1~Samuel 15 - CHUYA QELLQA La Biblia en Quechua de Ayacucho 2012

Saulpa mana kasukusqanmanta

¹ Huk punchawmi Saulta Samuel nirqa: Tayta Diosmi ñawpaqta kachamuwarqa Israel runakunapa reynin kanaykipaq aceitewan tallispa qamta sapaqchanaypaq. Chaynaqa, Tayta Diospa nisqantayá uyariy.

² Tukuy Atiyniyuq Tayta Diosmi nin: Israel runakuna Egipto nacionmanta hamuptinkum, paykunapa contranpi Amalec runakuna sayarirqa, chayraykum paykunata castigasaq.

³ Chaynaqa, rispayá kunan Amalec runakunata wañuchimuy, amam imantapas puchuchinkichu, aswanqa wañuchinkim qarikunata, warmikunata, warmakunata, ñuñuq wawakunatapas chaynataq vacakunata, ovejakunata, camellokunata hinaspa asnokunatapas, nispa.

⁴ Saulmi qayachirqa Israel ayllukunata hinaspam Telaim llaqtapi yuparqa. Chakiwan riq soldadokunam karqa iskay pachak waranqa, Judamantañataqmi karqa chunka waranqa.

⁵ Chaymantam Saúl pasarqa Amalec runakunapa llaqtanman, hinaspam yakuyuq wayqopi pakakuspa suyarqaku.

⁶ Hinaspam chaypi yachaq Ceneo runakunata Saúl nirqa: Kaymanta karuman ripukuychik, yanqañataqmi Amalec runakunawan kuskata chinkarachikikuman. Qamkunaqa Israelpa mirayninkuna Egipto nacionmanta hamuptinkum llakipayarirqankichik, nispa. Chaynapim Ceneo runakunaqa Amalec runakunamanta rakikururqaku.

⁷ Amalec runakunatam Saúl vencerurqa Havila lawmanta qallaykuspa Egipto nacionman yaykuna Shur lawkama.

⁸ Saulmi Amalec runakunapa reynin Agagta presocharurqa, tropankunatañataqmi espadawan llapallanta wañurachirqa.

⁹ Ichaqa Saulmi tropankunapiwan rey Agagta mana wañuchirqakuchu, nitaqmi allinnin ovejakunatawan poqosqa malta torokunatapas hinaspa poqosqa carnerokunatapas. Manataqmi chinkachirqakuchu allinnin kaqkunatapas. Mana valeq kaqkunatam ichaqa wañuchispanku chinkachirqaku.

¹⁰ Chaymi Samuelta Tayta Dios nirqa:

¹¹ Pesakunim Saulta reypaq churas-qaymanta. Payqa ñoqamanta karunchakuruspam kamachisqaykunata mana ruwarqachu, nispa. Chay nisqanwanmi Samuel llakikururqa, hinaspam Diosta tukuy tuta mañakurqa.

¹² Samuelmi tutapayta hatarispan rirqa Saulwan tupananpaq. Ichaqa Samuelmanmi willaykurqaku: Saulqa Carmel sutiyuq llaqtaman pasakuspam chaypi allin reqsisqa kananpaq huk monumentota hatarirachin, chaymantam Gilgal llaqtaman kutikun, nispanku.

¹³ Saulpa kasqanman Samuel hamuruptinmi Saúl, nirqa: ¡Tayta Diosyá bendecisunki! Ñoqaqa Diospa kamachiwasqantam ruwaramuni, nispa.

¹⁴ Samuelñataqmi nirqa: Chaynaqa, ¿imanasqataq ovejakunapa hinaspa torokunapa qaparkachasqantaqa uyarichkani? nispa.

¹⁵ Chaymi Saulñataq nirqa: Amalec runakunapa kasqanmantam soldadokuna aparamunku. Paykunam allinnin ovejakunatawan vacakunata puchuchirqaku, chaynapi yupaychasqanchik Tayta Diosman ofrecespa kañapunapaq, waki-qnintam ichaqa lliwta chinkarachimuniku, nispa.

¹⁶ Hinaptinmi Saulta Samuel nirqa: ¡Upallaykuyraq! Kunanmi willasqayki chisi tuta Tayta Diospa imam niwasqanta, nispa. Saulñataqmi nirqa: Willaykuwayá, nispa.

¹⁷ Hinaptinmi Samuel nirqa: Mana valeqpaq kikikita qawakuchkaspapas qamqa kanki Israel ayllukunapa kamachiqninmi. ¿Manachu yacharqanki Diospuni Israel casta runakunapa reynin kanaykipaq sapaqchasusqaykita?

¹⁸ Tayta Diosmi kachasurqanki chay huchasapa Amalec casta runakunata wañuchispa lliwta chinkachimunaykipaq.

¹⁹ ¿Imanasqataq Tayta Diospa kamachisusqaykitaqa mana kasukurqankichu? ¿Imanasqataq Amalec runakunapa allinnin animalninkunata puchuykamuspa Diospa ñawpaqninpi mana allinta ruwarunki? nispa.

²⁰ Hinaptinmi Saúl nirqa: Aswanpas ñoqaqa Tayta Diospa kamachiwasqantam kasukurqani, paypa imam niwasqantam ruwamurqani, chaymi Amalec runakunapa reynin Agagtapas presota apamurqani, hinaspam llapallan Amalec runankunata wañuchimurqani.

²¹ Tropakunam ichaqa allinnin ovejakunata hinaspa vacakunata, puchuykachirqaku yupaychasqayki Tayta Diosman Gilgal llaqtapi ofrecenapaq, nispa.

²² Chaymi Samuel nirqa: Imamantapas llalliriqtaqa Tayta Diosqa munan rimarisqan kasukunanchiktam, manam animalkuna ofrecenatachu, nitaqmi wañuchispa kañapunatachu. Sacrificiokunamantapas uywakunapa wiran kañanamantapas aswan allinqa cheqaptapuni kasukuspa Tayta Diosta uyariymi.

²³ Layqanakuy hucha hinam Diospa contranpi sayariyqa, idolokunata yupaychay hucha hinam mana kasukuyqa. Chaynaqa, Tayta Diospa Chuya siminta mana kasukusqaykiraykum rey kaynikimanta qarqosunki.

²⁴ Chaymi Saúl nirqa: Arí, huchallikurunim, Diospa kama-chiwasqantapas nitaq qampa niwasqaykikunatapas manam kasukurqanichu, runakunata manchakuspaymi paykunapa mañakusqanta kasurqani.

²⁵ Ichaqa ama hina kaspaykiyá huchayta pampachaykullaway, hinaspayá Diosta yupaychamunaypaq kutisun, nispa.

²⁶ Samuelñataqmi nirqa: Manam qanwanqa kutiymanchu. Qamqa Tayta Diospa kamachisusqaykitam yanqacharqanki, chaymi paypas Israel runakunapa reynin kaynikimanta qarqorusunki, nispa.

²⁷ Chaymi pasakunanpaq Samuel muyuriykuptin capanpa puntanta Saúl hapikuruptin chay capa llikikururqa.

²⁸ Hinaptinmi Saulta Samuel nirqa: Kaynatam Tayta Dios llikirun Israel nacionpi munaychakuynikita, qechurususpaykim qoykun qanmantaqa aswan allin runamanña.

²⁹ Israelpa Tukuy Atiyniyuq Diosninqa manam llullakunchu, manataqmi imamantapas ñakakunmanchu, payqa manam runachu wanakunanpaqa, nispa.

³⁰ Saulñataqmi nirqa: Huchallikurunim ñoqaqa, ichaqa ama hina kaspaykiyá Israelpi ancianonkunapa qayllanpi, Israel runakunapa ñawpaqninpi reyta hinaraq hatunchaykuway. Chaynaqa, ñoqawanyá kutirisun Tayta Diosnikita yupaychamunaypaq, nispa.

³¹ Chaymi Samuel paywan rirqa, hinaptinmi Saulñataq Tayta Diosta yupaycharqa.

³² Chaymantam runakunata Samuel kamachirqa: Amalec runakunapa reynin Agagta pusamuwaychik, nispa. Agagñataqmi Samuelpa kasqanman kusisqa hamurqa kaynata yuyaymanaspan: Cheqaptapunim wañuchiwayta munas-qankuqa pasarunña, nispa.

³³ Samuelmi ichaqa nirqa: Espadaykiwanmi achkallaña warmikunapa wawanta wañuchirqanki, chaynapunim mamaykipas manaña wawayuq kanqa. Chaynata nispanmi Agagta Samuel wañurachirqa Gilgal llaqtapi, Tayta Diospa ñawpaqninpim chika-chikanta kuchuparurqa.

³⁴ Chaymantam Samuel pasakurqa Ramá llaqtaman, hinaptinmi Saulñataq Gabaa llaqtapi wasinman ripukurqa.

³⁵ Samuelmi wañukunan punchawkama Saulta mana rikurqañachu hinaspanmi Saulmanta anchata waqarqa. Tayta Diosmi pesakurqa Saulta Israelpi rey kananpaq churasqanmanta.