1~Samuel 17 - CHUYA QELLQA La Biblia en Quechua de Ayacucho 2012

Goliatta David wañuchisqanmanta

¹ Filisteokunam guerrapaq huñunakururqaku Judá law Soco llaqtapi, hinaspam Efes-damimpi carpakurqaku, Azeca llaqtawan Soco llaqta tupanakuqpi.

² Chaynataqmi Saulpas Israel runakunata huñururqa, hinaspam campamentonkuta Ela qechwapi sayachirqaku. Paykunapas kinrayninmanmi chutarikurqaku filisteo-kunawan peleanankupaq.

³ Filisteokunam wayqopa waklaw chimpanpi karqaku, Israel tropakunañataqmi kaylaw chimpanpi, Ela wayqoñataqmi rakinarqa.

⁴ Chaypim Filistea tropakunamanta yaqa kimsa metro sayayniyuq soldado lloqsiramurqa, Goliat sutiyuq, payqa Gat llaqtayuqmi karqa.

⁵ Kay runapa casconmi broncemanta karqa, pachanpas broncemanta kasqanraykum yaqa pichqa chunka pichqayuq kilota llasarqa.

⁶ Chakinkuna harkachikunanpas broncemantam karqa chaynataq hombronpi apasqan lanzapas.

⁷ Chay lanzapa cabonmi karqa telarpa qerunkuna hina, puntanpi fierronpas soqta kilo masnintam llasarqa. Goliatpa harkachikunan escudo apaqñataqmi ñawpaqninta rirqa.

⁸ Goliatmi sayarispan qapariywan Israel tropakunata nirqa: ¿Imapaqtaq guerrapaq hinaraq churakurunkichik? ¿Manachu ñoqaqa kani filisteo runa, qamkunañataq Saulpa serviqninkuna? Chaynaqa, hukkaqnikichiktayá ñoqawan peleananpaq akllaychik.

⁹ Sichum peleaptiyku wañurachiwanqa hinaptinqa qamkunapa serviqnikichikmi kasaqku, venceruptiymi ichaqa qamkuna ñoqaykuta serviwankiku.

¹⁰ Kunanmi qamkunata nikichik: ¡Hukkaqnikichik hamuchun ñoqawan peleananpaq! nispan.

¹¹ Goliatpa rimasqanta uyarispankum Saulwan llapallan Israel runakuna hukmanyaruspanku mancharisqallaña tarikurqaku.

¹² Judá law Belenpim yacharqa Efrata llaqtayuq Isaí, payqa wakin runakunamantapas, Saulpa tiemponpiqa llumpay yuyaqñam karqa. Paypa pusaq churinkunamantam huknin churinpa sutin karqa David.

¹³ Isaipa kimsan mayor churinkunam Saulwan kuska guerrapi tarikurqaku, paykunapa sutinmi karqa: Eliab, Abinadab hinaspa Sama.

¹⁴ Paykunapa sullkankum karqa David. Isaipa kimsan mayor churinkuna Saulwan tarikusqankuraykum,

¹⁵ Saulpa campamentonman David riq, hinaspam Belén llaqtaman kutimuq taytanpa ovejankunata michinanpaq.

¹⁶ Chay filisteo runam lloqsimuq sapa tutapayta chaynataq chisinkuyta Israel tropakunata insultananpaq, chaynatam tawa chunka punchawña ruwarqa.

¹⁷ Huk punchawmi Davidta Taytan Isaí nirqa: Wawqekikunaman kay trigo hamkata chaynataq chunka tantata aparikuspa, campamentoman utqayman riruy.

¹⁸ Kay chunka quesotañataqmi waranqa soldadokunapa kamachiqninman qoykunki, hinaspam imaynam wawqekikuna tarikusqanta qawamuspayki imallankutapas apamunki, chayta qawaykuspay allinlla kasqankuta yachanaypaq, nispa.

¹⁹ Saulñataqmi Israelpa tropakunawan Ela qechwapi tarikurqa, filisteokunawan peleanankupaq.

²⁰ Chaymi Davidqa ovejankunata hukman michiykachispan, taytanpa qoqaw apachisqanta aparikuspan tutapayta pasarqa. Campamentoman chayaruptinmi llapa tropakuna guerraman peleaq lloqsinankupaq qaparichkasqaku.

²¹ Hi-naspam Israel tropakuna Filistea tropa-kunawan guerrapi peleanankupaq chimpa-chimpa churakuykurqaku.

²² Davidñataqmi taytanpa apachisqanta armakuna nanachikuq runaman saqekuykuspan tropakunapa kasqanman yaykururqa, hinaspam wawqenkuna imaynam tarikusqankumanta tapurqa.

²³ Paykunawan rimachkaptinmi qonqayta lloqsiykamurqa Filistea tropakunamanta Gat llaqtayuq Goliat, paymi Israelpa tropankunata insultarqa, chay runapa imam rimasqantam David uyarirurqa.

²⁴ Goliatta rikuykuspankum Israel tropakunañataq llumpay mancharisqallaña ayqekuspanku

²⁵ kaynata ninakurqaku: ¿Qawachkankichikchu wak runata? Wak runaqa lloqsiramun insultawananchikpaqmi. Pipas wañurachiqtaqa, reymi qori-qollqewan apuyachispa warmi churinwan casarachinqa, ayllunkunamantapas manañam impuestota cobran-qañachu, nispanku.

²⁶ Chaymi waqtanpi kaqkunata David tapurqa: ¿Imatataq wak filisteo runata wañu-chiqman hinaspa Israel tropakunapa penqayninta chinkachiqman qonqaku? ¿Pitaq wak mana señalasqa filisteoqa, kawsaq Diospa tropankunata insultananpaqqa? nispa.

²⁷ Paykunañataqmi nirqaku: Goliatta wañurachiq runataqa, reymi nisqanman hina ruwanqa, nispanku.

²⁸ Davidpa mayor wawqen Eliabmi ichaqa, chay runakunawan rimasqanta uyariruspan Davidpaq piñakurqa, hinaspam nirqa: ¿Imamantaq hamurqanki? ¿Pimantaq aslla ovejakunata saqeramunki? Ñoqaqa yachanim hatun tukuq kaspayki mana allinta sonqoykipi tanteasqaykita. Qamqa hamurqanki guerrata qawakunaykipaqmi, nispa

²⁹ Davidñataqmi nirqa: ¿Imatañataq ruwaruni? ¿Manachu rimayllapas-rimariyman? nispa.

³⁰ Chaymi Davidqa wawqenmanta asurispan kaqllamanta tapukurqa reypa imam ofrecekusqanmanta, ichaqa llapa runakunaqa hina chaynallatam nirqaku.

³¹ Davidpa rimasqanta uyariq runakunam pasaspanku Saulman willaykamurqaku, hinaptinmi Saulñataq Davidta qayachirqa.

³² Chaymi Saulta David nirqa: Amayá wak runaraykuqa hukmanyaychikchu; ñoqa sierviqnikim risaq wak filisteowan peleamunaypaq, nispa.

³³ Hinaptinmi Davidta Saúl nirqa: Wak filisteotaqa manam venceyta atiwaqchu, qamqa warmaraqmi kanki, wak filisteom ichaqa joven kayninmantapacha guerrallapi puriq, nispa.

³⁴ Davidñataqmi nirqa: Kay serviqnikiqa taytaypa ovejankuna michiqmi kani, michisqaypi leonpas otaq ukumaripas ovejayta mikunanpaq apaptinqa,

³⁵ qepanta qatispaymi siminmanta qechumuq kani, qonqayta kutiriykuwaptinñataqmi kakichunmanta hapiruspay maqachkaspalla wañurachiq kani.

³⁶ Leontapas otaq ukumaritapas kay qawasqayki serviqnikiqa wañuchiqmi kani. ¡Wak mana señalasqa filisteoqa chay animalkuna hinallam kachkan! ¿Imanasqamá payqa kawsaq Diospa tropankunataqa insultanqa?

³⁷ Leonmantapas ukumarimantapas libraqniy Tayta Diosmi, wak filisteomantapas librawanqa, nispan. Hinaptinmi Saúl nirqa: Chaynaqa, riyá, Tayta Diosyá qanwan kachun, nispa.

³⁸ Chaymantam Saulqa guerrapaq churakunan pachanwan Davidta pacharachirqa, casconpas harkachikunan corazapas broncemantam karqa.

³⁹ Davidmi pachanpa hawanman espadata watakuykuspan puririyta munaspan mana atirqachu, chay pachakunawan mana haykapipas churakusqanrayku. Chaymi Saulta David nirqa: Manam haykapipas kaywanqa churakurqanichu, chaymi mana puriyta atinichu, nispa. Chaynata nispanmi chay pachakunata chustukururqa.

⁴⁰ Hinaspam tawnanta aparikuspan, mayumanta pichqa lluchka ruyru rumikunata hoqarispan wayqanman hinakuykurqa, hinaspanmi warakanta hapiykuspan filisteo runaman asuykurqa.

⁴¹ Filisteo Goliatpas qarillañam Davidman asuykamurqa, escudon apaq soldadonta ñawparichikusqa.

⁴² Davidta qawaykuspanmi, jovenllaraq chaynataq sumaq rikchayniyuq kuyayllapaq kasqanrayku mana kaqpaqpas hapirqachu.

⁴³ Hinaspanmi Davidta nirqa: ¿Ñoqaqa allqochu karqani kaspiwan hamuwanaykipaq? nispa. Chaynata niruspanmi diosninkunapa sutinpi Davidta ñakaspan

⁴⁴ nirqa: ¡Asuykamuway! Aychaykita alton pawaq animalkunaman chaynataq purun animalkunaman qonaypaq, nispa.

⁴⁵ Davidñataqmi nirqa: Qanmi ñoqaman espadawan, lanzawan hinaspa jabalinawan hamuchkanki, ñoqam ichaqa qanman hamuchkani, llapallan kamachiq Tayta Diospa sutinpi. Qamqa Israel tropakunapa Tukuy Atiy-niyuq Diosnintam insultarunki.

⁴⁶ Tayta Diosmi kunanpuni qamta makiyman churanqa, wañurachispaymi umaykitapas qorusaq; hinaspam Filistea tropakunapa aychantañataq alton pawaq ankakunamanwan purun animalkunaman qarasaq. Chaynapim lliw runakuna Israel nacionpi Dios kasqanta yachanqaku.

⁴⁷ Chaynataqmi kay huñunasqa runa-kunapas yachanqaku Tayta Diosqa mana espadallawan nitaq lanzallawan salvasqanta; kay guerraqa Tayta Diospa munayllanpim kachkan, chayraykum qamkunataqa makiykuman hapiykachiwanqaku, nispa.

⁴⁸ Hinaptinmi chay filisteo runa David-wan peleananpaq kallpamuptin, Davidpas peleananpaq utqayman kallpaykuspan,

⁴⁹ wayqanmanta huknin rumita hurqoykuspan filisteo runata warakaruptin urkunpi kakñakururqa, hinaptinmi chay filisteo runaqa pampaman uyanpa wichiykurqa.

⁵⁰ Chaynatam David chay filisteota warakawan hinaspa huk rumillawan vencerurqa; wañuchinanpaq makinpi espada mana kaptinmi,

⁵¹ Goliatman kallpaykuspan, kikinpa espadanta hurqoykuspan chaywan wañurachispan umantapas qorururqa. Filisteokunañataqmi Goliat wañurus-qanta qawaykuspanku lluptikurqaku.

⁵² Israel tropakunawan Judá tropaku-nañataqmi qaparillawanña Filistea tropakunata Gat llaqtakama hinaspa Ecrón llaqtapa punkunkama qatirqaku. Filisteokunapa ayankupas wichi-wichim karqa Saaraim lawmanta qallaykuspa Gatman chaynataq Ecronman rina ñankunakama.

⁵³ Qatisqankunamanta kutiramuspankuñataqmi, Israel tropakunaqa Filistea tropakunapa campamentonmanta llapa imata apakurqaku.

⁵⁴ Davidñataqmi chay filisteo Goliatpa umanta Jerusalén llaqtakama aparqa, armankunatam ichaqa carpanman churaykurqa.

⁵⁵ Filisteo runawan David peleachkaptinmi, tropankunapa kamachiqnin Abnerta Saúl tapurqa: ¿Pitaq wak warmapa taytan? nispa. Abnerñataqmi nirqa:

⁵⁶ Almaykiraykum reynilláy jurani, manapunim yachanichu, nispa. Chaymi rey Saúl nirqa: Chaynaqa, pim kasqantayá tapukachakamuy, nispa.

⁵⁷ Filisteo runa wañuchisqanpa uman aptarikusqa David kutimuchkaptinmi, Abnerñataq taripaykuspan Davidta rey Saulpa qayllanman pusaykurqa.

⁵⁸ Chaymi Saúl tapurqa: ¿Pipa churintaq kanki? nispa. Davidñataqmi nirqa: Ñoqaqa Belén llaqtayuq serviqniki Isaipa churinmi kani, nispa.