1~Samuel 10 - CHUYA QELLQA La Biblia en Quechua de Ayacucho 2012

¹ Chaypim Saulpa umanman aceiteta Samuel talliykurqa, hinaspam muchaykuspan nirqa: Tayta Diosmi kunan churaykusunki Israel runakunapi munaychakuq kanaykipaq

² Chaynaqa, kunan rakinakuykuptillan-chikmi, Selsa lawpi, Raquelpa sepulturanpa hichpanpi iskay runakunawan tupanki. Kayqa kachkan Benjamín casta runakunapa allpanpim. Chay runakunam nisunki: Maskasqayki asnokunataqa tarirunkuñam, taytaykiqa manañam llakikunñachu, aswanqa qamkunamantaña llakikuspam kaynata nichkan: ¿Imatataq churillaymanta ruwaykullasaq? nispa.

³ Chaymanta pasaspaykim, Taborpi encina sachapa kasqanman chayaruspayki, kimsa runakunawan tupanakunki, Bet-el llaqtaman Diosta yupaychaq richkaqwan, kimsa cabrata, kimsa tantakunata chaynataq huk puyñupi vinota apachkaqwan.

⁴ Paykunam rimaykususpayki iskay tantata qosunki. Chaytaqa chaskikunkim.

⁵ Chaymanta pasaspaykim chayarunki Diospa akllakusqan moqoman, chaypim Filistea tropakuna kachkanku; llaqtaman yaykuspaykim profetakunawan tupanki, paykunaqa Diosta yupaychana orqomantam profetizastin uraykamuchkanku, ñawpaqnintañataqmi runakuna arpata, tinyata hinaspa qenata tocastin hamuchkanku.

⁶ Chaymi Tayta Diospa Espiritun qanman huntaykusuptiki paykunawan kuska profetizayta qallaykunki, hinaspam musoq runaña rikurirunki.

⁷ Kay señalkunata rikuchkaspaqa, atisqaykiman hinayá imatapas ruway, Diosmi qanwan kachkan.

⁸ Chaymantam Gilgal llaqtaman puntachkanki, chaypim qanchis punchawta suyawanki, hinaptinmi hamuptiy kuskanchik Tayta Diosta yupaychasunchik hawkayay ofrendata qospanchik. Chaypiñam willasqayki imam ruwanaykita, nispa.

⁹ Samuelmanta rakikuykuspan pasakunanpaq muyuriykuptillanmi Saulpa sonqonta Dios tikrarurqa, hina chay punchawllapitaqmi Samuelpa tukuy nisqankunapas cumplikururqa.

¹⁰ Chaymantam criadonpiwan Saúl pasaspan chayarurqa Gabaa sutiyuq llaqtaman, chaypim profetakunawan tupanakururqaku. Hinaptinmi Saulman Diospa Espiritun huntaykuptin paykunawan kuska profetizarqa.

¹¹ Ñawpaqmanta reqsiqninkunañataqmi profetakunawan kuskata rikuruspanku kaynata ninakurqaku: ¿Imataq Cispa churin Saulta pasarun? Paypas profetañam kasqa, nispanku.

¹² Chaymi hukkaqnin nirqa: ¿Pitaq paykunapa taytanqa? nispa. Chaymantam kay rimay qallarirqa: “Saulpas profetañam kasqa”, niq rimay.

¹³ Profetizayta tukuruspanmi moqopi yupaychanaman Saúl chayarurqa.

¹⁴ Tion-mi Saulta criadontinta tapurqa: ¿Maytataq rirqankichik? nispa. Saulñataqmi nirqa: Asnokuna maskaqmi, ichaqa mana tarispam Samuelmanña tapukuq rirqaniku, nispa.

¹⁵ Chaymi Saulta tion nirqa: Ama hina kaspayki willaykuway, ¿imatataq Samuel nimusurqanki? nispa.

¹⁶ Hinaptinmi tionta Saúl nirqa: Asnokunapa rikurirusqantañam willay-kuwarqaku, nispa. Imaynam rey kananmanta Samuelpa rimapayasqantam ichaqa mana imallatapas willarirqachu.

¹⁷ Chaymantam Samuelqa Israel runakunata Tayta Diospa ñawpaqninpi Mizpa llaqtapi huñururqa.

¹⁸ Chaypim Israelpa mirayninkunata Samuel nirqa: Israelpa yupaychasqan Tayta Diosmi kaynata nin: “Israel runakuna, ñoqam Egiptomanta hurqomurqaykichik, qamkunataqa huklaw nacionkunapa munaychakusqanmantam libramurqaykichik”, nispa.

¹⁹ Diosmi imaymana sasachakuynikichikpipas, llakikuynikichikpipas yanapasurqankichik, ichaqa qamkunam qepanchakuruspa ninkichik: “Reyta qowayku ñoqaykuta kamachiwanankupaq”, nispaykichik. Chaynaqa, Diospa qayllanman hamuychik aylluntin hinaspa castantin, nispa.

²⁰ Samuelmi Israelpi llapallan ayllukunata asuykachirqa hinaptinmi Benjamín ayllu akllasqa karqa.

²¹ Hinaspam Samuelqa kamachirqa Benjamín ayllu castankunaman hina asuykunankupaq. Hinaptinmi Matripa castan akllasqa karqa. Chay castamantañataqmi Cispa churin Saúl akllasqa karqa, chaymi payta maskaspa mana tarirqakuchu.

²² Hinaptinmi Tayta Diosta huktawan tapurqaku: ¿Chayaramunñachu chay runa? nispanku. Tayta Diosñataqmi nirqa: Payqa cargakunapa chawpinpim pakakurun, nispa.

²³ Hinaptinmi kallpaspanku pakakusqanmanta pusaramurqaku. Runakunapa chawpinpi sayaykuptinmi, hatunkaray kasqanrayku, pipas hombronkamalla hayparqa.

²⁴ Samuelmi llapallan runakunata tapurqa: ¿Qawachkankichikchu reynikichikpaq Tayta Dios akllasqanta? ¡Qamkuna ukupiqa manam pipas kanchu pay hinaqa! nispa. Hinaptinmi runakuna kusikuymanta qaparirqaku: ¡Kawsachun reyninchik! nispanku.

²⁵ Chaymantam Samuelqa llapa runakunaman willaykurqa reypa imaynam ruwananmanta kamachikuykunata, hinaspam huk libropi qellqaykuspan Diospa santuarionpi churaykurqa. Chaymantam Samuelqa runakunata kamachirqa wasinkuman kutikunankupaq.

²⁶ Saulpas kutikurqataqmi Gabaa llaqtapi wasinman, paywantaqmi rirqaku Diospa kallpanchasqan peleay yachaq qarikunapas.

²⁷ Ichaqa mana allin runakunam Saulta kamispa nirqaku: ¿Imaynataqsi kay runaqa salvawasunchik? nispankum despreciarqaku, hinaspam ima regalollatapas mana aparqakuchu, Saulmi ichaqa mana uyariqpas tukurqachu.