2~Crónicas 10 - CHUYA QELLQA La Biblia en Quechua de Ayacucho 2012

Israelpa rakinakurusqanmanta

¹ Israelpa mirayninkunam Siquem llaqtapi huñunakururqaku reyninkupaq Roboamtaña churanankupaq, chaymanmi Roboampas rirqa.

² Chayta Nabatpa churin Jeroboam yacharuspanmi Egiptomanta kutimurqa. Payqa rey Salomonmanta lluptiruspanmi Egipto nacionpiraq kachkarqa.

³ Chaymi Jeroboamta qayachimuptinku Israel mirayninkunawan kuska Roboamman rispanku kaynata nirqaku:

⁴ Taytaykiqa llumpaytam ñakarichiwarqaku, chaynaqa kunanyá llumpay llamkay qowasqankutawan sasa cumplina kamachikuykunata menosyachiy, nispanku.

⁵ Chaymi Roboam nirqa: Kimsa punchawmantayá kutimuychik, nispa. Chaymi runakuna kutikurqaku.

⁶ Hinaptinmi taytan Salomonta kawsachkaptinraq serviqnin ancianokunata rey Roboam kaynata tapukurqa: ¿Imatataq consejawankichik kay runakunaman ninaypaq? nispa.

⁷ Hinaptinmi paykuna nirqaku: Sichu kay llaqtata allinta servispayki sumaqllata kamachispa kuyakuywan rimapayaptikiqa tukuy tiempom servisunki, nispanku.

⁸ Roboammi ichaqa llapa ancianokunapa consejasqanta mana kasukuspan paywan kuska wiñaq serviqnin jovenkunata tapukurqa consejachikunanpaq,

⁹ kaynata: ¿Imatataq consejawankichik kay runa-kunaman ninaypaq? Paykunam mañakuchkanku taytaypa llumpay llamkay qosqantawan sasa cumplina kamachikuykunata menosyachinaypaq, nispa.

¹⁰ Hinaptinmi Roboamwan kuska uywas-qa jovenkunañataq nirqaku: “Taytaykipa sasa llamkaykuna qowasqankuta menosyachiy” niq runakunataqa kaynatam ninki: Taytaypa ñakarichisusqaykichikmantapas aswantaraqmi ñoqaqa ñakarichisqaykichik.

¹¹ Taytayqa sasa llamkaykunapim llamkachisurqankichik, ñoqam ichaqa aswantaraq llamkachisqaykichik; taytayqa azotellawanmi castigasurqankichik, ñoqam ichaqa fierro puntayuq azotewanraq castigasqaykichik, nispayki.

¹² Kimsa punchawmantam reypa nis-qanman hina, Jeroboamqa llapallan runakunapiwan rey Roboampa qayllanman kutimurqaku.

¹³ Reymi ichaqa Ancianokunapa consejasqanta mana kasukuspan, runakunata nanay simiwan rimapayarqa.

¹⁴ Hinaspanmi Jovenkunapa consejasqanman hina kaynata nirqa: Taytayqa sasa llamkaykunapim llamkachisurqankichik, ñoqam ichaqa aswantaraq llamkachisqaykichik; taytayqa azotellawanmi castigasurqankichik, ñoqam ichaqa fierro puntayuq azotewanraq castigasqaykichik, nispa.

¹⁵ Chaynapim reyqa runakunapa maña-kusqanta mana uyariqpas tu-kurqachu, Tayta Diospuni chaynata tantea-rusqanrayku, chaynapi Silo llaqtayuq profeta Ahiasnintakama Nabatpa churin Jeroboamman Tayta Diospa nisqan cumplikunanpaq.

¹⁶ Mañakuyninkuta reypa mana kasusqanta qawaykuspankum Israelpa mirayninkunaqa nirqaku: ¡Davidwanqa manam imapas ruwananchik kanñachu! ¡Isaipa churinwanqa manam ima herencianchikpas kanchu! ¡Israelpa mirayninkuna sapakama wasikichikman kutikuychik! ¡Davidqa ayllullanpi munaychakuchun! nispanku. Hinaspam Israelpa mirayninkunaqa wasinkuman sapakama ripukurqaku.

¹⁷ Chaynapim Roboamqa Judá llaqtakunapi yachaq Israelpa mirayninkunallapiña munaychakurqa.

¹⁸ Roboammi impuesto cobraqkunapa kamachiqnin Adoniramta Israel runakunaman kacharqa, paykunam ichaqa rumiwan tukuruspa wañurachirqaku. Rey Roboamñataqmi Jerusalén llaqtaman utqaylla carretanpi lluptikurqa.

¹⁹ Chaynatam Israel runakunaqa Davidpa ayllunmanta rakikururqaku. Chaynam kunankamapas kachkanku.