1~Reyes 3 - CHUYA QELLQA La Biblia en Quechua de Ayacucho 2012

Faraonpa churinwan Salomón casarakusqanmanta

¹ Salomonmi faraonpa warmi churinwan casarakuruspan, Egiptopa reynin Faraonwan aylluchakururqa, hinaspanmi “Davidpa Llaqtanman” pusamurqa chaypi yachanankupaq. Chaytaqa ruwarqa palacionta, Tayta Diospa templonta chaynataq Jerusalén llaqtapa murallankuna ruwayta tukuykuchkaspanmi.

² Israelpa mirayninkunaqa Tayta Diospa wasin manaraq ruwasqa kasqanraykum alto moqokunapi kaq capillakunapi sacrificiokunata ofreceqku.

Salomonpa yachay mañakusqanmanta

³ Salomonmi ichaqa Tayta Diosta kuyarqa, taytan Davidpa kamachisqankunatapas kasukurqam; chaywanpas alto moqokunapim animalkunata wañuchispan inciensota kañarqa.

⁴ Gabaón llaqtamanpas rispanmi sacrificiokunata chaypi ofrecemuq. Chaymanqa riq chay moqopi kaq capilla ancha reqsisqa kasqanraykum; chaypim waranqa lliw kañana sacrificiota kañamurqa.

⁵ Gabaón llaqtapim musqoyninpi Salomonman Tayta Dios rikuriykuspan nirqa: Imam munasqaykita mañakuway, qosqaykim, nispa.

⁶ Chaymi Salomón nirqa: Serviqniki taytay Davidtam llumpayta kuyapayarirqanki, chaynataqa ruwarqanki munasqaykiman hina cheqaptapuni allin ruwaq kasqanraykum, anchata kuyaspaykim churintapas paypa rantinpi munaychakunanpaq kunan churaykunki.

⁷ Yupaychasqay Dios Taytalláy, kunanmi kay serviqnikita taytay Davidpa rantinpi munaychakunaypaq churaykuwanki, ñoqaqa warmaraqmi kani, yachayniypas manam ancha kanraqchu.

⁸ Chaywanpas akllakusqayki llaqtaykita nanachikunaypaqmi churaykuwanki, paykunaqa achkallaña kasqankuraykum manaña yupay atina kachkanku.

⁹ Chaynaqa, yachaytayá qoykuway, runaykikunata yachaywan kamachinaypaq hinaspa allin kaqta chaynataq mana allin kaqtapas reqsinaypaq, mana chayqa, ¿pitaq kay manaña yupay atina runaykikunata kamachiyta atinman? nispa.

¹⁰ Salomonpa mañakusqantam Tayta Dios chaskiykurqa.

¹¹ Hinaspam nirqa: Manam qamqa mañakuwarqanki unay wata kawsakuytachu nitaq qori-qollqetachu nitaqmi enemigoykikuna wañuchisqa kanankutachu. Aswanqa yachaytawan allinta uyarispa munaychakunaykipaqmi,

¹² chaynaqa mañakusqaykiman hinam yachaytawan yuyayta qoyki. Ñawpaqtaqa manam pipas qam hina yachayniyuqqa karqachu, nitaqmi qepatapas kanqachu.

¹³ Qoykitaqmi mana mañawasqayki kaqkunatapas, apuyachispaymi ancha reqsisqata ruwasqayki, kawsanaykikamaqa manam qam hinaqa huk reyqa kanqachu.

¹⁴ Sichum taytayki David hina yachachikuyniykunatawan kamachikuyniykunata kasukuspa munasqayman hina ruwaptikiqa unay watakunatam kawsachisqayki, nispa.

¹⁵ Rikchariruspanmi Salomonqa chayqa mosqoylla kasqanta qawaykurqa, chaymi Jerusalén llaqtaman kutiruspan Tayta Diospa pacto ruwasqan Arcapa ñawpaqninpi lliw kañana ofrendatawan Dioswan hawkalla kasqanmanta sacrificiokunata ofrecerqa. Serviqninkunapaqpas convidotam ruwachirqa.

Salomonpa yachayniyuq kasqanmanta

¹⁶ Chay tiempopim iskay chuchumika warmikuna reypa qayllanman hamururqaku.

¹⁷ Hinaptinmi huknin warmi nirqa: Reynilláy, kay warmiwanmi huk wasillapi yachaniku, paywan kuska ya-chachkaspaymi wachakururqani.

¹⁸ Wacha-kusqaypa kimsa punchawllanmanmi kay warmipas wachakururqa; iskayllaykum chay wasipiqa yacharqaniku, manam pipas chaypiqa karqachu, iskayllaykum karqaniku.

¹⁹ Huk tutam kay warmipa wawan wañururqa puñuspa ñitirusqanrayku.

²⁰ Chaymi kay warmiqa, puñunaykama chawpi tutata hatariruspan waqtaymanta wawayta hurqoruspan waqtanman churarusqa, wañusqa wawantañataq waqtayman churaramusqa.

²¹ Wawayta ñuñunaypaq tutapayta hatariruspaymi wañusqataña tariykurqani, ichaqa achikyaruptinmi allinta qawaykuspay reqsiykurqani mana waway kasqanta, nispa.

²² Huknin warmiñataqmi nirqa: Manam, kawsaq wawaqa ñoqapam, wañusqañataqmi qampa, nispa. Chaymi punta rimaq warmi nirqa: Manam, wañusqa wawam qampaqa, kawsaqñataqmi ñoqapa, nispa. Chaynatam reypa qayllanpi atipanakurqaku.

²³ Hinaptinmi rey nirqa: Kay warmim nin: “Kawsaq wawaqa ñoqapam, wañusqa kaqñataqmi qampa”, nispa. Huknin warmiñataqmi nin: “Manam, qampa wawaykiqa wañusqa kaqmi, ñoqapañataqmi kawsaq kaq”, nispa.

²⁴ Chaymantam rey kamachirqa: Espadata apamuychik, nispa. Espadata aparamuptinkum,

²⁵ reyqa kamachikurqa: Kawsaq wawata chawpimanta iskayman kuchuruspa sapakamaman qoychik, nispa.

²⁶ Hinaptinmi kawsaq wawapa maman, wawanmanta sonqonpi llumpayta llakikusqanrayku nirqa: Reynilláy, amayá wawataqa wañurachiychu, kay warmimanyá qoykuy, nispa. Huknin warmiñataqmi nirqa: Ama qampaqpas nitaq ñoqapaqpas kananpaq, partechunku, nispa.

²⁷ Chaymi reyñataq nirqa: Chay kawsaq wawata punta rimaq warmiman qoychik, ama wañuchiychikchu, paymi cheqap mamanqa, nispa.

²⁸ Israelpa mirayninkunam reypa allin arreglo ruwasqanta yacharurqaku, chayraykum anchata reyta respetarqaku, chaynapim qawarqaku Tayta Diospa yachay qosqanwan allinta munaychakusqanta.