1~Timoteo 3 - CHUYA QELLQA La Biblia en Quechua de Ayacucho 2012

Iñiqkuna nanachikuqkunamanta

¹ Cheqapmi kayqa: “Iñiqkuna nana-chikuyta pipas munaspanqa, allin llamkaytam munachkan”.

² Iñiqku-namanta nanachikuqqa kanan: Mana pipapas anyananmi, huk warmiyuqllam, imamantapas controlakuqmi, allin yuyaywan imapas ruwaqmi, allichakuyninpas kanan allinmi, visitakuna allin chaskiykuqmi, allin yachachikuqmi,

³ upyakuykunapi mana purikuqmi, peleollapi mana purikuqmi, pacienciakuqmi, mana atipanakuqmi, qollqellaman mana qokuruqmi.

⁴ Chayna runaqa wasinpi kaqkunatam allinta kamachinan, churinkunatam allinta yachachinan kasukuq hinaspa respetakuq kanankupaq.

⁵ Wasinpipuni kamachikuyta mana atichkaspaqa ¿imaynataq Diospa iglesiantaqa nanachikunman?

⁶ Chayllaraq iñikuq runaqa manam iñiqkunamanta nanachikuqqa kanmanchu, yanqañataqmi hatun tukuruspan diablo hina castigasqa kanman.

⁷ Iñiqkuna nanachikuqtaqa mana iñiqkunapas lliwmi respetananku. Mana chayqa paymanta mana allinta rimaptinkum paypas diablopa pantachikuyninman urmaykunman.

Diaconokunamanta

⁸ Diaconokunapas kananku allin respetana runakunam, mana yanqakuna rimaqkunam, tomaykunapi mana purikuqkunam hinaspa mana yanqamanta qollqe ganay munaqkunam.

⁹ Paykunaqa creesqanchik cheqap kaqpim hapipakunanku, hinaspam chuya concienciayuq kawsananku.

¹⁰ Puntataqa allin otaq mana allin kawsasqantayá pruebaychik, sichum allin kasqanta qawaykuspaykichikqa diácono kananpaqyá churaychik.

¹¹ Warmikunapas kachunku, allin respetanapaq hina, ama cuento qepichu, imamantapas allin yuyaywan kawsakuq hinaspa tukuy imapas ruwayman churaq.

¹² Diaconokunaqa huk warmiyuqllam kananku, paykunaqa wasinpi kaqkunatawan chaynataq churinkunatapas allintam kamachinanku.

¹³ Diaconokuna allinta llamkaspankuqa runakunapa allinpaq qawasqanmi kanqaku, chaynapim aswan confianzawanraq willakunqaku Jesucristoman imaynam iñikusqankumanta.

Imaynam Diosman iñikusqanchikmanta

¹⁴ Kay cartatam qellqamuchkayki, ichaqa chayllam qam watukaykamuyta munachkani,

¹⁵ sichum unaramuptiyqa yachaytaqyá imaynam Diospi iñiqkunapa qayllanpi allin kawsayta. Paykunaqa kawsaq Diospa wasin hinam kachkanku, wasipa pilarnin hina kaspankum cheqap kaqta takyachichkanku.

¹⁶ Mayna hatunmi Diosman iñinanchikpaq pakasqa kaqkuna qawachiwasqanchikqa: “Diosmi runayarurqa, Espíritu yanapaptinmi acusaqninkunata vencerqa, payqa angelkunapa qawasqanmi karqa, llapallan nacionkunapim willakusqa karqa, kay pachapi kaqkunapa iñisqanmi karqa, hanaq pachapipas chaskisqam karqa”.