2~Crónicas 1 - CHUYA QELLQA La Biblia en Quechua de Ayacucho 2012

Salomonpa yachay mañakusqanmanta

¹ Davidpa churin Salomonmi munaychakuyninta allinta takyarachirqa. Tayta Diosmi paywan kaspan ancha atiyniyuqta ruwarurqa.

² Salomonmi huñurachirqa Israel runakunata, waranqa soldadopi kamachikuqkunata, pachak soldadokunapi kamachiqkunata, juezkunata, Israel nacionpi kamachikuqkunata hinaspa ayllukunapi kamachikuqkunatapas.

³ Kay huñusqa runakunawanmi Salomón rirqa Gabaón moqopi santuarioman, chaypim tarikurqa Diospa serviqnin Moisespa ruwachisqan Diosman asuykuna carpa, chaytam chunniqpi ruwachirqa.

⁴ Davidmi Tayta Diospa Arcanta Quiriat-jearim llaqtamanta apachi-murqa Jerusalén llaqtapi hatarichisqan carpaman.

⁵ Hurpa willkan otaq Uripa churin Bezaleelpa broncemanta ruwasqan altarpas Gabaón orqopim tarikurqa Tayta Diosman asuykuna carpapa ñawpaqninpi, chaymanmi Salomón rirqa llapan huñunasqa runakunawan Tayta Diosta tapukamunankupaq.

⁶ Chaypim Tayta Diospa ñawpaqninpi, Diosman asuykuna carpapa ñawpaqninpi broncemanta altarman Salomón seqarurqa, hinaspanmi waranqa lliw kañana sacrificiota ofrecerqa.

⁷ Chay tutam Salomonman Tayta Dios rikuriykuspan nirqa: Mañakuway imam munasqaykita, ño-qam qosqayki, nispa.

⁸ Chaymi Salomón nirqa: Qanmi taytay Davidta anchata kuyaspayki, paypa rantinpi rey kanaypaq churaykuwarqanki.

⁹ Chaynaqa, Dios Taytalláy, taytay Davidman prometesqaykiyá cumplikuchun, qanmi ñutu allpa hinaña nana-nanaq runakunapi munaychakunaypaq churaykuwarqanki.

¹⁰ ¿Pitaq kay achkallaña runaykikunata munaychakunman? Chaynaqa, kunanyá kay llaqtapi munaychakunaypaq yachaytawan yuyayta qoykuway, nispa.

¹¹ Hinaptinmi Salomonta Dios nirqa: Kaytaqa allintam tantearunki, qamqa manam mañakuchkanki apuyaytachu, qori-qollqetachu, reqsisqa kaytachu, enemigoykikuna wañunantachu, nitaq unay kawsakuytachu, aswanqa reyninku kanaykipaq churasqay runaykunapi munaychakunaykipaqmi yachaytawan yuyayta mañakuchkanki.

¹² Chayraykum yachaytawan yuyayta qosqayki, qosqaykitaqmi apuyaytawan qori-qollqetapas chaynataq ancha reqsisqa kaytapas. Qam hina reyqa manam ñawpaqtapas karqachu, nitaqmi qepamanpas kanqachu, nispa.

¹³ Gabaón moqopi Diosman asuykuna carpamantam Jerusalén llaqtaman Salomón kutimurqa, hinaspam Israel nacionpi munaychakurqa.

Rey Salomonpa rantisqankunamanta

¹⁴ Rey Salomonmi huñurachirqa waranqa tawa pachaknin carretankunata hinaspa chunka iskayniyuq waranqa silladakunatapas; chaykunatam rakina-rurqa wakinta chaypaq akllasqa llaq-takunaman, wakinñataq palacionpi waqaychaqninkuna kananpaq.

¹⁵ Reymi qorita qollqeta Jerusalén llaqtapi huñurachirqa rumita hinaña, cedrokunapas karqa purunpi wiñaq higos sachakuna hinañam.

¹⁶ Salomonpaqmi caballokunata rantimurqaku Egipto nacionmantawan Cilicia lawmanta.

¹⁷ Egiptomantam allinnin carretata rantimuqku qanchis kilo qollqewan, caballotañataqmi iskay kilo qollqewan. Het nacionpa reyninwan Siria nacionpa reyninñataqmi Salomonmantaña rantirqaku.