1~Tesalonicenses 1 - CHUYA QELLQA La Biblia en Quechua de Ayacucho 2012

Cartapa qallariyninmanta

¹ Ñoqa Pablom, Silvanowan hinaspa Timoteowan kay cartata Tesalónica llaqtapi kaq iglesiaman apachimuykiku, qamkunaqa Dios Taytawan hinaspa Señor Jesucristowanmi huklla kachkankichik. Dios Taytawan Señor Jesucristoyá kuyakuynintawan hinaspa hawkayayninta qamkunaman chaqchurimuchun.

Tesalónica llaqtapi kaq iñiqkunapa allin ejemplonmanta

² Qamkunamantam tukuy tiempo Diosman graciasta qoniku, sapa maña-kuyniykupipas yuyarikikum.

³ Yuya-rinikutaqmi Dios Taytanchikpa qayllanpi iñiynikichikman hina llamkasqaykichikta, kuyakuynikichikman hina servisqaykichikta hinaspa Señorninchik Jesucristorayku ñakarispa qaqa hina sayasqaykichiktapas.

⁴ Diospa kuyasqan wawqe-paniykuna, yachanikum Diospa akllasqan kasqaykichiktaqa.

⁵ Qamkunaman Cristomanta allin noticia willasqaykutaqa manam rimayllachu-rimarqaniku, aswanqa Chuya Espiritupa atiyninwanmi chayachimurqaykiku, ñoqaykupas cheqappaq hapispaykum willarqaykiku. Yachasqaykichikpi hinapas qamkunata kuyaspam allinta kawsarqaniku.

⁶ Qamkunaqa ñoqaykupa hinaspa Señorninchikpa ejemplontam qatichkankichik, llumpayta ñakarichkaspaykichikpas Diospa palabrantam Chuya Espiritupa kusikuy qosusqaykichikwan chaskirqankichik.

⁷ Chaynapim qamkunaqa Macedonia lawpi hinaspa Acaya lawpi llapallan iñiqkunapaqpas ejemplonña kachkankichik.

⁸ Qamkunamanta qallaykuspam Señorpa palabranqa willakusqa karqa. Chayqa manam Macedonia lawllapichu nitaq Acaya lawllapichu, aswanqa tukuy hinastinpim. Diosman iñisqaykichikmantaqa lliwñam yacharunku chaymi ñoqaykuqa manaña willakunaykuñachu.

⁹ Paykunañam willakuchkanku qamkunaman chayamuptiyku imaynam chaskiwasqaykikuta hinaspa Diosman iñikuspaykichik idolokunata qepanchakuruspa kawsaq cheqap Diostaña servisqaykichikmantapas,

¹⁰ willakuchkankutaqmi hanaq pachamanta Diospa Churin Jesús kutimunan suyasqaykichiktapas, paytam wañusqanmanta Dios kawsarichimurqa. Paymi hamuq tiempokunapi castigomanta librawasunchik.