2~Corintios 6 - CHUYA QELLQA La Biblia en Quechua de Ayacucho 2012

¹ Qamkuna yanapaq kasqaykuraykum ruegakamuykiku, amayá Diospa kuyakuynintaqa yanqaqa chaskiychikchu.

² Paymi nin: “Chaskina tiempopim uyarirqayki, salvanay punchawpim yanaparqayki”, nispa. Kunanqa chaskina tiempoñam, kunanqa salvanan punchawñam.

³ Imapas ruwasqaykuwanqa manam pitapas urmachiyta munanikuchu, chaynapi llamkasqayku mana penqaypi kananpaq.

⁴ Aswanqa lliwpim Dios serviq kasqaykuta qawachikuniku, pacienciakuspa, ñakarispa, muchuykunapi kaspa, sasachakuykunata aguantaspa,

⁵ azotesqa, carcelasqa, chaqwakunapi, sasa llamkaypi, mana puñusqa hinaspa yarqaymanta.

⁶ Chaynataq chuyanchakuspayku, cheqap kaqta reqsispayku, pacienciakuspay-ku, sumaq sonqo kaspayku, Chuya Espirituyuq kaspayku, cheqapta kuyaspayku,

⁷ cheqapta willakuspayku hinaspa ichoqmanpas alleqmanpas Diospa atiyninwan allin kaqta ruwaspa defiendekuniku.

⁸ Hukpim alabasqa kaniku, hukpiñataqmi cheqnisqa, hukpim ñoqaykumanta allinta rimanku, hukpiñataqmi mana allinta, cheqapta rimachkaptiykupas llullakuqpaqmi hapiwanku.

⁹ Reqsisqa kachkaptiykupas mana reqsisqapaqmi hapiwanku, wañusqapaqñam hapiwanku, ichaqa kawsachkanikuraqmi, maqawaptinkupas manaraqmi wañunikuraqchu.

¹⁰ Llakisqallaña kaspapas llumpay kusisqam kaniku, wakcha kaspapas achkaqtam apuyachiniku, mana imayuq kachkaptiykupas tukuy imaykum kapuwachkanku.

¹¹ Corintopi kaq wawqe-panikuna, sonqoykuta kicharispam kaytaqa cheqap kaqta nimuykiku.

¹² Ñoqaykuqa tukuy sonqoykuwanmi kuyaykiku, qamkunam ichaqa mana chaynatachu kuyawankiku.

¹³ Imaynam churinta huk tayta ruegachkaq hinam ruegakuykichik, imaynam kuyasqayman hinayá qamkunapas sonqoykichikta kichariwaychik.

Iñiqkunapi kawsaq Diospa yachasqanmanta

¹⁴ Amayá kuskanchakuychikchu Señorpi mana iñiqkunawanqa, mana tupaqnintin yunta watarusqa hinam kawaqchik. Allin ruwaqqa manam kuskanchakunmanchu huchallapi puriqkunawanqa, nitaqmi achkiypas kuskanchakunmanchu tutayay-manqa.

¹⁵ Cristoqa manam diablowanqa hukllawakunmanchu, nitaqmi Diospi iñiqpas mana iñiqwanqa hukllawakunmanchu.

¹⁶ Diospa templonwan idolokunapa templonqa manam kaqkamallaqa kanmanchu. Ñoqanchikqa kawsaq Diospa templonmi kanchik, kikin Diosmi nirqa: “Paykuna ukupim yachasaq, paykuna ukupim purisaq, paykunapa Diosninmi kasaq, paykunañataqmi llaqtay kanqaku”, nispa.

¹⁷ Señorqa nintaqmi: “Paykuna ukumantayá lloqsiychik, paykunamantayá sapaqchakuychik, amayá millakuypaq kaqkunataqa hapiychikchu. Hinaptinqa qamkunataqa chaskisqaykichikmi.

¹⁸ Ñoqam qamkunapaq Taytaykichik kasaq, qamkunañataqmi churiykuna kankichik. Tukuy Atiyniyuq Señormi chaynata nin”.