemponpiqa manam ima guerrapas karqachu, Tayta Diosmi hawkayayta qorqa.

⁷ Judá runakunatam nirqa: Kay llaqtakunata allichasun, muyuriqninpipas murallatawan torrekunata ruwasun, punkunkunatapas cerrojoyuqta churasun. Kay nacionqa ñoqanchikpam, Tayta Diosta maskasqanchikraykum muyuriqninchikpi nacionkunawan hawkayayta qoykuwanchik, nispa. Chaynapim chay llaqtakunata allinta ruwarqaku.

⁸ Rey Asapam karqa Judá ayllumanta kimsa pachak waranqa soldadonkuna, escudoyuqkama hinaspa lanzayuqkama; Benjamín ayllumantañataqmi iskay pachak pusaq chunka waranqa soldadonkuna, paykunapas escudoyuqkama hinaspa flechayuqkama, llapallankum allinnin qari-qari soldadokuna karqaku.

⁹ Paykunapa contranpim hamurqa Etiopía nacionniyuq Zera, waranqantin-waranqantin soldadokunawan, guerrapaq kimsa pachak carretakunawan, hinaspam Maresa llaqtakama chayaramurqa.

¹⁰ Hinaptinmi rey Asa paykunapa contranpi peleananpaq lloqsirqa, hinaspam Maresapa hichpan Sefata qechwapi churakururqa.

¹¹ Rey Asam Tayta Diosta kaynata mañakurqa: Diosnilláy, kallpayuqtapas mana kallpayuqtapas qamllam yanapanki. Dios Taytallayku, yanapaykullawayku, qanmanmi hapipakamuykiku, qampa sutikipim hamuniku kay nana-nanaq soldadokunapa contranpi peleanaykupaq. Dios Taytalláy, qanmi Diosniyku kanki, manam qamtaqa pipas vencesunkichu, nispa.

¹² Chaymi Etiopía soldadokunata Tayta Dios vencerurqa, Asapa hinaspa Judá runakunapa qayllanpi, hinaptinmi Etiopía runakuna ayqekurqaku.

¹³ Rey Asañataqmi soldadonkunapiwan Gerar llaqtakama qatispanku Etiopía soldadokunata Tayta Diospa qayllanpi mana hukllatapas puchuykuspa wañurachirqaku, hinaspam tukuy imankutapas apakurqaku.

¹⁴ Chaymantam Gerar llaqtapa muyuriqninpi llapallan llaqtakunata atacarurqaku, Tayta Diospa ruwasqanwanmi chaykunapi yachaqkuna mancharikururqaku. Judá runakunam llapallan llaqtakunapa tukuy imankuta qechurqaku chaypi achkallaña llapa imakuna kasqanrayku.

¹⁵ Atacarurqakutaqmi animalkuna kanan hatuskunatapas, hinaspam achkallaña ovejakunatawan camellokunata apakurqaku; chaymantam Jerusalén llaqtaman kutikurqaku.