1~Samuel 5 - CHUYA QELLQA La Biblia en Quechua de Ayacucho 2012

Diospa Arcan Filisteapi tarikusqanmanta

¹ Filisteokunam Diospa Arcanta qechuruspanku Eben-ezer sitiomanta Asdod llaqtaman aparqaku.

² Hinaspam Diospa Arcanta Dagón idolonkupa templonman apaykurqaku, hinaspam Dagonpa waqtanpi churaykurqaku.

³ Paqarinnintin punchawmi Asdod llaqtayuq runakuna tutapayta hatarispa rirqaku, hinaspam diosninku Dagonta tariykurqaku Tayta Diospa Arcanpa ñawpaqninpi pakcharayachkaqta. Chaymi idolonkuta maymi kasqanman kutiykachirqaku.

⁴ Kaqllamanta paqarinnintin tutapayta rispankum idolonku Dagontaqa tariykurqaku Tayta Diospa Arcanpa ñawpaqninpi wischurayachkaqta, ichaqa Dagonpa umanwan iskaynin makinkunam cuerponmanta qorusqaña kachkasqa templonkupa punku pasaykunapi.

⁵ Chayraykum, chay punchawmanta, punku pasaykunataqa manaña sarunkuñachu idolonku Dagonpa sacerdotenkunapas nitaq runankunapas.

⁶ Tayta Diosñataqmi Asdod llaqtapi runakunata chaynataq muyuriqninpi llaqtakunatapas tumor onqoywan castigarqa, chaymi llapallanku ñakariykurqaku.

⁷ Chayta qawaykuspankum Asdod llaqtayuqkuna nirqaku: Israel runakunapa Diosninpa Arcanqa amaña ñoqanchikwanqa kachunchu, llumpaytam ñakarichiwachkanchik, chaynallataq diosninchik Dagontapas, nispanku.

⁸ Chaymi Filisteapi kamachikuqkunata qayachispanku tapurqaku: ¿Imatataq Israelpa Diosninpa Arcanwan ruwasunchik? nispanku. Paykunañataqmi nirqaku: Gat llaqtaman aparuychik, nispanku. Hinaptinmi Israelpa Diosninpa Arcanta Gat llaqtaman aparurqaku.

⁹ Ichaqa chay llaqtaman aparuptinkum, Tayta Diosñataq chay llaqtapi yachaqkunata llumpayta chaqwarachirqa, taksamanta hatunkama tumor onqoywan.

¹⁰ Chaymi filisteokunaqa Diospa Arcanta aparachirqaku Ecrón llaqtamanña, ichaqa chayaruptinkum Ecrón runakuna qaparirqaku kaynata: ¡Israel runakunapa Diosninpa Arcantam aparamuwanchik llaqtantinta wañurachiwananchikpaq! nispanku.

¹¹ Chaymi Filisteapi kamachikuqkuna huñunakuruspanku ninakurqaku: Israel runakunapa Diosninpa Arcanta maymi kasqanman kutichikchik, chaynapi ama llapanchikta wañurachiwananchikpaq, nispanku. Chaynataqa nirqaku runakunata Tayta Dios llumpayta ñakarichiptin nisyuta mancharikusqankuraykum.

¹² Wañuymanta lluptiqkunapas tumor onqoywanmi ñakarirqaku, chaynapim llaqta runakunapa qapariyninku Diospa qayllanman chayarqa.