1~Samuel 16 - CHUYA QELLQA La Biblia en Quechua de Ayacucho 2012

Rey kananpaq David sapaqchasqa kasqanmanta

¹ Tayta Diosmi Samuelta nirqa: ¿Haykapikamataq Saulmanta waqanki? Ñoqaqa Israelpi rey kayninmantam qarqoruniña. Aceite apaykachanayki waqraman aceiteta hillpuspayá Belén llaqtayuq Isaipa wasinman riy, paypa huknin churintam rey kananpaq akllaruni, nispa.

² Samuelñataqmi nirqa: ¿Imaynataq riyman? Saúl yacharus-pancha wañurachiwanqa, nispa. Hinaptinmi Tayta Dios nirqa: Vaquillata pusarikuspaykim ninki: “Diosman ofreceqmi hamuchkani”, nispa.

³ Hinaspam sacrificiota ruwaysisunaykipaq Isaita qayanki. Ñoqam imam ruwanaykita nisqayki, reqsichisqaykitaqmi rey kananpaq akllakusqayman aceiteta tallinaykipaqpas, nispa.

⁴ Chaynapim Samuelqa Tayta Diospa kamachisqanman hina ruwarqa. Belén llaqtaman Samuel chayaruptinmi, payta chaskinankupaq ancianokuna mancharisqallaña lloqsimurqaku, hinaspam tapurqaku: Taytáy, ¿allinpaqchu hamuchkanki? nispa.

⁵ Samuelñataqmi nirqa: Arí, Tayta Diosman sacrificio qoqmi hamuchkani, chaynaqa qamkunapas chuyanchakuychik sacrificiota Diosman qonanchikpaq, nispa. Chaymantam Isaitawan churinkunata chuyancharuspa sacrificiota ofrecenankupaq qayarqa.

⁶ Isaipa churinkuna chayaramuptinmi, Eliabta qawaykuspan Samuel yuyaymanarqa: Cheqaptapunim Tayta Diospa akllakusqan reyqa qayllanpi kachkan, nispa.

⁷ Ichaqa Tayta Diosmi Samuelta nirqa: Amayá sumaq rikchaynintawan sayaynillantachu qawayqa, paytaqa manam munanichu; runapa qawasqanqa manam ñoqapa qawasqay hinachu, runaqa hawallantam qawan, ñoqam ichaqa sonqonta qawani, nispa.

⁸ Chaymi Isaí churin Abinadabta qayarqa, hinaspam Samuelman asuykachirqa, hinaptinmi Samuel nirqa: Manam paychu Tayta Diospa akllasqanqa, nispa.

⁹ Chaymantam Isaiyqa churin Samata asuykachirqa, hinaptinmi Samuel nirqa: Manam paychu Tayta Diospa akllasqanqa, nispa.

¹⁰ Qanchisnintin churinkunata Isaí asuykarachiptinmi Samuel nirqa: Kay churikikunataqa manam Tayta Diosqa akllanchu, nispa.

¹¹ Hinaspam Isaita Samuel tapurqa: ¿Kayllachu churikikuna? nispa. Hinaptinmi Isaiñataq nirqa: Kachkanraqmi sullka kaq, payqa ovejatam michichkan, nispa. Chaymi Samuel nirqa: Payta qayachimuy, pay chayamunankamam manaraq mikusunchu, nispa.

¹² Isaí kamachikuptinmi qayamurqaku, hinaptinmi chay warmaqa kasqa sumaq rikchayniyuq, chukchanpas, ñawinkunapas, uyanpas ancha kuyayllapaq; chaymi Tayta Dios nirqa: Paymi rey kananpaq sapaqchakusqayqa, hatarispayki aceiteta talliy, nispa.

¹³ Chaymi Samuel, waqrapi aceiteta hapiykuspan wawqenkunapa qayllanpi Davidpa umanman talliykurqa; Chay punchawmantam Davidman Diospa Espiritun huntaykurqa. Chaymantam Samuelqa Ramá llaqtaman kutikurqa.

Saulpaq David arpata tocasqanmanta

¹⁴ Tayta Diospa Espiritunmi Saulmanta anchurikururqa, hinaptinmi Tayta Diospa kachamusqan mana allin espíritu Saulta ñakarichirqa.

¹⁵ Chaymi serviqninkuna Saulta nirqaku: Diosmi mana allin espirituta kachaykamusunki, chaymi ñakarichisuchkanki.

¹⁶ Chaynaqa, reynillayku, kay serviqnikikunatayá kamachiwayku pitapas arpa tocaqta maskamunaykupaq, chaynapi mana allin espíritu hapisuptiki arpata tocaptin hawkalla kanaykipaq, nispanku.

¹⁷ Chaymi Saúl nirqa: Maskamuychik pitapas allin tocaqta, hinaspayá pusamuwaychik, nispa.

¹⁸ Hinaptinmi huknin serviqnin nirqa: Ñoqam reqsini Belén llaqtayuq Isaipa huknin churinta, paymi allinta arpata tocan; payqa sinchi kallpayuqmi, guerrerom, yachaywan rimakuqmi hinaspa kuyayllapaq jovenmi; Tayta Diosmi paywan kachkan, nispa.

¹⁹ Hinaptinmi Isaiman kaynata nimunankupaq Saúl kacharqa: Oveja michiq churiki Davidta kachamuway, nispa.

²⁰ Chaymi Isaiyqa churin Davidta kacharqa rey Saulman, kikinwantaqmi apachirqa asnonpi tanta cargata, puyñupi vinota chaynataq uña cabrachatapas.

²¹ Saulpa kasqanman chayaruspanmi Saulta serviyta qallaykurqa, chaymi Saúl llumpayta kuyaruspan arman apaqpaq akllaykurqa.

²² Chayraykum Saulqa kacharqa Davidpa taytan Isaiman kaynata nimunankupaq: Ama hina kaspaykiyá yanapawananpaq Davidta saqeykuy, payqa qayllaypim allinta qawaykachikun, nispa.

²³ Diospa kachamusqan mana allin espíritu Saulta ñakarichiptinmi, Davidñataq arpanta tocaq, chaymi Saúl manaña ñakarispan allinyaykuq, mana allin espiritupas paymantam karunchakuq.