1~Reyes 4 - CHUYA QELLQA La Biblia en Quechua de Ayacucho 2012

Salomonpa imaynam munaychakusqanmanta

¹ Rey Salomonmi lliw Israel nacionpi munaychakurqa.

² Kaykunam reypa yanapaqninkuna karqaku: Sacer-dote Sadocpa churin Azarías.

³ Secre-tariokunam karqa: Elihorefwan Ahías, paykunaqa Sisapa churinkunam karqaku. Reypa secretarionmi karqa Ahiludpa churin Josafat.

⁴ Tropakunapa kamachiqmi karqa Joiadapa churin Benaía. Sadocwan Abiatarñataqmi sacerdotekuna karqaku.

⁵ Gobernadorkunapa kamachiqninmi karqa Natanpa churin Azarías. Natanpa churin sacerdote Zabudñataqmi reypa consejaqnin karqa.

⁶ Ahisarmi karqa palaciota nanachikuq. Abdapa churin Adoniramñataqmi impuesto cobraq.

⁷ Israel nacionpim chunka iskayniyuq kamachikuqkunata Salomón churarqa, paykunam reymanpas chaynataq ayllunmanpas mikuyta qonankupaq kamachisqa karqaku. Watapim huk killanka sapakama apamuqku.

⁸ Paykunam kay llaqtakunapi kamachikurqaku: Hurpa churinqa kamachikurqa Efraín law orqokunapim.

⁹ Decarpa churinmi kamachikurqa Macazpi, Saalbimpi, Bet-semespi, Elonpi hinaspa Bet-hanán llaqtapi.

¹⁰ Hesedpa churinmi kamachikurqa Arubotpi, Socopi hinaspa Hefer lawkunapi.

¹¹ Abinadabpa churinmi kamachikurqa Dor lawpi. Warminmi karqa rey Salomonpa churin Tafat.

¹² Ahiludpa churin Baanam kamachikurqa Taanacpi, Meguidopi hinaspa Jezreelpa urayninpi tarikuq Saretán llaqtapa hichpanpi kaq Bet-seanpi. Kamachikurqaqa Bet-seanmanta qallarispa Abel-mehola lawkamam chaynataq Jocmeampa waklawninkamam.

¹³ Geberpa churinmi kamachikurqa Ramotpi chaynataq Galaad lawpi tarikuq wakin llaqtakunapipas, chay llaqtakunaqa karqa Manasespa churin Jairpa llaqtankunam. Kamachikurqataqmi Basán allpapi tarikuq Argob lawkunapipas. Chaypim tarikurqa soqta chunka murallasqa llaqtakuna, chay llaqtakunapa punkunkunam broncemanta cerrojoyuqkama karqa.

¹⁴ Iddopa churin Ahinadabmi kamachikurqa Mahanaim llaqtapi.

¹⁵ Ahimaasmi kamachikurqa Neftalí ayllupi. Paymi Salomonpa churin Base-matwan casarakururqa.

¹⁶ Husaipa churin Baanañataqmi kamachikurqa Aserpiwan Alotpi.

¹⁷ Paruapa churin Josafatmi kamachikurqa Isacar ayllupi.

¹⁸ Elapa churin Simeiñataqmi kamachikurqa Benjamín ayllupi.

¹⁹ Uripa churin Gebermi kamachikurqa Galaad lawpi. Galaadqa karqa amorreokunapa reynin Sehonpa chaynataq Basanpa reynin Ogpa allpanmi. Payllam chay lawkunapiqa kama-chikurqa.

Salomonpa munaychakuynin wiñarisqanmanta

²⁰ Israelpawan Judapa runankunaqa lamar qochapa patanpi aqo hina manaña yupay atinam karqaku. Paykunam mikukuypi upyakuypi kaspanku kusisqallaña kawsakurqaku.

²¹ Salomonmi munaychakurqa Eufrates mayumanta qallaykuspa Filistea nacionkama hinaspa Egipto nacionwan tupanakuqkama. Paykunam impuestota pagaspanku rey Salomonta wañukunankama servirqaku.

²² Salomonpa mikunanpaqmi sapa punchaw apamuqku: Soqta waranqa soqta pachaknin kilo suysusqa harinata, chunka kimsayuq waranqa iskay pachaknin kilo mana suysusqa harinata,

²³ wirayachisqa chunka torokunata, pastowan wirayachisqa iskay chunka torokunata hinaspa pachak ovejakunatapas; manam yuparqakuchu luwichukuna, tarukakuna chaynataq wira wallpakuna apamusqankutaqa.

²⁴ Salomonmi munaychakurqa Eufrates mayupa intipa seqaykunan lawpi Tifsa llaqtamanta Gaza llaqtakama. Chay llaqtakunapa reyninkunapim munaychakurqa, chaynapim muyuriqninpi kaq nacionkunawan hawkayaypi yacharqaku.

²⁵ Salomonpa munaychakuyninpiqa Dan llaqtamanta qallarispam Beerseba llaqtakama, Judapiwan Israelpi runakunaqa hawkallaña kawsakurqaku, sapakama uvaskunata higoskunata tarpuspanku.

²⁶ Salomonpam karqa carretankuna chutananpaq tawa chunka waranqa caballonkuna chaynataq chunka iskayniyuq waranqa sillakuq soldadonkunapas.

²⁷ Chay kamachikuqkunam sapakama tupasqanman hina huk killanka rey Salomonpaq chaynataq wasinpi kaqkunapaqpas mikuyta apamuqku, manam imamantapas pisichiqkuchu.

²⁸ Tupasqanman hinam caballokunapaqwan carga animalkunapaqpas cebadatawan pajata apachimuqku.

²⁹ Tayta Diosmi Salomonman yachay-tawan yuyaymanayta qorqa, paypa yachayninqa lamar qochapa patanpi aqo hinam karqa.

³⁰ Salomonqa Egipto nacionpi runakunamantapas hinaspa intipa qespimunan lawpi runakunamantapas aswan yachayniyuqmi karqa.

³¹ Llapallan runakunamantapas aswan yachayniyuqmi karqa. Zera castamanta kaq Etanmantapas chaynataq Maholpa kimsan churinkunamantapas, Hemanmanta, Calcolmanta hinaspa Dardamantapas aswan yachayniyuqmi karqa. Chaynapim muyuriqninpi nacionkunapa ancha reqsisqan karqa.

³² Kimsa waranqa allin yachachikuykunatawan waranqa pichqan takikunatam qellqarqa.

³³ Yachachirqam sachakunamantapas, Líbano montepi cedromanta qallaykuspa raqrakunapi wiñaq hisopo plantakunakama, yachachirqataqmi animalkunamantapas, alton pawaq animalkunamantapas, qasqonpa puriq animalkunamantapas chaynataq challwakunamantapas.

³⁴ Salomonpa yachachikuyninta uyarinankupaqmi tukuy hinastinpi llaqtakunamanta kaq reykuna chaynataq runakunapas hamuqku.