1~Samuel 12 - CHUYA QELLQA La Biblia en Quechua de Ayacucho 2012

Runakunaman Samuel rimarisqanmanta

¹ Israel runakunatam Samuel nirqa: Tukuy ima mañakuwasqaykichiktam ruwarqani, reytapas churaykapuykichikñam.

² Kayqaya reynikichik, payñam tukuy imapipas kamachisunkichik, ñoqaqa yuyaqñam kani; churiykunam ichaqa qamkunawan kachkan, warma kasqaymantapacham qamkunata kamachirqaykichik.

³ Ñawpaqnikichikpim kachkani, sichum pipa bueyesnintapas, asnontapas hapikuykuptiyqa, pitapas ñakarichiptiyqa, yanqapas-yanqa llakichiptiyqa otaq yanqamanta imatapas chaskikuykuspa upallakuykuptiyqa, kunanyá Tayta Diospa qayllanpi chaynataq reynikichikpa qayllanpi niwaychik. Chayna kaptinqa imam debekusqaytam pagapusqaykichik, nispa.

⁴ Paykunañataqmi nirqaku: Taytáy, qamqa manam yanqamantaqa cargochawarqankikuchu. Nitaqmi yanqapas-yanqaqa llakichiwarqankikuchu. Manataqmi pimantapas qechuwarqankikuchu. Manam pimantapas yanqamantaqa chaskikurqankichu, nispanku.

⁵ Hinaptinmi Samuel nirqa: Tayta Diosmi akllakusqan reypiwan kunan punchaw testigo, qamkuna mana imatapas tariwasqaykichikmanta, nispa. Paykunañataqmi nirqaku: Arí chaynapunim, nispanku.

⁶ Chaymi runakunata Samuel nirqa: Tayta Diosmi Moisestawan Aaronta akllakurqa, hinaspam ñawpaq taytanchikkunata Egipto nacionmanta hurqomurqa, hina paymi testigo.

⁷ Chaynaqa, kunanyá asuykamuychik, ñawpaq taytaykichiktapas qamkunatapas Tayta Dios tukuy imaymanakuna ruwasqanmanta Tayta Diospa ñawpaqninpi qamkunata yuyarichinaypaq.

⁸ Jacobmi mirayninkunapiwan Egipto nacionman ripukurqa. Chaypim ñawpaq taytanchikkuna ñakarisqankurayku Diosta qayakurqaku. Hinaptinmi Tayta Dios kacharqa Moisestawan Aaronta, paykunam taytanchikkunata Egipto nacionmanta hurqomuspanku kay allpaman yachanankupaq churarqa.

⁹ Paykunam ichaqa Diosninkuta qonqarurqaku. Chaymi Tayta Diosqa paykunata, Hazor llaqtapa tropakunata kamachiq Sísara sutiyuq runapa munaychakunanpaqña qoykurqa; qoykurqataqmi Filistea chaynataq Moab casta runakunamanpas, chaynapim paykuna guerrapi karqaku.

¹⁰ Chaymi paykuna qaparispa Tayta Diosta nirqaku: Diosnillayku, qamta qepanchaspam huchallikuruniku; Baal idolokunatawan Astarot idolokunatañam yupaycharqaniku. Kunanqa qamyá enemigoykumanta libraykullawayku, qamllataña servillanaykupaq, nispa.

¹¹ Hinaptinmi Tayta Dios kachamurqa Jerobaalta, Baracta, Jefteyta hinaspa ñoqatapas, enemigoykichikkunamanta librasqa kanaykichikpaq. Chaynapi qamkuna hawka kawsanaykichikpaq.

¹² Ichaqa Amonpa reynin Nahasta contraykichikpi peleaq hamuqta rikuspam huk reyta qonaypaq mañakuwarqankichik, yupaychasqanchik Diospuni reyninchik kachkaptinmi huk munaychakuqtaraq mañakuwarqankichik.

¹³ Chaynaqa, kayqaya qamkunapa akllakusqaykichik rey. Diosmi mañakusqaykichikman hina qoykusunkichik.

¹⁴ Sichum qamkuna reynikichikpiwan Tayta Diosllataña yupaychaspa kamachikuyninkunata kasukuspa Diosllataña servispaykichikqa, bendecisqam kankichik, hawkayaypitaqmi kawsakunkichikpas.

¹⁵ Tayta Diospa rimarisqanta mana uyarispa kamachikuyninkunatapas mana kasukuptikichikmi ichaqa, ñawpaq taytaykichikta hina Tayta Dios castigasunkichik.

¹⁶ Chaynaqa, kunan suyaspayá qawaychik Tayta Diospa hatu-hatun ruwasqanta.

¹⁷ Yachasqaykichikpi hinapas trigo rutuy tiempoqa manam paramunchu. Ichaqa Tayta Diostam ñoqa mañakusaq rayota toqyachimuspa parata chayachimunanpaq, chayraqmi yachankichik, rey mañakusqaykichikqa Tayta Diospa qayllanpi llumpay mana allin kasqanta.

¹⁸ Samuelmi Tayta Diosta mañakurqa, hinaptinmi Diosqa rayokunatawan parata chaypunilla kachaykamurqa. Chaymi llapa runakuna Diostawan Samuelta anchallataña manchakurqaku.

¹⁹ Hinaspankum llapallan runakuna Samuelta nirqaku: Ama hina kaspayki Tayta Diosta mañaykapuwayku ama wañuchiwanankupaq, cheqaptapunim llumpay huchasapallaña kachkaspapas reyta mañakusqaykuwan aswanraq huchallikuruniku, nispanku.

²⁰ Samuelñataqmi nirqa: Amayá manchakuychikchu. Cheqaptam qamkunaqa mana allinta ruwarunkichik, chaywanpas Diosmantaqa amayá karunchakuychikchu, tukuy sonqoykichikwanyá payta serviychik.

²¹ Mana valeq idolokunataqa ama serviychikchu, chaykunaqa yanqam, manam yanapasunkichikmanchu nitaqmi librasunkichikmanchu.

²² Tayta Diosmi ichaqa, sutin hatunchasqa kasqarayku mana saqesunkichikchu. Payqa runankunaña kanaykichiktam munan.

²³ Arí, ñoqamanta karunchasqa kachun Tayta Diospa qayllanpi qamkunarayku mana mañakuspa huchallikuyniyqa. Ñoqaqa aswanraqmi yachachisqaykichik Diospa munasqanman hina sumaq kawsakuyta.

²⁴ Kayllatam nikichik: Tayta Diosllata cheqaptapuni tukuy sonqowan serviychik. Amayá qonqaruychikchu qamkunapaq imapas tukuy allinkuna ruwasqantaqa.

²⁵ Sichum mana allinllapi kawsaptikichikqa, qamkunapas chaynataq reynikichikpas chinkachisqam kankichik.