2~Crónicas 12 - CHUYA QELLQA La Biblia en Quechua de Ayacucho 2012

Judá nacionta rey Sisac atacasqanmanta

¹ Rey Roboamqa munaychakuyninta allinta takyarachispanmi, Tayta Diospa kamachikuyninta qepanchakururqa, Israelpa mirayninkunapas chaynallatam ruwarqaku.

² Tayta Diosta mana kasukusqankuraykum, Roboam pichqa wataña munaychakuchkaptin, Egipto nacionpa reynin Sisac hamuspan Jerusalén llaqtata atacarurqa,

³ waranqa iskay pachak carretakunawan, soqta chunka waranqa silladakunawan hinaspa mana yupay atina runakunawan; paykunam karqa Libia runakuna, Suqui runakuna hinaspa Etiopía runakuna.

⁴ Paymi hapikuykurqa Judá nacionpi murallasqa llaqtakunata, hinaspam Jerusalén llaqtakama chayarurqa.

⁵ Rey Sisac hamusqanraykum Roboam-wan Judá nacionpi kamachikuqkuna Jerusalén llaqtapi huñunasqa kachkarqaku, hinaptinmi profeta Semaías hamuruspan Tayta Diospa nisqanta kaynata nirqa: Saqeruwasqaykichikraykum ñoqapas rey Sisacpa makinpi saqeruykichik, nispa.

⁶ Hinaptinmi rey Roboamwan Israelpi kamachikuqkuna uchuychakuspanku nirqaku: Allinpunim Tayta Diospa kay ruwasqanqa, nispanku.

⁷ Uchuychakusqankuta Tayta Dios qawaykuspanmi, profeta Semaiasta nirqa: Uchuychakusqankuraykum manaña chinkachisaqchu, aswanqa chayllam librasaq. Manañam piñakuyniytapas Sisacnintakamaqa Jerusalén llaqtaman kacharimusaqñachu.

⁸ Ichaqa rey Sisactam servinqaku, chaynapim yachanqaku imaynam ñoqata servina kasqanta hinaspa imaynatam huklaw nacionniyuq reykunata serviy kasqantapas.

⁹ Egipto nacionpa reynin Sisacmi Jerusalén llaqtata atacaspan, Tayta Diospa templonpi chaynataq reypa palacionpi tukuy imakunatapas lliwta apakurqa, apakurqataqmi Salomonpa qorimanta ruwachisqan escudonkunatapas.

¹⁰ Chaymi Rey Roboamqa, qorimanta escudokunapa rantinpi broncemanta escudokunataña ruwachirqa, hinaspam reypa palacionman yaykuq punkuta waqaychaq soldadokunapa kamachiqninman qoykurqa.

¹¹ Tayta Diospa templonman sapa kuti rey yaykuptinmi waqaychaqnin soldadokuna chay escudokunata apaqku, hinaspam punkuta nanachikuq soldadokunapa cuartonman kasqallan kutichimuqku.

¹² Chaynata rey Roboam humillakusqanraykum Tayta Diospa piñakuynin paymanta asurirqa, chaynapim mana pasaypaqchu chinkarachirqa, Judá nacionpi allin kaqkuna kasqanrayku.

¹³ Rey Roboammi munaychakuyninta allinta takyachispan Jerusalén llaqtapi munaychakurqa. Payqa tawa chunka hukniyuq watanpim munaychakuyta qallaykurqa, hinaspam chunka qanchisniyuq wata Jerusalén llaqtapi munaychakurqa. Jerusalén llaqtatam Israelpi llapallan ayllukunamanta Tayta Dios akllakurqa sutin chaypi reqsisqa kananpaq. Roboampa mamanmi karqa Amón nacionniyuq Naama.

¹⁴ Roboamqa manam tukuy sonqowanchu Tayta Diosta maskarqa, chaymi mana allinkunata ruwarqa.

¹⁵ Roboampa imaynam kawsasqanwan imakunam ruwasqanpas, qallariyninmanta tukupayninkamam profeta Semaiaspa hinaspa profeta Iddopa ayllukunamanta qellqasqanku librokunapi qellqasqa kachkan. Jeroboamwan Roboamqa sapa kutillam guerrallapi karqaku.

¹⁶ Roboam wañuruptinmi “Davidpa Llaqtan” nisqankupi pamparurqaku. Roboampa rantinpim churin Abiasña munaychakurqa.