1~Samuel 27 - CHUYA QELLQA La Biblia en Quechua de Ayacucho 2012

Filisteokunapa llaqtanman Davidpa ripukusqanmanta

¹ Davidmi yuyaymanayninpi nirqa: Hukkaqnin punchawtachá Saulqa wañurachiwanqa, chaynaqa filisteokunapa nacionninman ayqekusaq, chaypi kaptiyqa Saulqa manañam maskawanqañachu nitaq Israel runakunapa allpanpipas. Chaynatam paypa makinmanta lluptikusaq, nispa.

² Chaymi soqta pachak soldadonkunapiwan Gat llaqtaman David ripukurqa, Maocpa churin rey Aquispa kasqanman.

³ Chaypim Davidqa runankunapiwan, rey Aquispa kasqan Gat llaqtapi sapakama aylluntin yacharqaku. Davidqa pusarqataqmi iskaynin warminkunatapas: Jezreel llaqtayuq Ahinoamta hinaspa Carmel llaqtayuq Nabalpa viudan Abigailta.

⁴ Saulmi yacharurqa Gat llaqtaman David ayqekusqanta, chaymi manaña maskarqañachu.

⁵ Rey Aquistam David nirqa: Reynilláy, cheqapta allinpaq hapillawaspaykiqa, ama hina kaspayá, hukkaqnin llaqtapi yachanaypaq allpata qoykullaway, manam allinchu kay hatun llaqtapi qanwan kuska yachayniyqa, nispa.

⁶ Chay punchawpipunim Davidman rey Aquis qoykurqa Siclag llaqtata. Chay punchawmantam Siclag llaqtaqa Judapi reykunapa allpanña karqa.

⁷ Davidqa huk wata tawa killanmi Filistea allpapi yacharqa.

⁸ Siclag llaqtamantam runankunawan David lloqsiq Gesur castakunapa, Gezer castakunapa chaynataq Amalec castakunapa tukuy imanku apakuq. Kay casta runakunam ñawpaqmantaraq yacharqaku Shur lawmanta qallaykuspa Egipto nacionkama.

⁹ Chay llaqtakunaman yaykuspam qaritapas warmitapas mana puchuykuspa wañuchimuqku; hinaspam apakuqku ovejakunata, vacakunata, asnokunata, camellokunata chaynataq pachakunatapas; chaykuna aparisqam rey Aquispa kasqanman kutimuqku.

¹⁰ Rey Aquisñataqmi tapuq: ¿Mayqan llaqtatataq kunan saquearamunkichik? nispa. Davidñataqmi niq: Neguev chunniqpi Judá runakunatam, Jerameelpa sur lawninpi runakunatam, Cen castakunapa sur lawninpi runakunatam, nispa.

¹¹ Qaritapas warmitapas wañuchispanmi Davidqa mana pitapas kawsaqtaqa puchuqchu, chaynapi Gat llaqtaman hamuspa, paypa imam ruwasqanmanta mana willakunankupaq. Chaynatam ruwarqa Filistea allpapi yachasqan tiempopi.

¹² Chayraykum Davidpi confiakuspan rey Aquis yuyaymanarqa: Davidqa llaqtamasin Israel runakunawanmi cheqnichikuchkan, chaynaqa tukuy tiempoñam ñoqata serviwanqa, nispa.