1~Samuel 22 - CHUYA QELLQA La Biblia en Quechua de Ayacucho 2012

¹ Chaymantam Adulam sutiyuq machayman David ayqekurqa; chayta yacharuspankum wawqenkunawan ayllunkuna paywan huñunakunankupaq rirqaku.

² Chaypim llapa sasachakuypi kaqkuna, debekuqkuna chaynataq llakipa intusqan runakuna Davidman hukllawakuykurqaku. Davidmi paykunapa kamachiqnin rikurirurqa. Paykunam yaqa tawa pachak qarikuna karqaku.

³ Chaymantam Davidqa Moab nacionpi Mizpa llaqtaman rirqa, hinaspam Moabpa reyninta ruegakurqa: Ama hina kaspa qanwan yachananpaq tayta-mamayta chaskiykuy, Diospa imam ñoqawan ruway munasqanta yachanaykama, nispa.

⁴ Chaynapim tayta-mamanta David pusamurqa Moabpa reyninpa wasinman, hinaptinmi David pakakunankama chaypi yacharqaku.

⁵ Huk punchawmi Davidta profeta Gad nirqa: Amaña kaypiqa pakakuyñachu, aswanqa Judá lawmanña pasakuy, nispa. Chaymi David ripukuspan Haret monteman chayarurqa.

Nob llaqtapi sacerdotekunata Saúl wañuchisqanmanta

⁶ Saulmi yacharurqa runankunapiwan Davidpa maypim tarikusqanta. Saulmi lanzan hapikusqa tiyachkarqa huk moqopi tamarisco sachapa sikinpi, Gabaa llaqtapi. Yanapaqninkunañataqmi paypa muyuriqninpi sayachkarqaku.

⁷ Paykunatam Saúl nirqa: Benjaminpa mirayninkuna uyariway-chik: ¿Creenkichikchu chay Isaipa churin llapallaykichikman chakrakunata, uvas chakrakunata qosunaykichikta chaynataq waranqa tropa kamachiqpaq, pachak tropa kamachiqpaq akllasunaykichikta?

⁸ Llapallaykichikmi contraypi hoqarikurunkichik, chayraykum mana willawarqankichikchu Isaipa churinwan churiy Jonatán contratota ruwaptinpas, ñoqamantaqa manam imapas qokusunkichikchu; manam willawarqankichikchu chay serviqniy Davidta churiy Jonatán contraypi hatarichiptinpas, chaynapi pakan-pakanlla wateqawananpaq imaynam kunan ruwasqanta hina, nispa.

⁹ Hinaptinmi Saulpa serviqninkunata kamachiq Edom casta Doeg nirqa: Isaipa churintaqa rikumurqani Nob llaqtaman rispan Ahitobpa churin sacerdote Ahimelecwan kachkaqtam.

¹⁰ Chaypim sacerdote Ahimelec Davidpaq Tayta Diosta tapurqa, hinaspam mikuytapas qoykurqa, qoykurqataqmi filisteo Goliatpa espadantapas, nispa.

¹¹ Hinaptinmi rey Saulqa qayachimurqa Ahitobpa churin sacerdote Ahimelectawan Nob llaqtapi yachaq sacerdotekunata, paykunaqa karqaku Ahimelecpa ayllunkunam. Llapallanku hamuruptinkum,

¹² Ahimelecta Saúl nirqa: Ahitobpa churin uyariway, nispa. Chaymi sacerdote Ahimelecñataq nirqa: Reylláy uyarichkaykim, nispa.

¹³ Saulñataqmi nirqa: ¿Imanasqataq Isaipa churinwan ñoqapa contraypi hatarirqanki hinaspa tantatapas espadatapas qoykuspayki Diostapas paypaq tapurqankiraq? Chaykunata ruwaspam yanaparqanki contraypi hatarispan kunan hina pakan-pakan wateqawananpaq, nispa.

¹⁴ Hinaptinmi reyta Ahimelec nirqa: Llapallan serviqnikikunamantapas David hina confiakunapaq runaqa manam kanchu, chaywanpas payqa masaykim hinaspa waqaychasuqniki soldadokunapa kamachiqninmi. Wasikipiqa pay hina allin respetasqa runaqa manam kanchu.

¹⁵ Hinaspapas, ¿kunanllaraqchu Davidpaq Diosta tapurqani? ¡Manam chaynachu! Chaynaqa, reynilláy ama kay serviqnikita nitaq aylluykunatapas yanqamantaqa tumpawaykuchu. Ñoqallayqa manam imatapas chaymantaqa yachanichu, nispa.

¹⁶ Chaymi rey Saúl nirqa: ¡Ahimelec wañunkipunim! ¡Llapallan aylluykikunapas wañunqakutaqmi! nispa.

¹⁷ Hinaspam muyuriqninpi runakunata rey Saúl kamachirqa: ¡Tayta Diospa sacerdotenkunata wañu-chiychik! Paykunapas Davidmanmi sayapakurunku, chay runa ayqesqanta yachachkaspankupas manam willaykamuwarqakuchu, nispa. Ichaqa reypa serviqninkunam mana munarqakuchu Diospa sacerdotenkuna wañuchiyta.

¹⁸ Chaymi rey Saulqa kamachirqa Edom castamanta Doegtaña chay sacerdotekunata wañuchinanpaq. Hinaptinmi chay runa pawaykuspan wañuchiyta qallaykuspan chay punchaw wañurachirqa linomanta efodwan pachasqa pusaq chunka pichqayuq sacerdotekunata.

¹⁹ Wañuchirqataqmi sacerdotekunapa yachanan Nob llaqtapi qarikunatapas, warmikunatapas, warmakunatapas hinaspa ñuñuq wawakunatapas chaynataq torokunatapas, asnokunatapas hinaspa ovejakunatapas.

²⁰ Ichaqa Ahimelecpa churin Abiatarmi lluptiruspan Davidpa kasqanman chayaruspan

²¹ Diospa sacerdotenkunata Saúl wañurachisqanmanta willaykurqa.

²² Chaymi Abiatarta David nirqa: Ñoqaqa musyaraniñam Doegqa Saulman willaykunanta. Ñoqam huchayuq kani llapa aylluykikuna wañuchisqa kasqanmantaqa.

²³ Ama manchakuychu kunanqa ñoqawanyá kaypi kasunchik, kaypiqa manam pipas wañuchisunkichu, pipas wañuchiyta munasuspaykiqa ñoqataraqmi wañuchiwanqa, nispa.