1~Tesalonicenses 5 - CHUYA QELLQA La Biblia en Quechua de Ayacucho 2012

¹ Wawqe-panillaykuna, tiempokunamantawan punchawkunamanta qellqamunaytaqa manam necesitankichikñachu.

² Yachasqaykichikpi hinapas mana yachasqanchik punchawpim Señorqa hamunqa, payqa hamunqa tutallan suwa hamuchkaq hinam.

³ Hawkam, segurom kachkanchik, nispa, runakuna nichkaptinkum qonqayllamanta paykunaman hatun sasachakuy chayaramunqa, dolorwan hapichikuq warmi hinam kanqaku, manam lluptinqakuchu.

⁴ Wawqe-panillaykuna, qamkunaqa manam tutapichu kachkankichik, Señorpa hamunan punchaw suwa hina tarimusunaykichikpaqa.

⁵ Qamkunaqa achkiypa hinaspa punchawpa churinkunam kankichik, manam tutayaymanta kaqchu.

⁶ Chaynaqa, amayá wakinkuna hinachu puñusun, aswanqa rikchan-rikchanllayá kasun.

⁷ Puñuqkunaqa tutam puñunku, sinkaqkunapas tutataqmi sinkanku.

⁸ Punchawmanta kaqkunaqa cuidakusunchik, soldadopa qasqon harkaqwan churakuq hinayá iñiyninchikwan chaynataq kuyakuyninchikwan harkachikusun, salvasqa kasqanchikyá harkawaqninchik casconchik kachun.

⁹ Diosqa manam castigopaqchu churawarqanchik, aswanqa Jesucristontakama salvasqa kananchikpaqmi.

¹⁰ Jesucristom ñoqanchikrayku wañurqa, chaynapi kawsaspapas otaq wañuspapas paywan kuska kananchikpaq.

¹¹ Chaynaqa, kunan ruwasqaykichikpi hinayá kallpanchanakuychik hinaspa yanapanakuychik.

Iñiqkunata Pablo kallpanchasqanmanta

¹² Wawqe-panillaykuna, ruegakamuy-kichikmi qamkuna ukupi llamkaqkunapaqyá reqsikuynikichik kachun, paykunaqa Señorpa rantinpim kama-chisuchkankichik hinaspa conseja-suchkankichik.

¹³ Paykunataqa llam-kasqankuraykuyá sinchita kuyaychik. Qamkunapurapas hawkallayá kawsa-kuychik.

¹⁴ Wawqe-panillaykuna, ruegakamuy-kikum qellakunatapas qaqchanaykichikpaq, hukmanyasqakunatapas kallpanchanaykichikpaq, mana kallpayuqkunatapas yanapanaykichikpaq hinaspa llapallanwanpas pacienciakunaykichikpaq.

¹⁵ Amayá pipas mana allin ruwaqnintaqa mana allinwanqa kutichikuchunchu, qamkunapuraqa tukuy tiempoyá allin kaqkunata ruwaychik, chaynatayá llapallanwanpas ruwaychik.

¹⁶ Tukuy tiempoyá kusisqa kaychik.

¹⁷ Diostayá tukuy tiempo mañakuychik.

¹⁸ Cristo Jesuspi kasqaykichikraykuyá tukuy imamanta Diosman graciasta qoychik, chaynatam Diosqa munan.

¹⁹ Chuya Espiritutaqa amayá ama-chaychikchu.

²⁰ Amataqyá profeciakunatapas despreciaychikchu.

²¹ Tukuy ima profetizasqankutapas pruebaspayá allin kaqta waqaychaychik,

²² tukuy mana allin kaqkunamantayá raki-kuychik.

²³ Hawkayay qokuq kikin Diosnin-chikyá espirituykichikta, almaykichik-ta hinaspa cuerpoykichikta lliwta chuyanchachun, mana huchayuqta-ñayá waqaychasunkichik Señorninchik Jesucristo hamunankama.

²⁴ Qayasuq-nikichikqa confiakunapaqmi, chayraykum payqa kaykunata ruwan.

²⁵ Wawqe-panillaykuna, ñoqaykupaqpas Diostayá mañakuychik.

²⁶ Llapallan wawqe-paninchikkunatayá chuya muchakuywan rimaykuychik.

²⁷ Señorpa sutinpim kamachikichik, llapallan iñiqkunapaqyá kay cartata leeychik.

²⁸ Señorninchik Jesucristopa kuyakuyninyá qamkunawan kachun. Amén.