1~Samuel 7 - CHUYA QELLQA La Biblia en Quechua de Ayacucho 2012

¹ Chaymi Quiriat-jearim llaqtayuqkuna hamuruspanku Tayta Diospa Arcanta aparuspanku, Abinadabpa moqo patapi wasinman churaykurqaku, chaypim churin Eleazarta sapaqcharqaku Arcata nanachikunanpaq.

Israelpi Samuel kamachikusqanmanta

² Quiriat-jearim llaqtapi Arca churasqankumantam iskay chunka wataña pasarurqa. Israelpa mirayninkunam Tayta Diosman kutirikuspanku tukuy sonqowan maskarqaku.

³ Chaymi paykunata Samuel nirqa: Sichum tukuy sonqoykichikwan Diosman kutirikuspaykichikqa, wischuychikyá qamkuna ukupi kaq idolokunata chaynallataq Astarot idolokunatapas, hinaspayá cheqap Diosllapaqña kawsaspa payta serviychik, chayna kaptinqa kikinpunim filisteokunamanta librasunkichik, nispa.

⁴ Hinaptinmi Israelpa mirayninkuna wischurqaku Baal sutiyuq idolokunata chaynataq Astarot sutiyuq idolokunatapas, hinaspam Tayta Diosllataña yupaycharqaku.

⁵ Samuelmi kaynata nirqa: Mizpa llaqtaman Israel runakunata huñumuychik. Chaypim Tayta Diosta qamkunapaq mañakusaq, nispa.

⁶ Israelpa mirayninkunam Mizpa llaqtapi huñunakururqaku, chaypim yakuta hurqospanku ofrendata hina Diospa ñawpaqninpi machqerqaku, chay punchawmi ayunaspanku Diospa contranpi huchallikusqankuta lliw reqsikurqaku. Samuelmi Israelpa mirayninkunata Mizpa llaqtapi juzgarqa.

⁷ Filisteokunam yacharurqaku Israelpa mirayninkuna Mizpa llaqtapi huñunakusqankuta, chaymi filisteokunapa kamachiqninkuna Israel runakunapa contranpi rirqaku; chayta Israelpa mirayninkuna uyariruspankum mancharikurqaku.

⁸ Chaymi Samuelta nirqaku: Tuta punchawyá yupaychasqanchik Diosta, Tayta Diosninchikta mañapuwayku, chaynapi filisteokunapa makinmanta librawanankupaq, nispanku.

⁹ Samuelñataqmi uña carnerochata wañuchispan, sacrificiota Tayta Dios-paq lliwta kañarqa, chaymi Israel runakunarayku qapariyllawanña Sa-muelpa mañakusqanta Tayta Dios uyariy kurqa.

¹⁰ Samuelmi sacrificiota kañas-pan Tayta Diosman ofrecech-karqa, chayllamanmi filisteokuna chayaramurqaku Israel runakunawan peleanankupaq; hinaptinmi atiyniyuq Diosñataq filisteokunapa contranpi nisyullay nisyu rayota kachaykamurqa, chaymi mancharikuymanta, filisteokuna vencerachikurqaku.

¹¹ Israelpa mirayninkunañataqmi lloqsispanku filisteokunata wañuchistin Bet-car lawpa urayninkama qatirqaku.

¹² Chaymantam Samuelqa huk rumita hapispan señalpaq churarqa Mizpaman chaynataq Sen llaqtaman riq ñanpi. Hinaspam suticharqa “Eben-ezerwan”. Chaynataqa suticharqa “kunankamam Dios yanapaykuwanchik”, nispanmi.

¹³ Filisteokuna chayna humillachisqa karuspankum manaña huktawanqa kutimurqakuchu Israel runakunapa allpanmanqa; Samuelpa wañukunan punchawkamam Diospa makinqa filisteokunapa contranpi karqa.

¹⁴ Israel runakunamanmi kutiykurqa filisteokunapa qechusqan llaqtakuna, Ecrón llaqtamanta Gat llaqtakama; chaynapim Israel runakunaqa allpankuta kutiykachikurqaku, chaymi filisteokunaqa manaña munaychakurqakuñachu. Chaynataqmi Israel runakunaqa Amorreo runakunawanpas hawkayaypiña kawsakurqaku.

¹⁵ Samuelmi wañukunan punchaw-kama lliw Israel runakunapa kamachiqnin karqa.

¹⁶ Samuelqa sapa watam watukuq riq Bet-el, Gilgal hinaspa Mizpa llaqtakunata, chaypim consejamuspan sasachakuyninkupi yanapaspan Israel runakunata nanachikuq.

¹⁷ Chaymantam Ramá llaqtapi wasinman kutiq, chaypi yachaspanmi allichaq Israel runakunapa sasachakuyninta. Hina chaypitaqmi altartapas Tayta Diospaq ruwarqa.