1~Timoteo 2 - CHUYA QELLQA La Biblia en Quechua de Ayacucho 2012

Diosta hatunchanamanta

¹ Imamantapas puntataqa kaytam nimuykichik, llapallan runakunapaqmi Diosta mañakunaykichik, orakunaykichik, ruegakunaykichik hinaspa agradecekunaykichik.

² Mañakunaykichiktaqmi lliw reykunapaqwan kamachikuqkunapaqpas, chaynapi allinlla, hawkalla, allin sonqoyuq hinaspa allinpaq qawasqa kawsananchikpaq.

³ Kayqa allinpunim hinaspa salvaqninchik Diospa allinpaq qawasqanmi.

⁴ Diosninchikqa munachkanmi llapallan runakuna salva-kunankuta hinaspa cheqap kaq reqsinankuta.

⁵ Hukllam Diosqa, hukllataqmi Dioswan runakunata allinyanachiqpas, chay allinyanachiqqa Jesucristom.

⁶ Paymi llapallanchikta salvawananchikpaq kikinmanta entregakurqa hinaspam rantinchikpi wañupuwarqanchik. Kayku-natam Dios reqsichiwanchik munasqan tiempopi.

⁷ Chaypaqmi Dios akllawarqa apostolnin kaspay mana judío kaq runakunaman Jesucristomanta willakamunaypaq. Paykunatam yachachichkani cheqap yachachikuykunata hinaspa imaynam iñinankuta. Ñoqaqa cheqaptapunim rimachkani, manam llullakunichu.

⁸ Ñoqam munachkani tukuy hinastinpi kaq runakuna makinkuta hoqaris-panku Diosta chuya sonqolla mañaku-nankuta, chaytaqa ruwachunku ama piñakuspa hinaspa ama atipanakuspa.

⁹ Warmikunapas humildad-wanyá pachakuchunku, allichapakuspapas allin yuyaywanyá allichakuchunku, ñaqchakuspapas amataqyá achalapakuchunkuchu, amataq llumpay precioyuq qorimanta, perlasmanta alhajakunawanpas nitaq llumpay precioyuq pachawanpas churakuchunkuchu.

¹⁰ Aswanqa allin kaqkunata ruwaspayá Diosta hatunchaq warmikuna hina qawachikuchunku.

¹¹ Warmikunaqa yachachikuyta upallalla uyarichunku, tukuy imapi kasukuspa.

¹² Warmitaqa manam munanichu huñunakuykunapi yachachinantaqa, nitaq qaripi munaychakunantapas, aswanqa upallallayá uyarichun.

¹³ Puntataqa Adantam Dios unancharqa, chaymantañam Evataqa.

¹⁴ Maqta uruqa manam Adantachu engañarurqa, aswanqa Evatam, chaynapim Evaqa huchallikururqa.

¹⁵ Chaymi warmiqa wachakuspa hinaspa wawankunata allinta uywaspa, iñiyninpi takyaspa kuyakuq kaspa hinaspa chuyanchakuspan salvakunqa.