1~Samuel 6 - CHUYA QELLQA La Biblia en Quechua de Ayacucho 2012

Filisteokuna Diospa Arcanta kutichisqankumanta

¹ Tayta Diospa Arcanmi filisteokunapa allpanpi qanchis killa tarikurqa.

² Chaymi filisteokuna, sacerdotekunata chaynataq qatipaqkunata tapunankupaq qayachirqaku: ¿Imatataq Diospa Arcanwan ruwasunchik? Willaykuwayku, ¿imaynatataq maymi kasqanman kutichichwanchik? nispa.

³ Chaymi paykunañataq nirqaku: Israel runakunapa Diosninpa Arcanta kutichispaqa, amam hinallataqa kuti-chinkichikchu, aswanqa huchallikusqaykichikmantam ofrendata qonkichik. Chayraqmi sanoyankichik hinaspam yachankichik imaynanpim chay castigoqa qamkunamanta mana karunchakusqanta, nispanku.

⁴ Hinaptinmi filisteokunañataq nirqaku: ¿Imatataq huchallikusqaykumanta pagasaqku? nispanku. Chaymi paykunañataq nirqaku: Filisteokunapa pichqa kamachiqninkunaman hina, qoychik tumorman rikchakuq pichqa qori alhajakunata chaynataq qorimanta ruwasqa pichqa ukuchakunatapas, chay onqoyllawan lliwpas ñakarisqaykichikrayku.

⁵ Chaynaqa, ruwaychikyá tumorman rikchakuqta chaynataq chakraykichik tukuq ukuchaman rikchakuqtapas, hinaspayá Israel casta runakunapa Diosninta yupaychaychik, icharaqpas chaynapi qamkunatapas, idoloykichiktapas, chakraykichiktapas mana castiganmanchu.

⁶ ¿Imanasqataq sonqoykichikta rumiyarachinkichik, yaqa egipciokuna chaynataq rey Faraón hina?. Paykunam rumi sonqo karqaku, chaymi Dios castigaptinña Israelpa mirayninkunata kachaykurqaku.

⁷ Chaynaqa, musoq carretata ruwaspayá, uñayuq iskay vacakunata, manaraq yugoman watasqata hapispaykichik chay carretaman wataychik, ichaqa amam uñankunata mamantawan kuskataqa kacharinkichikchu, aswanqa uñankunatam corralninman kutichinkichik.

⁸ Chay carretamanmi churankichik Diospa Arcanta, waqtanmanñataqmi huk cajapi churankichik huchaykichikmanta qori alhajakunata, hinaspam aviarunkichik.

⁹ Ichaqa kaytam qawasunchik, sichum chay carreta qespinqa Bet-semes llaqtaman ñanninta, hinaptinqa chaypim yachasun Israelpa Diosnin kay ñakariykuna churamusqanta, mana chayna kaptinqa yachasunchiktaqmi chay castigoqa mana paymanta hamusqanta, aswanqa yanqa onqoylla kasqanta, nispa.

¹⁰ Chaynatam chay runakuna ruwar-qaku; uñayuq iskay vacakunata hapis-pankum carretaman watarurqaku, uñankunatañataqmi corralninpi wichqa-rurqaku.

¹¹ Hinaspam Tayta Diospa Arcanta carretaman churarqaku chaynataq cofrepi ukuchaman rikchakuq qori alhajakunatawan tumorman rikchakuq qori alhajakunatapas.

¹² Chay vacakunam Bet-semes llaqtaman ñanninta waqastin rirqaku, manam ichoqmanpas nitaq alleqmanpas muyurqakuchu. Filisteokunapa kamachiqninkunañataqmi carretapa qepanta qatirqaku Bet-semes llaqtapa linderonkama.

¹³ Bet-semes llaqtayuq runakunam qechwanpi trigota rutuchkarqaku, paykunam qawarispa Arcata rikururqaku, chaymi anchallataña kusikurqaku.

¹⁴ Chay carretam sayarurqa hatun rumipa waqtanpi, Josueypa chakran patanpi, Bet-semes llaqtapi, chaymi Bet-semes llaqtayuqkunaqa carretata yantaruspanku, vacakunata kañaspanku Tayta Diosman ofrecerqaku.

¹⁵ Levitakunañataqmi Tayta Diospa Arcanta uraykachirqaku chaynataq qori alhajakuna waqaychaq cajatapas, hinaspam chay hatun rumipa hawan-man churaykurqaku. Chay punchaw-mi Bet-semes llaqtayuqkuna, ofren-dakunata chaynataq animalkunata kañaspanku sacrificiota Tayta Diosman qorqaku.

¹⁶ Chayta qawaykuspankum filisteokunapa pichqantin kamachiqninkuna, chay punchawlla Ecrón llaqtaman kutikurqaku.

¹⁷ Tayta Diosman filisteokunapa huchankumanta ofrecesqanku, tumorman rikchakuq pichqa qori alhajakunam kay llaqtakunamanta karqa: Asdod, Gaza, Ascalón, Gat hinaspa Ecrón llaqtamanta.

¹⁸ Ukuchaman rikchakuq qori alhajakunañataqmi qosqa karqa filisteokunapa pichqantin kamachiqninkupa rantinpi chaynataq hatun llaqtakunapa, mana murallasqa taksa llaqtachakunapa rantinpipas. Tayta Diospa Arcanta churasqanku hatun rumim Josueypa chakranpi tarikun, Bet-semes llaqtapi, chayqa hinallaraqmi kachkan kunankamapas.

¹⁹ Diosmi Bet-semes runakunata wa-ñurachirqa, paypa Arcanpa ukunta qawaykusqankumanta. Pichqa chunka waranqa qanchis chunka qarikunatam wañurachirqa. Chaymi llaqtantin runakuna llumpayta waqarqaku.

²⁰ Hinaptinmi Bet-semes llaqtayuqkuna nirqaku: ¿Pitaq sayaykunman chuya Tayta Diospa ñawpaqninpi? ¿Maymantaq apachichuwan kay Arcanta? nispanku.

²¹ Hinaspam Quiriat-jearim llaqtapi yachaqkunaman willachimurqaku: Filisteokunam Tayta Diospa Arcanta kutirachimunku, chaynaqa hamuspayá apaychik, nispanku.