2~Corintios 12 - CHUYA QELLQA La Biblia en Quechua de Ayacucho 2012

Pablopa revelacionninkunamanta

¹ Imatataq hurqokusaq kikiymanta alabakuspayqa. Aswanqa Señorpa qawachiwasqan musqoymantawan revelacionmantam willasqaykichik.

² Reqsinim Cristopi iñiq huk runata, paymi chunka tawayuq wata qepata kimsa kaq cieloman apasqa karqa. Ichaqa cuerpopichuch otaq espiritupichuch apasqa kanman karqa, manam chaytaqa yachanichu; Diosllam chaytaqa yachan.

³ Chay runataqa reqsinim, cuerpopichuch otaq espiritupichuch apasqa kanman karqa, manam yachanichu, Diosllam chaytaqa yachan.

⁴ Paraisoman apasqam karqa, chaypim runapa mana rimay atinan palabrakunata uyarimurqa.

⁵ Chay runamantam ñoqaqa alabakusaq, ichaqa manam kikiymantaqa alabakuymanchu, aswanqa mana kallpayuq kasqaymantam alabakusaq.

⁶ Alabakuyta munaspayqa manam locoyachkanichu, ñoqaqa cheqapllatam rimachkani, ichaqa manam alabakusaqchu, chaynapi qawaqniykuna hinaspa uyariwaqniykuna mana aswanraq imatapas ñoqamanta piensanankupaq.

⁷ Chay rikusqay suma-sumaq revelacionmanta mana hatun tukunaypaqmi, kichkapa tipakuyninta hina aychaypi qowarqa, chayqa karqa ñakarichiwananpaq Satanaspa kachamusqan toksikuq puyam.

⁸ Chay ñakariyta qechuwananpaqmi kimsa kutikama Señorta mañakurqani.

⁹ Hinaptinmi Señor niwarqa: Kuyakuyniypiyá contentakuy, atiyniyqa mana kallpayuq runakunapim qawachikun, nispa. Chaymi mana kallpayuq kasqaymanta kusikuywan alabakuni, chaynapi Cristopa atiynin ñoqapi takyananpaq.

¹⁰ Chayraykum kusisqa kani mana kallpayuq kaspaypas, kamisqa kaspaypas, mana imayuq kaspaypas, ñakarichisqa kaspaypas hinaspa sasachakuykunapi kaspaypas. Mana kallpayuq kachkaspaypas aswan kallpayuqraqmi rikuriykuni.

Corinto llaqtapi iñiqkunamanta Pablopa llakikusqanmanta

¹¹ Qamkuna alabawanaykichik kachkaptinmi, loco hina kikillaymanta alabakurqani, ichaqa qamkunam chayta ruwachiwarqankichik. Ñoqaqa mana valeqña kaspaypas chay hatu-hatun apostolkunamantaqa manam menoschu kani.

¹² Qamkunawan kaspaymi reqsichikurqaykichik cheqap apóstol kasqayta, chaymi pacienciakuspa Diospa atiyninwan ruwarqani admirakuypaq milagrokunata.

¹³ Qamkunaqa manam wakiq iglesiakunamantaqa menoschu karqankichik, menosqa karqankichik imatapas qamkunamanta mana mañakusqallaypim. ¡Qamkunata imapipas pantaptiyqa pampachaykuwaychik!

¹⁴ Kunanqa chayllam kachkani kimsa kutipiña watukaykamunaypaq, ichaqa manam imatapas mañakusqaykichikchu. Manam imapas kapuqnikichik kaqtachu maskani, aswanqa qamkuna maskaqmi hamuni. Tayta-mamankunam churinkunapaqqa qollqeta huñun, manam churinkunachu tayta-mamankupaqqa.

¹⁵ Munasqayman hinam kapuqniykunata gastasaq, qamkunaraykuqa kallpaytapas gastasaqmi. Manam imananchu llumpayta kuyachkaptiypas qamkunañataq pisilla kuyawaynikichikqa.

¹⁶ Cheqaptapunipas qamkunaqa ya-chankichikmi ñoqaqa mana gastachiqnikichik kasqayta, wakiqninkuñataqmi ninku sakri kayniywan trampaman wichiykachisqayta.

¹⁷ ¿Icha pipas kachamusqaywanchu engañarurqaykichik?

¹⁸ Titotam mañakurqani huk wawqepiwan watukamusunaykichikpaq. Hinaptinqa, ¿icha Titochu engañarusurqankichik? ¿Manachum iskayniyku hina chaynallata kawsarqaniku?

¹⁹ Kuyasqay wawqe-panillaykuna, ¿ichapas yuyaymanachkankichik ñoqaykuqa qayllaykichikpi pampachakuy mañakusqaykuta? Ñoqaykuqa Diospa qayllanpim Cristopa sutinpi rimachkaniku, tukuy chay rimasqaykuqa iñiynikichikpi wiña-naykichikpaqmi.

²⁰ Qamkunaman ha-muspayqa ichapas mana sonqoypaq hinachu tariramuykichikman, ñoqapas icha mana sonqoykichikpaq hinachu karuyman. Manchakuchkanim qamkuna ukupi: Liryanakuykuna, envidianakuykuna, piñanakuykuna, kikillanpaq munaq kaykuna, rakinakuykuna, cuento qepi kaykuna, pipapas qepanpi rimaykuna, hatun tukuq kaykuna hinaspa chaqwanakuykuna kananmanta.

²¹ Manchakuchkanitaqmi huktawan hamuptiy Diosniy qamku-napa rantikichikpi penqayman churawananmanta, chaynata tariykamuspayqa waqasaqchá. Ñawpaqmantaraqmi mana wanakuspa hinallaraq huchallikuchkankichik. Qamkunaqa manaraqmi wanakunkichikraqchu qanra vidaykichikmanta, waqllikuymanta hinaspa viciokunapi puriykunamantapas.