2~Corintios 8 - CHUYA QELLQA La Biblia en Quechua de Ayacucho 2012

Ofrendantaqa kusikuywan qonanchikmanta

¹ Wawqe-panillaykuna, kunanmi willamuykiku imaynam Macedonia law iglesiakunapi Diospa kuyakuynin qawachikusqanta.

² Paykunaqa ancha sasachakuykunapi kachkaspankupas hatuntam kusikurqaku, wakcha kachkaspankupas apu hinaraqmi ofrendankutaqa tukuy sonqonkuwan qorqaku.

³ Qorqakuqa manam atisqallankutachu, aswanqa mana qoy atisqankutawanmi, ñoqapunim tukuy sonqonkuwan qosqankuta rikurqani.

⁴ Anchatam ruegawarqaku ofrendankuwan Jerusalén llaqtapi iñiqkunata yanapaykunankupaq.

⁵ Piensasqaykumantapas mastaraqmi huñururqaku, puntataqa kikinkuraqmi Señorpa makinman churakuykurqaku, hinaspañam Diospa munasqanman hina ñoqaykuman qowarqaku.

⁶ Chaymi Titota ruegarqaniku imaynam qallarisqanman hina chay kuyakuy ofrendata qamkuna ukupi huñuyta tukumunanpaq.

⁷ Qamkunaqa lliwpim masyankichik: Iñiypi, yachachiypi, yachayniyuq kaypi, allin ruwaypi hinaspa ñoqayku kuyawaykupipas, chaynaqa kuyakuy ofrenda qoypipas masyaychikyá.

⁸ Kayta nispayqa manam kamachiq hinachu nimuykichik, aswanqa munaymanmi wakinkunapa tukuy sonqonwan ruwasqanku yachanaykichikta, chaynapi qamkunapa kuyakuynikichikqa cheqap kasqanta wakinkunaman qawachinaykichikpaq.

⁹ Qamkunaqa yachankichikñam Señorninchik Jesucristopa kuyawasqanchikta. Payqa apu kachkaspam qamkunata kuyasusqaykichikrayku wakchayarurqa, chaynapi wakcha kayninwan qamkuna apu kanaykichikpaq.

¹⁰ Qamkunapa allinnikichikpaqmi kay consejoyta qoykichik. Qayna watamantaraqmi ofrenda huñuyta qallaykurqankichik, ichaqa manam huñuyllatachu, aswanqa tukuy sonqowan ruwaytam munarqankichik.

¹¹ Chaynaqa, kunanyá tukuychik qallariyninmantapuni kusikuyllawanña ruwasqaykichikta, kapususqaykichikman hinayá qoychik.

¹² Pipas cheqapta qoyta munaptinqa, kapuqninman hina qosqan ofrendatam Diosqa chaskinqa. Diosqa manam mañanchu mana kapuqniyuqmantaqa.

¹³ Manam kayqa hukkunata yanapaspa muchuypi kanaykichikpaqchu, aswanqa igualla kanaykichikpaqmi.

¹⁴ Kunanqa kapuqniyuqmi kachkankichik mana kapuqniyuqkunaman qoykunaykichikpaq, hukpiñataqmi qamkunapa mana kaptin yanapasunkichik, chaynapi igualla kanaykichikpaq.

¹⁵ Chuya Qellqam nin: Achka huñuqpapas manam puchurqachu nitaqmi aslla huñuqpapas pisirqachu, nispa.

Titomantawan llamkaqmasinkunamanta

¹⁶ Diosmanmi graciasta qoni nanachikusunaykichikpaq Titomanpas allin sonqota ñoqaman hina qosqanmanta.

¹⁷ Paymi kunakuy qosqayta chaskirqa, hinaspam qamkunamanta sinchita llakikuspan kikillanmanta hamuchkan.

¹⁸ Titotawan kuskatam huk iñiqmasin-chikta kachamuchkaniku, paypas iñiqkuna ukupiqa Cristomanta willakusqanrayku allin reqsisqam.

¹⁹ Manataqmi chaylla-chu, iglesiakunapas paytam akllarqaku yanapakuy ofrendata apaptiyku riysiwanankupaq, chaytaqa ruwachkaniku Señorta hatunchanaykupaq hinaspa kusikuywan yanapasqaykuta qawanankupaqmi.

²⁰ Manam munanikuchu kay achka ofrenda huñusqaykumanta yanqakuna rimawanankuta.

²¹ Allin ruwaytam munachkaniku Señorpa qayllanpipas chaynataq runakunapa qayllanpipas.

²² Paykunawan kuskatam huk iñiqmasinchikta kachamuchkaniku, payqa sapa kutillam kusikuywan ruwaq kasqanta qawachikurqa, kunanñataqmi qamkunapi llumpayta confiakusqanrayku aswan-aswanraq ruwayta munachkan.

²³ Titoqa puriqmasiymi hinaspa qamkuna ukupi llamkaqmasiymi. Chay wakin wawqekunañataqmi iglesiakunapa kachamusqan, paykunaqa Cristota hatunchaqkunam kanku.

²⁴ Chaynaqa, iglesiakuna yachananpaqyá kuyakuynikichikta qawachiychik, qawachiychiktaqyá qamkunamanta alabakusqayqa cheqap kasqantapas.