1~Samuel 30 - CHUYA QELLQA La Biblia en Quechua de Ayacucho 2012

Amalec runakunata David vencerusqanmanta

¹ Kimsa punchawninmanmi runan-kunapiwan Davidqa Siclag llaqtaman chayarurqaku, hinaspam tariykurqaku Amalec runakuna Neguev lawman yaykuruspanku Siclag llaqtata kañaykusqankuta.

² Ichaqa mana pitapas wañuchispam warmikunata hinaspa warmakunata, hatunta taksata lliwta presota aparusqaku.

³ Davidmi runankunapiwan chay llaqtaman chayaruspa kañasqataña tarirurqa, warminkutapas hinaspa churillankutapas qari warmakunata warmi warmakunatam presota aparusqaku.

⁴ Hinaptinmi runankunapiwan Davidqa manaña kallpayuq kanankukama qaparispanku waqarqaku.

⁵ Davidpa iskaynin warminkunatapas presotam aparusqaku. Paykunam karqa Jezreel llaqtayuq Ahinoam hinaspa Carmel llaqtayuq Nabalpa viudan Abigail.

⁶ Tropankunañataqmi qari churinkuta warmi churinkuta manaña tariykuspanku Davidman cargochaspanku rumiwan wañurachinankupaq tanteanakurqaku. Chayraykum Davidqa llumpay mancharisqallaña tarikurqa. Ichaqa Tayta Diospi kallpanchakuspam,

⁷ Ahimelecpa churin sacerdote Abiatarta David nirqa: Ama hina kaspayki Diosninchik tapuna efodta aparamuway, nispa. Chay efodta Abiatar aparamuptinmi,

⁸ Tayta Diosta David tapurqa: ¿Qatisaqchu icha manachu chay suwa runakunata? ¿Yaqaraqchu hayparuyman? nispa. Chaymi Tayta Dios nirqa: ¡Qatiypuni, paykunataqa hayparunkim, hinaspam presokunatapas libramunki! nispa.

⁹ Hinaptinmi Davidqa soqta pachak runankunawan pasarqa. Besor Mayu-man chayaruptinkum,

¹⁰ iskay pachak runankuna chaypi qeparurqaku. Payku-nam llumpay pisipasqa kasqankuray-ku mayu chimpayta mana atirqaku-chu. Chaymi Davidqa tawa pachak runakunallawanña qatirqa.

¹¹ Risqankupim Egipto nacionniyuq runata tarirurqa-ku, paytam Davidman pusaramus-panku yakuta tomaykachispa mikuykachirqaku.

¹² Qoykurqakutaqmi higos-manta tortillatawan uvas pasasmanta iskay tortillakunatapas. Chaykunata mikuykuspanmi kallpanchakururqa. Payqa kimsa punchaw kimsa tutañam mana mikusqa hinaspa mana yaku tomasqa kasqa.

¹³ Chay runatam David tapurqa: ¿Pipa criadontaq kanki? ¿Maylawtaq kanki? nispa. Hinaptinmi chay Egipto nacionniyuq runañataq nirqa: Ñoqaqa Amalec casta runapa criadonmi kani. Onqorusqayraykum yaqa kimsa punchawña patronniy kaypi saqeruwarqa.

¹⁴ Ñoqaykum rirqaniku Neguev lawpi Ceret casta runakunapa, Judá casta runakunapa chaynataq Caleb casta runakunapa tukuy imanta suwamunaykupaq, kañaykamurqanikutaqmi Siclag llaqtatapas, nispa.

¹⁵ Chaymi David tapurqa: ¿Yaqachu pusaruwankiman chay suwakunapa kasqanman? nispa. Hinaptinmi chay runa nirqa: Diosrayku mana wañurachiwanaykipaq chaynataq patronniyman mana hapiykachiwanaykipaq juraykuwaptikiqa pusarusqaykim, nispa.

¹⁶ Pusaruptinmi chay runakunata tukuy pampapi cheqeruspanku mikuchkaqta, upyachkaqta tarirurqaku; filisteokunamanta, Judá runakunamanta suwakamusqankumanta hatun fiesta ruwachkaqta.

¹⁷ Chaymi Davidqa paykunaman pawaykuspa tutapaymanta paqarinnintin tardeykuqkama wañurachirqa, tawa pachak jovenkunallañam camellonkuman sillakuykuspa lluptirurqaku.

¹⁸ Davidmi Amalec runakunapa tukuy ima apasqankuta chaynataq iskaynin warminkunatapas kutichikamurqa.

¹⁹ Chay apasqaku runakunamantaqa manam taksapas hatunpas faltarqachu, tukuy ima suwasqankutapas lliwtam David kutichimurqaku.

²⁰ Davidqa aparqataqmi llapa ovejakunatawan vacakunatapas, hinaptinmi chay animalkuna qatiq runakuna nirqaku: Kaykunaqa Davidpa qechukamusqanmi, nispanku.

²¹ Hinaspam Davidqa chayarurqa, iskay pachak runakunapa kasqanman, paykunam pisipasqa kasqankurayku Besor mayupi qeparurqaku. Paykunam Davidmanwan riysiqnin runakunaman taripaykurqaku, chaymi Davidpas paykunata rimaykurqa.

²² Ichaqa Davidwan riqkunamantam, wakiqnin kikillankupaq munaq mana allin runakuna nirqaku: Enemigonchikmanta imakunapas qechu-musqanchiktaqa, mana reysiwaqninchik runakunamanqa manam imatapas qochwanchu, paykunaqa warminkutawan churinkunata pusakuspayá sapakama kutikuchunku, nispanku.

²³ Chaymi paykunata David nirqa: Wawqellaykuna ama chaytaqa ru-waychikchu, Tayta Diosmi tukuy kaykunataqa qoykuwanchik, paytaqmi waqaychaykuwaspanchik contranchikpi hamuq suwakunatapas makinchikman churaykamurqa.

²⁴ ¿Pitaq chay rimaynikichikta allinmi ninman? Imapas qechumusqanchiktaqa riqpas hinaspa qepikunawan qepaqpas hina chaynallatam rakinakusun, nispa.

²⁵ Chay punchawmanta qepamanmi, chayqa huk kamachikuyña Israel nacionpaq karqa.

²⁶ Siclag llaqtaman chayaruspanmi, Davidqa tukuy imapas qechumusqanmanta wakinta Judapi kamachikuq amistadninkunaman apachirqa, kaynata kunaspan: Tayta Diospa enemigonkunamanta qechumusqaytam wakinta qamkunaman apachimuchkaykichik, nispan.

²⁷ Chay regalokunatam apachirqa Bet-el llaqtayuqkunaman, Neguev lawpi Ramot llaqtayuqkunaman, Jatir llaqtayuqkunaman,

²⁸ Aroer, Sifmot hinaspa Estemoa llaqtayuqkunaman,

²⁹ Racal, Jerameel hinaspa Ceneo llaqtayuqkunaman,

³⁰ Horma, Corasán, Atac llaqtayuqkunaman,

³¹ Hebrón llaqtaman hinaspa runankunawan purisqanku llaqtakunamanpas.