1~Samuel 26 - CHUYA QELLQA La Biblia en Quechua de Ayacucho 2012

Saulta David huktawan pampachasqanmanta

¹ Zif llaqtayuq runakunam Gabaa llaqtaman rispanku Saulta nirqaku: Davidmi chunniqpa chimpan Haquila orqopi pakakuchkan, nispanku.

² Hinaptinmi Zif chunniqman Saúl uraykurqa, Israelmanta kimsa waranqa allinnin soldadokunata pusarikuspa, Zif chunniqpi Davidta maskamunanpaq.

³ Chayman chayaruspanmi carpanta Saúl sayachirqa chunniqpa chimpanpi, ñanpa patan Haquila orqopi. Davidñataqmi chay chunniqpi kachkaspan musyakururqa Saulpa chaykama qatimusqanta.

⁴ Chaymi wateqaqkunata David kacharqa chaynapi Saulpa chayaramusqanta cheqaptapuni yachananpaq.

⁵ Chaymantam David pasarqa Saulpa campamento sayachisqanman, hinaspam Saulpa maypim puñusqanta qawarqa, qawarqataqmi maypim llapa tropakunapa kamachiqnin Nerpa churin Abnerpa puñusqantapas. Davidmi yacharurqa Saulqa campamento ukupi soldadonkunapa chawpinpi puñusqanta.

⁶ Chaymi David tapurqa, Het casta Ahimelecta chaynataq Sarviapa wawan Joabpa wawqen Abisaita kaynata: ¿Mayqannikichiktaq riraysiwanman Saulpa campamentonman? nispa. Hinaptinmi Abisai nirqa: Haku ñoqawan uraykusunchik, nispa.

⁷ Chaynapim Abisaiwan Davidqa campamentoman chay tutalla pasakurqaku. Saulmi puñuchkasqa campamento ukupi. Sawnanpa waqtanpiñataqmi lanzan pampapi clavarayachkasqa. Muyuriqninpiñataqmi Abnerwan llapa tropakuna puñuchkasqaku.

⁸ Chaymi Davidta Abisai nirqa: Kunanmi enemigoykita Dios makikiman churaykun. Kunanyá kikinpa lan-zallanwan pampaman clavarusaq, payqa huk tuksiyllawanmi wañurunqa, nispa.

⁹ Davidñataqmi nirqa: Ama wañuchiychu, Diospa akllasqan reyta wañuchiq runaqa castigasqam kanqa.

¹⁰ Tayta Diosraykum jurani, paymi yachan haykapim hinaspa imayna wañunantapas.

¹¹ Ñoqataqa Tayta Diosyá waqaychawachun sapaqchakusqan reyta ama wañurachinaypaq. Chaynaqa, lanzantawan yakuyuq aysakunta aparikuspa hakuchik, nispa.

¹² Chaynapim Saulpa sawnanmanta lanzantawan yakuyuq aysakunta aparikuspa David pasakurqa, manam pipas musyarqachu nitaq rikurqakuchu llapallanku puñusqankurayku. Tayta Diosmi paykunata miskita puñurachirqa.

¹³ Chaymantam Davidqa pasakurqa Saulpa kasqanmanta wayqo chimpaman, hinaspam huk moqopi sayaykurqa. Hatun wayqom paykunata rakinarqa.

¹⁴ Davidmi chay moqomanta simin huntata Nerpa churin Abnerta soldadonkunatawan kaynata qayaykachamurqa: ¡Abner uyariway! nispa. Abnerñataqmi nirqa: ¿Pitaq qamqa karqanki reyta qayaykachamunaykipaqqa? nispa.

¹⁵ Chaymi David nirqa: ¿Manachum qamqa kanki Israel runakuna ukupi mana pipapas igualay atinan? ¿Imanasqataq servisqayki reyta mana allintachu nanachikurqanki? ¡Huk runam reyta wañuchinanpaq yaykumurqa!

¹⁶ Kay ruwasqaykiqa manam allinchu, ¡Tayta Diosraykum jurani! ¡Qamkunaqa wañuytam merecenkichik, Tayta Diospa akllakusqan reyta mana waqaychasqaykichikmanta! Kunan maskaykuy, ¿maypitaq kachkan reypa lanzanwan yaku tomanan aysakun? nispa.

¹⁷ Chaymi Davidpa vozninta reqsiruspan Saúl nirqa: ¿Manachum qamqa kachkanki churillay David? nispa. Hinaptinmi David nirqa: Arí, ñoqam kachkani reynilláy.

¹⁸ ¿Ima-nasqataq kay serviqnikita qatikachawanki? ¿Ima mana allintataq ñoqa ruwaruni?

¹⁹ Reynilláy, kay serviqni-kipa mañakuyninta uyariykullaway. Sichum Tayta Dios ñoqapa contraypi hatarichisuspaykiqa ofrendayta chaskiykuwachun. Sichum runallamanta kaptinqa Tayta Diosyá ñakawachun. Diospa allpanmantam qarqoruwanku, chaynata ruwaspam idolokunata servinaypaqña tanqawachkanku.

²⁰ Amayá Tayta Diospas munachunchu qayllanmanta karupi wañunaytaqa. Ichaqa reynilláy, qanmi lloqsiramunki pikita otaq yututa hina orqon-orqon maskawanaykipaq, nispa.

²¹ Chaymi Saúl nirqa: ¡Churilláy David, reqsikunim huchallikurusqayta! ¡Mana yuyayniyuq hina kaykunata ruwaspaymi huk pantayman wichiykuni! Makikipiña kachkaptiypas manam wañurachiwarqankichu. Chaynaqa, kutikamuyá, manañam ima mana allintapas contraykipiqa maskasaqñachu, nispa.

²² Hinaptinmi David nirqa: ¡Reynilláy, kayqaya lanzaykiqa kaypi kachkan! Hukkaqnin serviqnikita kacha-muy apachimunaypaq.

²³ Tayta Diosyá allin ruwasqanchikman hina chaynataq hapipakunapaq kasqanchikman hina sapakamaman pagapuwasun. Tayta Dios-puni kunan punchaw makiyman churay-kamuchkaptinpas manam wañurachirqaykichu, qamqa paypa akllakusqan rey kasqaykirayku.

²⁴ Kunan punchawmi qampa vidaykita llumpay valorniyuqpaq qawaykuni, chayna valorniyuqtayá Tayta Diospas qawaykuchun ñoqapa kawsayniyta, hinaspayá tukuy ñakariymanta libraykuwachun, nispa.

²⁵ Hinaptinmi Saúl nirqa: Diosyá bendecisunki kuyasqay David. Qamqa hamuq punchawkunapim hatun kaqkunata ruwanki. Qamqa tukuy ima ruwasqaykipipas allinmi lloqsinki, nispa. Chaymantam David pasakuptin Saulpas wasinman kutikurqa.