2~Corintios 13 - CHUYA QELLQA La Biblia en Quechua de Ayacucho 2012

Tukupay consejonkunamanta

¹ Kaywanqa kimsa kutitañam watukamusqaykichik. Ima problema kaqpas iskay otaq kimsa testigopa nisqanman hinam allichasqa kanqa.

² Ñawpaqta hamuspaymi huchapi purikuqkunata anyarqani, kunanpas mana chaypi kachkaspaypas huchapi puriqkunataqa llapallantam anyamuni. Huktawan watukamuspayqa chay runakunataqa castigasaqpunim.

³ Chaynataqa ruwasaq rimachiwaqniyqa Cristopuni kasqanta yachanaykichikpaqmi. Qamkunawan kaq Cristoqa manam pisi kallpayuqchu kachkan, aswanqa qamkuna ukupim atiyninta qawachikun.

⁴ Cheqaptam mana atiyniyuq hina chakatasqa karqa, kunanmi ichaqa Diospa atiyninwan kawsachkan, chaynam ñoqaykupas Cristowan hukllawasqa kaspa mana atiyniyuq hina kachkaniku, ichaqa Diospa atiyninwanmi kawsachkaniku qamkunata servinaykupaq.

⁵ Sonqoykichikta tapukuykuychik, ¿cheqaptachu iñiynikichikpi takyachkankichik? Sumaqta tapukuychik ¿Manachu musyakunkichik sonqoykichikpi Jesucristo kasqanta? Diospa mana chaskisqan kaspallachá manaqa yachawaqchikchu.

⁶ Ñoqaykumantam ichaqa yachankichik Diospa chaskisqan kasqaykuta.

⁷ Diostam mañakuchkaniku mana allin kaqkunata ama ruwanaykichikpaq, chaytaqa munachkaniku manam chaskisqa kasqaykuta yachanaykichikpaqchu, aswanqa allin kaqkunata ruwanaykichikpaqmi, ñoqaykuta Dios manaña chaskiwaptinkupas.

⁸ Cheqap kaqpa contranpiqa manam imatapas ruwaymankuchu, aswanqa cheqap kaqpa allinninpaqmi ruwachkaniku.

⁹ Chaymi mana kallpayuq kaspaykupas, qamkunañataq kallpayuq kasqayki-chikmanta kusikuchkaniku, aswanraq-mi Diosta mañakuchkaniku mana huchayuqña kanaykichikpaq.

¹⁰ Kay cartatam qellqamuchkaykichik qamkunaman manaraq hamuchkaspay, chaynapi chayamuspayqa manaña qaqchanaypaq, Señorpa atiy qowasqanqa qamkunata wiñachinaypaqmi, manam tuñichinaypaqchu.

Cartapa tukupayninmanta

¹¹ Wawqe-panillaykuna, kusisqa kawsanaykichiktam munani, chuya kawsaytayá maskaychik. Kallpanchanakuspaykichikyá huk sonqolla hinaspa hawkalla kawsakuychik, chayna kaptinqa kuyakuq hinaspa hawkayay qokuq Diosmi qamkunawan kanqa.

¹² Llapallaykichikyá chuya muchakuywan rimaykanakuychik.

¹³ Kaypi kaq llapallan wawqe-panikunapas rimaykamusunkichikmi.

¹⁴ Chaynaqa, Señor Jesucristopa kuyakuyninwan, Dios Taytapa kuyapayakuyninyá hinaspa Chuya Espiritupa kallpanchakuyninyá llapallaykichikwan kachun.