2~Corintios 7 - CHUYA QELLQA La Biblia en Quechua de Ayacucho 2012

¹ Kuyasqay wawqe-panillaykuna, chayna promesakuna kachkaptinqa aychanchikpi hinaspa espiritunchikpi tukuy mana allinmantayá chuyanchakusun, Diosta kasukuspayá aswan-aswan payllapaqña sapaqchakusun.

Corinto llaqtapi kaqkunapa wanakusqanmanta

² Tukuy sonqoykichikwanyá chas-kiykuwayku, manam pitapas imanarqanikuchu, huchallichirqanikuchu, nitaq engañarqanikuchu.

³ Kaytaqa manam qamkunata acusaspaychu nichkaykichik, nisqaypi hinapas qamkunaqa sonqoyku-pim kachkankichik, kuska kawsana-paqpas otaq wañunapaqpas.

⁴ Ancha confianzawanmi qamkunata rimapayamuykichik, qamkunamantam llumpayta alabakuni, ñakarisqaykupipas kallpanchasqa hinaspa kusisqam kaniku.

⁵ Macedoniaman chayamusqaykumantam ñoqaykuqa mana samarqanikuchu, kaypi chaypim sasachakuypi karqaniku, cuerpoykupim ñakarirqaniku, sonqoykupiñataqmi manchakurqaniku.

⁶ Ichaqa llakisqakuna kallpanchaq Diosmi Titopa chayamusqanwan kallpanchawarqaku.

⁷ Manam paypa chayamusqallanwanchu kusikurqanikuqa, aswanqa Titotapas kallpanchasqaykichikwanmi. Paymi qamkunapa kuyawasqaykichikmanta chaynataq llakikuspa rikuykuy munawasqaykichikmanta willawarqa. Chaykunata yachaykuspaymi aswanraq kusikurqani.

⁸ Carta apachimusqaywan llakisqaña kaptikichikpas manam ñoqaqa pesa-kunichu, ñawpaqtam ichaqa carta apachimusqaymanta pesakurqani pisi tiempollapas llakichisqaymanta,

⁹ kunanqa kusikuni, manam llakis-qa kasqaykichikmantachu aswanqa wanakusqaykichikmantam, llakisqaqa karqankichik Diospa munasqanman hinam, chaynaqa manam ñoqaykuchu llakichirqaykiku.

¹⁰ Diospa munasqanman hina llakikuyqa huchanchikmanta wanakuymanmi apawanchik, chaynapi salvasqa kanan-chikpaq, chaynaqa manam ñakakunanchikchu. Runakunapa munasqanman hina llakikuymi ichaqa wañuyta apamun.

¹¹ Qamkunaqa Diospa munasqan-man hinam llakisqa karqankichik, chay llakikuyqa kaykunatam apamun: Mayna nanachinakuytam munarqankichik, mayna arreglo ruwaytam munarqankichik, maynatam mana allinpa contranpi piñakurqankichik, maynatam manchakurqankichik, mayna kuyakuqmi kankichik, maynatam sientikurqankichik, maynatam castigo ruwayta munarqankichik. Kay asuntokunawanmi mana huchayuq kasqaykichikta qawachikurqankichik.

¹² Cartata apachimuspayqa manam piensarqani chay huchallikuq runapichu nitaq llakichisqa runapichu, piensarqaniqa ñoqaykumanta llakikuwasqaykichik otaq mana llakikuwasqaykichikpas Diospa qayllanpi yachasqa kananpaqmi.

¹³ Chaywanmi consuelasqa karqaniku. Kay kusikuy chaskisqaykumantapas, Titopa kusisqa kasqanwanmi aswantaqa kusikurqaniku. Llapallaykichik paypa sonqonta kallpanchasqaykichik-manta.

¹⁴ Titoman willaspa qamkunamanta alabakuspayqa manam penqakurqanichu. Aswanqa tukuy ima qamkunamanta payman nisqaykuqa cheqapmi, cheqaptaqmi Titoman qamkunamanta alabakusqaykupas.

¹⁵ Payqa aswanraqmi kuyasunkichik qamkunapa kasukusqaykichikta hinaspa respetaspa manchakuywan chaskisqaykichikta yuyarispa.

¹⁶ Qamkunaraykum tukuy imapi anchata confiakuspay kusikuni.