1~Reyes 9 - CHUYA QELLQA La Biblia en Quechua de Ayacucho 2012

Salomonwan Dios pactota ruwasqanmanta

¹ Tayta Diospa templontapas, kikinpa palaciontapas chaynataq kikinpa tukuy ima ruway munasqantapas rey Salomón qespirachiptinmi,

² payman Tayta Dios huktawan rikuriykurqa Gabaón llaqtapi rikuriykusqanta hina.

³ Hinaspanmi nirqa: Mañakuwasqaykitawan qayakuwasqaykitam uyariykuni. Kay templo ruwasqaykitam ñoqapaq sapaqcharuni chaypi wiñaypaq sutiyta reqsichinaypaq, sapa punchawmi nanachikuspay waqaychasaq.

⁴ Sichum taytayki David hina kawsaspa tukuy sonqoykiwan mana pantaspa lliw kamachisqaykunata ruwayman churaptikiqa chaynataq yachachikuyniykunatawan decretoykunata kasukuptikiqa,

⁵ taytayki Davidman nisqaypi hinam Israel nacionpi munaychakuynikita wiñaypaq takyachisaq. Paymanmi nirqani: “Manam faltanqachu miraynikikunamanta Israel nacionpi munaychakuq”, nispa.

⁶ Sichum qamkunapas otaq miray-nikichikkunapas ñoqata qepanchawas-pa kamachikuykuna hinaspa yacha-chikuykuna qosqayta mana kasukuspa huk dioskunataña qatispa yupaychaptikichikqa,

⁷ ñoqam Israel nacionta maymi qosqay allpamanta qarqorusaq. Kay ñoqapaq sapaqchasqay templotapas chinkarachisaqmi, hinaptinmi Israelpa mirayninkunamanta wakin runakunapas penqaspa burlakunqaku.

⁸ Kay suma-sumaq templotapas purmasqataña qaway-kuspankum, haykam kayninta pasaqkuna burlakuspa admirasqallaña ninqaku: ¿Imanasqataq kay naciontawan kay templotaqa Tayta Dios kaynata ruwarun? nispanku.

⁹ Hinaptinmi uyariqkunañataq ninqaku: “Egipto nacionmanta ñawpaq taytankuta hurqomuq Tayta Diosta saqeruspanku huk dioskunataña qatispanku yupaychasqankuraykum kaynaqa kachkanku. Chaymi paykunaman Tayta Dios tukuy kay mana allinkunata aparamun”, nispanku.

Salomonpa wakin ruwasqankunamanta

¹⁰ Rey Salomonmi, Tayta Diospa templontawan kikinpa palacionta iskay chunka watapi ruwachirqa,

¹¹ chaykunapaqmi Tiro llaqtapa reynin Hiram, cedro qerukunata, ciprés qerukunata chaynataq Salomonpa mañakusqanman hina qoritapas apachimurqa, chaymi Hiramman rey Salomón qoykurqa Galilea lawpi iskay chunka llaqtakunata.

¹² Hinaptinmi Tiro llaqtapa reynin Hiram, Salomonpa qosqan llaqtakunata qawamuq rirqa, ichaqa manam paypaq hinachu karqa.

¹³ Chaymi nirqa: Wawqelláy, ¿ima llaqtakunatataq qoykuwanki? nispa. Chayraykum Cabulwan suticharqa, chayna sutichasqam kachkan kunankamapas.

¹⁴ Rey Hirammi kimsa waranqa isqon pachak soqta chunka kilo qorita Salo-monman apachirqa.

¹⁵ Rey Salomonmi runakunata huñuchimurqa hinaspam mana imallapaq llamkachirqa, Tayta Diospa templonta, kikinpa palacionta, llaqtapa pukronkuna huntachiyta, Jerusalén llaqtapa murallankunata, Hazor llaqtata, Meguido llaqtata chaynataq Gezer llaqtatapas.

¹⁶ Egipto nacionpa reynin Faraonmi hamuruspa Gezer llaqtata vencerurqa, hinaspam chaypi yachaq cananeokunata wañurachispan llaqtata kañaykurqa; chay llaqtatam warmi churinman regalaykurqa Salomonwan casarakuptin.

¹⁷ Salomonmi musoqmanta hatarichirqa Gezer llaqtata, uray lawpi kaq Bet-horón llaqtata,

¹⁸ Baalat llaqtata chaynataq Judá law chunniqpi kaq Tadmor llaqtatapas;

¹⁹ chaynataq kawsay waqaychana llaqtakunatapas, guerrapaq carretakuna waqaychana llaqtakunatapas hinaspa guerrapaq caballokuna uywana llaqtakunatapas. Ruwachirqataqmi Jerusalén llaqtapi, Líbano orqokunapi hinaspa lliw munaychakusqan allpapi llapa ima ruway munasqantapas.

²⁰ Amorreokunapa, heteokunapa, ferezeokunapa, heveokunapa chaynataq jebuseokunapa puchuq mirayninkutam (chay runakunaqa manam Israelpa mirayninchu karqaku,

²¹ paykunatam Israelpa mirayninkuna mana chinkachiyta atirqakuchu) mana imallapaq rey Salomón llamkachirqa, chaynam kunankamapas kachkanku.

²² Israelpa mirayninkunatam ichaqa mana esclavota hinachu llamkachirqa, paykunaqa karqaku soldadonkunam, oficialninkunam, capitanninkunam, carretapi kaq tropakunapa capitanninkunam hinaspa caballopi sillada tropakunapa capitanninkunam.

²³ Rey Salomonpa ruwachisqankunapi llamkaqkunata kamachiqkunam karqaku pichqa pachak pichqa chunka capatazkuna.

²⁴ “Davidpa Llaqtanmanta” Salomonpa ruwachisqan palacionman Faraonpa warmi churin hamuruptinmi, llaqtapa inti qespimunan lawninpi wayqota allpawan Salomón huntachirqa.

²⁵ Salomonmi watapi kimsa kutita Tayta Diosman lliw kañana sacrificiota ofrecerqa, Dioswan allinlla kasqanmanta ofrendakunata Tayta Diospaq ruwachisqan altarpi, inciensotapas qontichirqataqmi. Chaynatam templo ruwayta tukururqa.

²⁶ Rey Salomonmi ruwachirqa barcokunata Puka lamar qochapa patanpi kaq Ezión-geber llaqtapi. Chay llaqtaqa kachkan Edom lawpi Elat llaqtapa hichpanpim.

²⁷ Rey Hirammi serviqninkunata rey Salomonpa serviqninkunatawan kuskata barcokunapi kacharqa. Hirampa serviqninkunaqa barcowan allin llamkay yachaqkunam karqaku, lamar qochatapas allintam reqsirqaku.

²⁸ Paykunam Ofir lawkama rirqaku, hinaspam rey Salomonpaq yaqa chunka tawayuq waranqa kilo qorita apamurqaku.