1~Samuel 13 - CHUYA QELLQA La Biblia en Quechua de Ayacucho 2012

Filisteokunawan guerrapi kasqankumanta

¹ Saulmi takyasqa runaña kachkaspan Israel nacionpi munaychakurqa; iskay wataña munaychakuchkaspanmi,

² Israel runakunamanta kimsa waranqa qarikunata akllaykurqa. Chay qarikunamantam iskay waranqa Micmas llaqtapi hinaspa Bet-elpa orqonkunapi Saulwan karqaku, waranqañataqmi Jonatanwan Benjamín ayllupa allpan Gabaa llaqtapi karqaku. Puchuq runakunatañataqmi wasinkuman Saúl aviarurqa.

³ Jonatanmi Gabaa llaqtapi Filistea tropakunata vencerurqa, chaytam wakin filisteokunañataq yacharurqaku. Hinaptinmi Saulqa cornetakunata tocachirqa Israel nacionpi, “Hebreo runakuna uyarichunku”, nispan.

⁴ Llapallan Israel runakunam yacharurqaku Filistea tropakunata Saúl vencerusqanta chaynataq filisteokuna Israel runakunata llumpayta cheqnirusqankutapas. Chaymi tropankunawan Gilgal llaqtapi Saúl huñunakurqa.

⁵ Filisteokunapas huñunakururqakum Israel tropakunawan peleanankupaq, kimsa chunka waranqa carretakuna, soqta waranqa silladakuna, chakiwan riq soldadokunañataqmi lamar qocha patanpi aqo hinaña mana yupay atina; hinaspam campamentonkuta sayachirqaku Bet-avenpa intipa qespimunan lawnin Micmas llaqtapi.

⁶ Filisteokuna llumpayta atacamuptinmi, Israel runakuna sasachakuypi rikurirurqaku, chaymi machaykunapi, uchkukunapi, qaqakunapi chaynataq chakisqa pozokunapi pakakurqaku.

⁷ Wakin hebreo runakunañataqmi Jordán mayuta chimparuspa Gad allpaman chaynataq Galaad allpaman pasakurqaku. Saulmi ichaqa hina Gilgal llaqtallapi qeparurqa, tropankunañataqmi llumpay mancharisqallaña karqaku.

⁸ Chaypim Saulqa Samuelta suyarqa qanchis punchawta, Samuelpa citakusqanman hina, ichaqa Gilgal llaqtaman manaña chayarimuptinmi runakuna ripukuytaña qallaykurqaku.

⁹ Chaymi Saulqa runakunata kamachirqa: Animalkunata apamuwaychik kañaspa Diosman ofrecenaypaq chaynataq hawkayay ofrendatapas. Chaynapim kikin Saúl chay animalkunata ofrecespan lliwta kañarqa.

¹⁰ Ofreceyta tukuykuptillanmi Samuel chayaramurqa. Chaymi Saúl lloqsirqa Samuelta rimaykuspan chaskiykunanpaq.

¹¹ Ichaqa Samuelmi nirqa: ¿Imatataq kayta ruwarunki? nispa. Hinaptinmi Saulñataq nirqa: Runakunam ripukuytaña qallaykurqa, qampas manataqmi rikurimurqankichu. Filistea tropakunapas Micmas llaqtapim huñunakurunku,

¹² chaymi nirqani: “Diospa yanapakuyninta manaraq mañakuchkaptiycha Filistea tropakuna uraykamuspa Gilgal llaqtapi wañurachiwanqaku”, nispay. Chaymi kikiyña kallpanchakuspay animalkunata kañaspay Diosman ofrecerqani.

¹³ Hinaptinmi Samuel nirqa: ¡Loco hinam kaytaqa ruwarunki! Sichum Tayta Diospa kamachisusqaykita kasukuwaq karqa, hinaptinqa paymi cheqaptapuni Israel nacionpi rey kaynikitapas miraynikikunakama wiñaypaq takyachinman karqa.

¹⁴ Kunanmi ichaqa rey kaynikipas chaylla tukurunqa. Qam mana kasukusqaykiraykum Tayta Dios maskakurun sonqonman hina kaq runata, paytañam churanqa llaqtanpi munaychakunanpaq, nispa.

¹⁵ Gilgalmantam Samuelqa pasakurqa Benjamín ayllupa allpanpi Gabaa llaqtaman. Saulñataqmi lliw tropankunata yuparurqa, hinaptinmi yaqa soqta pachak qarikuna kasqaku.

¹⁶ Saulmi churin Jonatanpiwan qeparurqa Ben-jamín ayllupa allpan Gabaa llaqtapi. Paykunawantaqmi tropankunapas chaypi qeparurqaku. Filistea tropakunañataqmi Micmas llaqtapi samarurqaku.

¹⁷ Chaymi Filisteokunapa campamentonmanta lloqsirqa kimsaman rakisqa tropakuna. Huknin tropam lloqsirqa Sual lawpi Ofra llaqtaman.

¹⁸ Iskay kaq tropañataqmi pasarqa Bet-horón lawman, kimsa kaq tropañataqmi pasarqa Zeboim qechwa law qawarina orqoman, chay orqoqa qawachkan chunniq lawmanmi.

¹⁹ Israel nacionpiqa manam huk herrerollapas karqachu; filisteokunañataqmi nirqaku: Hebreo runakunaqa amam ruwanqakuchu espadatapas nitaq lanzatapas, nispanku.

²⁰ Chaynapim llapallan Israel runakuna rejankuta, lampankuta, hachankuta hinaspa rutunakunata, filisteokunamanña apaqku chaypi ñawchiyachimunankupaq.

²¹ Lampatawan rejatam ñawchiyachiqku chunka gramo qollqemanta, hachatawan puyatañataqmi pichqa gramo qollqepaq.

²² Chaynapim gerrapi peleananku punchaw chayaramuptinqa, mana karqachu espadanku nitaq lanzankupas, kaspaqa karqa Saulpa hinaspa churin Jonatanllapam.

²³ Filisteokunapa huknin tropanmi Micmas llaqtapa qasankamaña hichparamurqa.