1~Samuel 19 - CHUYA QELLQA La Biblia en Quechua de Ayacucho 2012

Davidta Saúl wañuchiy munasqanmanta

¹ Saulmi churin Jonatantawan llapallan serviqninkunata kamachirqa Davidta wañurachinankupaq. Ichaqa Jonatanmi Davidta anchata kuyarqa.

² Chayraykum Davidman Jonatán willay-kurqa: Taytaymi wañurachiyta munasuchkanki, chaynaqa paqarin tutapayta maymanpas rispayki pakakamuy hinaspam ama lloqsimunkichu.

³ Ñoqam taytaywan qampa kasqayki sitioman hamusaq, chaypim qanmanta rimapayasaq, hinaspam imam niwasqanta willamusqayki, nispa.

⁴ Chaynapim Davidpa allinninpi rimaspan Jonatán taytanta nirqa: Reynilláy, amayá ima mana allintapas serviqniki Davidpa contranpiqa ruwaychu. Payqa manam ima mana allintapas ruwasurqankichu aswanqa allinllatam.

⁵ Payqa wañuytapas mana manchakuspam chay filisteo runatapas wañuchirqa. Chaynatam llapallan Israel runakunata Tayta Dios libraykurqa. Chayta qawaspam qampas kusikurqanki. Chaynaqa, ¿imanasqataq inocente runata wañuchiypi riwaq? Amayá munaychu yanqamanta Davidta wañuchiytaqa, nispa.

⁶ Chaymi Saulqa churin Jonatanpa rimapayasqanta uyariykuspan nirqa: ¡Tayta Diosraykum jurani, Davidqa manam wañunqachu! nispa.

⁷ Jonatanmi tukuy chay rimasqankuta willaykuspan taytanpa kasqanman pusaykurqa, hinaptinmi Davidqa ñawpaqta hina Saulta yanaparqa.

⁸ Huktawan guerra qallaykuptinmi Davidqa pasaspan filisteokunata vencera-murqa. Filisteokunam paqwayta vencerachikuspanku Davidpa ñawpaqninmanta lluptikurqaku.

⁹ Saulmi lanza hapikusqa wasinpi tiyachkarqa, hinaptinmi Tayta Diospa kachamusqan mana allin espíritu huktawan hapirurqa. Davidñataqmi arpanta tocachkarqa.

¹⁰ Chaymi Saulqa chay lanzawan Davidta perqaman clavaruyta munarqa, ichaqa David surtiruptinmi chay lanza perqallaman clavakururqa. Chay tutam Davidqa ayqekurqa.

¹¹ Chaynapim runankunata Saúl kacharqa Davidpa wasinman payta wateqamuspanku paqarinnintin wañurachinankupaq. Ichaqa Davidmanmi warmin Mical willaykurqa: Kunan tuta mana lluptikuptikiqa paqarinmi wañurachisunki, nispa.

¹² Hinaspanmi Micalqa Davidta ventananta warkururqa hinaptinmi lluptikururqa.

¹³ Chaymantam Micalqa huk idolota Davidpa camanman siriykachirqa, sawnanmanñataqmi cabrapa pelonmanta ruwasqa sawnata churaykurqa, hinaspam qataykurqa.

¹⁴ Davidta hapimunankupaq Saulpa kachasqan runakuna chayaruptinkum Mical nirqa: Davidqa onqochkanmi, nispa.

¹⁵ Davidta maskamunankupaq runankunata huktawan kamachispanmi Saúl nirqa: ¡Camantintapas apamuwaychik wañu-chinaypaq! nispa.

¹⁶ Hinaptinmi Saulpa runankuna David-pa wasinman yaykuruspanku camanpi tarirurqaku chay idolota, sawnanpiñataqmi cabrapa pelonmanta sawnallata.

¹⁷ Chaymi Micalta Saúl nirqa: ¿Imanasqataq engañawaspayki enemigoyta lluptirachirqanki? nispa. Hinaptinmi Mical nirqa: “Kachaykuway lluptikunaypaq, mana chayqa wañurachisqaykim” niwaptinmi kachaykurqani, nispa.

¹⁸ Chaynatam David lluptikurqa hinaspam Samuelwan tupananpaq Ramá llaqtaman rirqa. Chayaruspanmi Samuelman willakurqa imaynam payta Saúl tukuy mana allin ruwasqanta. Chay-mantam Samuelwan ripukurqa Naiot lawpi yachanankupaq.

¹⁹ Saulmanmi willaykurqaku: Davidqa Ramá llaqtapa hichpan Naiot lawpim kachkan, nispa.

²⁰ Chaymi runankunata Saúl kachar-qa Davidta hapimunankupaq. Chaya-ruspankum chay runakuna tarirurqaku achka profetakunata Samuelwan kuska profetizachkaqta. Hinaptinmi paykunamanpas Diospa Espiritun huntaykuptin paykunapas profetizayta qallaykurqaku.

²¹ Saulmi chayta yacharuspan huk runakunataña kacharqa, ichaqa paykunapas profetizaytam qallaykurqaku. Chaymi Saulqa runankunata huktawan kacharqa, ichaqa paykunapas profetizaytam qallaykurqaku.

²² Chaymi kikin Saulña Ramá llaqtaman pasarqa, hinaspam Secú lawpi pozoman chayaruspan tapukurqa: ¿Maypitaq Samuelwan David kachkanku? nispa. Hinaptinmi hukkaqnin willaykurqa: Ramá llaqtapa hichpan Naiot lawpim, nispa.

²³ Chaylawman Saúl riptinmi paytapas Diospa Espiritun huntaykurqa, hinaptinmi paypas profetizastin Ramá llaqtapa hichpan Naiotman chayarurqa.

²⁴ Chaymantam Saulqa pachantapas chustukuruspan Samuelpa ñawpaqninpi qalallaña profetizarqa, hinaspanmi tukuy punchaw chaynataq tukuy tuta pampapi qalalla karqa. Chayraykum runakuna rimakuqku: ¿Saulpas profetañachus kasqa? nispanku.