2~Corintios 3 - CHUYA QELLQA La Biblia en Quechua de Ayacucho 2012

Musoq contrato willakuqkunamanta

¹ Kayta nispaykuqa manam kikiykutachu alabakuchkaniku nitaqmi wakinkuna hinachu recomendación cartataraq qamkunaman qawachisqaykiku, nitaqmi recomendación cartatachu mañakusqaykiku.

² Recomendación cartaykuqa qamkunam kankichik papelpi hina sonqoykupi qellqasqa, chaynapi llapallan runakuna leespanku yachanankupaq.

³ Qamkunaqa kankichik Cristopa cartasqan hinam, ñoqaykuñataqmi chay carta apaqkuna kaniku. Chay cartaqa manam tintawan qellqasqachu, aswanqa kawsaq Diospa Espiritunwanmi, qellqasqaqa kachkan manam rumi labrasqapichu aswanqa runapa sonqonpim.

⁴ Chaynataqa rimariniku Cristontakama Diospi confiakuspaykum.

⁵ Manam ñoqaykuqa kikiykumanta ruway atiq hinachu, aswanqa tukuy ima ruwanaykupaq yachayqa Diosmantam hamun.

⁶ Paymi allinta yachachiwarqanchik imaynam musoq pactoman hina servikunanchikpaq. Manam qellqasqa leyman hinallachu aswanqa Espirituman hinam. Qellqasqa leyqa wañuymanmi apakun, Espiritum ichaqa kawsachikun.

⁷ Diospa leyninqa palta rumipi qellqasqa kachkaspapas ancha atiyniyuqmi karqa, chaymi Moisesman qosqa kaptin, Israel runakunaqa Moisespa uyan sinchita achkirisqanrayku mana qawaytapas atirqakuchu. Chay leyqa atiyniyuq kachkaspapas chinkaruqllam karqa.

⁸ Ichaqa, ¡mayna achkiriywanraq Chuya Espiritupa kawsay qowasqanchikqa hamunqa!

⁹ Condenawaqninchik leypas achkiriyniyuq kachkaptinqa, ¡maynataraq pampachaykuymanta allin noticia willakuyqa achkirinqa!

¹⁰ Ñawpaq kaq achkiyniyuq leyqa manam imallanpipas kunan kaq sumaqllaña achkiriy willakuywanqa tupanchu.

¹¹ Chinkaruqlla leypas achkiriyniyuq kachkaptinqa aswan sumaqllañam kanqa wiñaypaq kaq allin noticia willakuyqa.

¹² Confianzawan suyasqaykuraykum mana manchakuspa willakuniku.

¹³ Ñoqay-kuqa manam Moisés hinachu ruwachkaniku payqa uyantam velowan tapakurqa, chinkaruqlla achkiyta Israel runakuna mana rikunankupaq.

¹⁴ Paykunaqa manam entiendeyta atirqakuchu, kunanpas ñawpaq pactota leeptinkum yuyayninkuqa velowan tapasqa hina kachkan mana entiendenankupaq, chay tapaqninkuqa manaraqmi hurqosqaraqchu, chaytaqa Cristollam hurqonqa.

¹⁵ Kunankamapas Moisespa libronta leespankuqa manam entiendenkuchu yuyaymanayninku velowan tapasqa kasqanrayku.

¹⁶ Señorman pipas kutirikuptinmi ichaqa chay tapaqnin velo hurqosqa kanqa.

¹⁷ Señorqa Espiritum, maypim Se-ñorpa Espiritunpa kasqanpiqa runaqa libreñam.

¹⁸ Ñoqanchikpas uyanchik manaña velowan tapasqa kaptinmi Señorpa sumaqllaña kayninwan huk espejo hina achkirinchik. Ñoqanchikqa Cristomanñam aswan-aswan rikchakuchkanchik, paypa achkiriyninpas sapa kutim ñoqanchikpi kachkan. Chaytaqa Señormi ruwachkan. Payqa Espiritum.