1~Reyes 5 - CHUYA QELLQA La Biblia en Quechua de Ayacucho 2012

Rey Hiramwan Salomonpa contrato ruwasqanmanta

¹ Tiro llaqtapa reynin Hirammi yacharurqa Davidpa rantinpi churin Salomontaña rey kananpaq churarusqankuta, chayraykum serviqninkunata Salomonman kachamurqa. Hiramqa tukuy tiempom Davidwan llumpay amigo karqaku.

² Chaymi rey Hiramta Salomón nirqa:

³ Yachasqaykipi hinapas taytay David-qa guerrallapi kasqanraykum yupay-chasqan Tayta Diospa templonta mana ruwarqachu, muyuriqninpi enemigonkunata Tayta Dios vencechinankama.

⁴ Kunanqa Tayta Diosmi tukuy hinastinpi hawkayayta qoykuwan, manañam enemigoykunapas nitaq ima mana allinpas kanñachu.

⁵ Chayraykum tantearuni yupaychasqay Tayta Diospa templonta ruwanaypaq. Taytay Davidtam Tayta Dios nirqa: “Rantikipi munaychakunanpaq churasqay churikim wasiyta ruwapuwanqa”, nispa.

⁶ Chaynaqa, serviqnikikunatayá kama-chiy Líbano montekunamanta cedrokunata kuchumunankupaq, serviqniykunapas yanapanqam, llamkasqankumantaqa mañakusqaykitam pagapusqayki, yachasqaykipi hinapas ñoqayku ukupiqa manam pipas kanchu Sidón runakuna hina sachakuna allin kuchuqkunaqa, nispa.

⁷ Rey Hiramñataqmi Salomonpa nis-qanta uyariruspan sinchita kusikurqa, hinaspam nirqa: Tayta Diosyá kunan qapaqchasqa kachun, chay hatun nacionpi munaychakunanpaq Davidman yachaysapa churita qoykusqanmanta, nispa.

⁸ Hinaspanmi Salomonman kaynata nichimurqa: Lliw nimuwasqaykitam uyariykuni, chaynaqa nisqaykiman hinam cedromanta cipresmanta hinaspa pinomanta qerukunata qosqayki.

⁹ Serviqniykunam Líbano montemanta lamar qochakama apanqaku. Chaypim balsakunata hina watachispay lamar qochanta nisqayki sitiokama apachimusaq, chaymantam qamña paskachispayki apachinki. Kay ruwasqaymantam qamñataq aylluykunapaq mikuyta apachimunki, nispa.

¹⁰ Salomonpa mañakusqanman hinam rey Hiram qomurqa cedromanta, cipres-manta hinaspa pinomanta qerukunata.

¹¹ Salomonñataqmi apachirqa rey Hirampaqwan ayllunkunapaq, tawa wara-waranqa tawa pachaknin waranqa kilo trigotawan tawa waranqa tawa pachaknin litro aceiteta. Chaynatam Salomonqa sapa wata rey Hiramman qorqa.

¹² Tayta Diosmi prometesqanman hina yachayta Salomonman qorqa. Salomonpas rey Hiramwanmi contratota ruwaspa hawka kawsakurqaku.

¹³ Rey Salomonmi kamachikurqa lliw Israel nacionpi qarikunata hapimunankupaq. Chaynapim kimsa chunka waranqa qarikunata huñuramurqaku.

¹⁴ Paykunatam chunka waranqamantakama turnonpi Líbano orqoman kacharqa, huk killa llamkamuspanku iskay killañataq wasinkupi kanankupaq. Adonirammi llamkaqkunata huñumunanpaq kamachisqa karqa.

¹⁵ Chaymantapas Salomonpaqa karqam qanchis chunka waranqa carga apaq runankuna, orqopi rumi labraqkunapas pusaq chunka waranqa qarikunam karqaku.

¹⁶ Manam yupasqachu karqaku llamkaqkunapa kamachiqnin kimsa waranqa kimsa pachaknin capatazkunaqa.

¹⁷ Reymi kamachikurqa akllaspa sumaq labrasqa hatun rumikunata apamuspa templopa cimientonman churanankupaq.

¹⁸ Salomonpa albañilninkunawan rey Hirampa chay-nataq Gebal llaqtayuq qarikunam templota ruwanankupaq qerukunata llaqllaspa rumikunata labramurqaku.