2~Corintios 1 - CHUYA QELLQA La Biblia en Quechua de Ayacucho 2012

Cartapa qallariyninmanta

¹ Diospa munayninman hina Jesu-cristopa apostolnin ñoqa Pablom, wawqenchik Timoteopiwan, Corinto llaqtapi Diospa iglesiaman hinaspa Acaya lawpi kaq iñiqkunaman qellqa-muykiku.

² Dios Taytanchikyá Señor-ninchik Jesucristopiwan kuyakuynintawan hawkayayninta qosunkichik.

Pablopa ñakarisqankunamanta

³ Señor Jesucristopa Taytan Dios-ninchikyá qapaqchasqa kachun, payqa llakipayakuq Taytam hinaspa sonqo tiyachiq Diosmi.

⁴ Paymi tukuy sasachakuyninchikpi kallpanchawanchik, chaynapi ñoqanchikpas sasachakuypi kaqkunata Diospa kallpanchawasqanchikman hina kallpanchananchikpaq.

⁵ Jesucristoraykum llumpayta ñakarinchik, hina paynintakamallataqmi sinchi kallpanchakuytapas chaskinchik.

⁶ Ñoqay-ku ñakariptiykuqa qamkunam kallpanchasqa hinaspa salvasqa kankichik, sichum Dios kallpanchawaptinkuqa qamkunapas kallpanchasqa kaspam salvasqa kankichik, chaynapi imaynam ñakarisqaykuta hina, qamkunapas ñakarispaykichik pacienciakuspa allinta takyanaykichikpaq.

⁷ Qamkunapim llumpayta confiakuniku, yachanikum ñakariqmasiyku kasqay-kichikta, yachanikutaqmi llakipayasqamasiyku kasqaykichiktapas.

⁸ Wawqe-panillaykuna, Asia lawpi ñakarisqaykumantam yachanaykichikta munaniku. Chaypim hatu-hatun sasachakuypi karqaniku, manaña kallpaykupas kanankama, manañam kawsaytapas piensarqanikuñachu.

⁹ Wañuypa patanpiñam karqaniku, kaykunam ichaqa yachachiwarqaku mana kikillaykupi hapipakuq kanaykupaq, aswanqa wañuqkuna kawsarichiq Diosllamanña hapipakuyta yachanaykupaq.

¹⁰ Wañuymantapas Diosmi librawarqaku, paytaqmi qepatapas librawanqaku. Confiakuchkanikutaqmi hamuq punchawkunapipas librawanankuta.

¹¹ Sichum qamkuna ñoqaykupaq Diosta mañakuspa yanapawaptikikuqa. Sichum ñoqaykupaq Diosta achkaq mañakuptinkuqa, achkaqtaqmi Diosmanta gra-ciasta qonqaku tukuy imapas chaskis-qaykumanta.

Corinto llaqtaman Pablopa mana riy atisqanmanta

¹² Kaywanmi kusisqa kachkaniku, ñoqaykuqa kay pachapipas chaynataq qayllaykichikpipas allintam kawsarqaniku. Diosmi yanapawarqaku mana engañakuspa payllapaqña kawsanaykupaq, chaynataqa kawsarqaniku manam yachayniyuq kasqaykuraykuchu.

¹³ Cartakuna apachimusqaykuqa manam leespa sasa entiendeychu, aswanqa entiendenaykichikpaq hinallam, ima allincha kanman lliwta entiendeptikichikqa.

¹⁴ Wakintaqa entienderunkichikñam, Señor Jesuspa kutimusqan punchawmi ñoqaykumanta kusisqa kankichik, chaynallataqmi ñoqaykupas qamkunamanta kusikusaqku.

¹⁵ Kay confianzawanmi puntata qamkuna watukuq hamuyta munarqani, chaynapi ristinpas hinaspa kutimustinpas yanapaykunaypaq.

¹⁶ Macedonia lawman riq hinam qamkuna watukuy-kuyta munarqani, chaynataqmi kuti-mustinpas watukuykuytataq munarqani, chaynapi Judea lawman rinaypaq yanapaykuwanaykichikpaq.

¹⁷ Chay piensasqayqa ¿manachum allin karqa? ¿Mana iñiq runa hinachu ruwarqani? ¿Arí, niruchkaspaychu “Manam” nirqani?

¹⁸ Diosqa sumaqtam yachan qamkunaman imam kaq nisqaykutaqa.

¹⁹ Silvanopa, Timoteopa hinaspa ñoqapa qamkunaman willasqay Diospa Churin Cristo Jesusqa manam “Arí” nirqachu nitaq “Manam” nirqachu. Cristopiqa lliwmi “Arí” niylla.

²⁰ Paypim Diospa llapallan prometesqankunaqa cumplikun, chaymi Diosta alabaspa Cristo Jesusnintakama “Amén” ninchik.

²¹ Diosmi ñoqaykutapas chaynataq qamkunatapas Cristopi qaqa hina sayaqta ruwawarqanchik, hinaspam sapaqchawarqanchik payllapaqña kawsananchikpaq.

²² Paytaqmi sellowan marcawarqanchik hinaspa Chuya Espiritutapas sonqonchikman garantiata hina qoykuwarqanchik.

²³ Ichaqa almayraykum Diosta tes-tigopaq churani, qamkunata llakipayaspaymi Corinto llaqtamanqa manaraq hamurqaniraqchu.

²⁴ Ñoqaykuqa manam iñisqaykichikpi munaychakuytachu munachkaniku, munachkanikuqa kusisqa kanaykichikpaq yanapaykuytam, qamkunaqa qaqa hinañam iñisqaykichikpi sayachkankichik.