1~Samuel 21 - CHUYA QELLQA La Biblia en Quechua de Ayacucho 2012

Davidpa lluptikusqanmanta

¹ Davidmi Nob llaqtapi sacerdote Ahimelecpa kasqanman chayarurqa, chaymi Ahimelecqa mancharisqallaña lloqsimuspan Davidta tapurqa: ¿Imanasqataq sapallayki hamuchkanki? nispa.

² Chaymi sacerdote Ahimelecta David nirqa: Reymi huk kunakuyta apachimuwaspan kamachimuwarqa hamusqaymantaqa ama pipas yachananpaq chaynataq reypa kunamuwasqantapas ama pimanpas willakunaypaq. Kamachisqay runaykunataqa huklaw sitiopi tupanaykupaqmi saqeramuni.

³ Icha ima mikuyllaykipas kachkan, pichqa tantallatapas otaq imallatapas qoykuwayá, nispa.

⁴ Hinaptinmi Davidta sacerdote nirqa: Manam común tantaqa kapuwanchu, Diospaq sapaqchasqa tantallam kachkan. Sichum runaykikuna warmikunawan mana puñurqachu hinaptinqa qoykusqaykim, nispa.

⁵ Chaymi David nirqa: Runaykunaqa kayna lloqsisqankuraykum warmikunawanqa mana puñunkuñachu. Kunanqa qonqaytam hamurqaniku chaymi runaykunaqa warmikunawan mana puñurqakuchu, paykunaqa Diosman asuykunankupaq hinam kachkanku, nispa.

⁶ Hinaptinmi chay Sacerdote mana común tanta kasqanrayku Tayta Diospaq sapaqchasqa tantata Davidman qoykurqa. Chay tantakunataqa hina chay punchawllapim Tayta Diospa mesanmanta suchurachirqaku, hinaspam qonichkaq tantataña churaykurqaku.

⁷ Chay punchawmi Saulpa serviqnin Doeg kachkarqa Tayta Diospa templonpi, payqa karqa Edom castam hinaspa Saulpa michiqninkunapa kamachiqninmi.

⁸ Davidmi sacerdote Ahimelecta nirqa: ¿Yaqachu ima armallapas kapusunkiman? Manam imananchu lanza otaq espada kaspapas. Qonqayta rey kamaykachimuwaptinmi espadayta nitaq huk armaykunatapas mana apamurqanichu, nispa.

⁹ Chaymi Sacerdote Ahimelec nirqa: Filisteo Goliatmanta Ela wayqopi wañuchispa qechusqayki espadallam huk capawan wankuykusqa kachkan efodpa qepanpi, munaspaykiqa apakuyá, manam huk armaqa kanchu, nispan. Hinaptinmi David nirqa: Chay espada hinaqa manam huk armaqa kanchu, qoykuwayá, nispa.

¹⁰ Saulmanta ayqekuspanmi hina chay pun-chawlla Davidqa rey Aquispaman chayarurqa. Aquisqa karqa Gat llaqtapa reyninmi.

¹¹ Chaymi rey Aquista serviqninkuna nirqaku: ¿Manachum kay runaqa kay allpapi munaychakuq rey David? ¿Manachum warmikunapas takispa tususparaq paymanta nirqaku: Saulmi waranqata wañurachimun, Davidñataqmi chunka waranqata, nispanku? nispa.

¹² Davidñataqmi rimasqankuta uyariruspan Gat llaqtapa reynin Aquista anchallataña manchakururqa.

¹³ Chaymi paykunapa qayllanpi loco tukuruspan llutanpiña rimakurqa, hinaspam punkukunapi qellqayta qallaykurqa lawtanpas barban urayta suturisqa.

¹⁴ Hinaptinmi rey Aquisqa serviqninkunata nirqa: ¿Imapaqtaq kay locota qayllayman pusaramuwankichik?

¹⁵ Kaypiqa manam locoqa faltanchu, ¿kaytaraqchu pusaramuwankichik huk locopa ruwananta wasiypi ruwananpaq? nispa.