1~Reyes 22 - CHUYA QELLQA La Biblia en Quechua de Ayacucho 2012

Acab vencesqa kananmanta Micaiaspa profetizasqanmanta

¹ Kimsa watam Israel nacionwan Siria nación mana pelearqakuchu.

² Kimsa kaq watapim Israelpa reyninman Judapa reynin Josafat watukurqa.

³ Chaymi serviqninkunata Israelpa reynin Acab nirqa: Qamkunaqa yachankichikmi Galaad lawpi Ramot llaqtaqa ñoqanchikpa kasqanta, chayanaqa ¿imatataq ruwach-kanchik Siria nacionpa reyninmanta qechumunanchikpaq? nispa.

⁴ Hinaspam rey Josafatta tapurqa: ¿Munawaqchum ñoqawan kuska Galaad lawpi Ramot llaqta atacamuyta? nispa. Josafatñataqmi nirqa: Qanwan ñoqaqa hukllam kanchik, llaqtaypas llaqtayki hinam, soldadoy-kunapas soldadoykikuna hinam, caballoykunapas caballoykikuna hinam;

⁵ ichaqa ama hina kaspayá Tayta Diosta puntata tapuykuy, nispa.

⁶ Chaymi Israelpa reynin, yaqa tawa pachak profetakunata huñurachirqa, hinaspam tapurqa: ¿Risaqchu Galaad lawpi Ramot llaqtapa contranpi peleaq icha manachu? nispa. Hinaptinmi paykunañataq nirqaku: Arí, riypuni, Tayta Diosmi makikiman churamunqa, nispanku.

⁷ Rey Josafatmi ichaqa nirqa: ¿Kanmanraqchu Tayta Diospa hukkaq-nin profetan chaynapi payta tapunanchikpaq? nispa.

⁸ Chaymi Josafatta Israelpa reynin nirqa: Arí, tapunanchikpaqqa kachkanraqmi Tayta Diospa huk profetan, payqa Imlapa churin Micaiasmi, paytaqa cheqninim, manam haykapipas allintaqa willawanchu aswanqa mana allinllatam, nispa. Josafatñataqmi nirqa: Ama chaynataqa niychu, nispa.

⁹ Hinaptinmi Israelpa reyninqa serviqninta qayaykuspan kaynata kamachirqa: Chaylla Imlapa churin Micaiasta pusamuy, nispa.

¹⁰ Israelpa reyninwan Judapa reynin Josafatmi rey pachawan churakuruspanku trononkupi sapakama tiyachkarqaku, Samaria llaqtaman yaykuna erapi, llapa profetakunañataqmi paykunapa qayllanpi profetizachkarqaku.

¹¹ Quenaanapa churin Sedequiasmi fierromanta waqrata ruwakururqa, hinaspam qaparirqa: Tayta Diosmi kaynata nin: ¡Kay waqrakunawanmi chinkachinaykikama Siria runakunata waqranki! nispa.

¹² Llapa profetakunaqa chaynallata profetizaspankum nirqaku: Galaad lawpi Ramot llaqtataqa vencenkim, Tayta Diosmi makikiman paykunata churaykamunqa, nispanku.

¹³ Qayamunanpaq riq runañataqmi Micaiasta nirqa: Llapa profetakunaqa lliwpas allinllatam reyman willachkanku. Chaynaqa, ama hina kaspayá qampas paykuna hina allinllata nimuy, nispa.

¹⁴ Chaymi Micaías nirqa: Tayta Diospa sutinpim niki, ñoqaqa Tayta Diospa imam niwasqallantam rimasaq, nispa.

¹⁵ Reypa kasqanman chayaruptinmi rey nirqa: Micaías, ¿risaqkuchu Galaad lawpi Ramot llaqtata atacamunaykupaq icha manachu? nispa. Hinaptinmi Micaías nirqa: Riypuni, Tayta Diosmi makikiman churamunqa, nispa.

¹⁶ Chaymi reyñataq nirqa: ¿Hayka kutitakamataq nisqayki Tayta Diospa sutinpi cheqapllata niwanaykipaq? nispa.

¹⁷ Hinaptinmi Micaías nirqa: Israel runakunatam rikurqani mana michiqniyuq ovejakuna hina orqokunapi cheqesqata. Chaymi Tayta Dios nirqa: “Paykunaqa mana michiqniyuqmi kachkanku, wasinkuman sapakama hawkalla kutikuchunku”, nispa.

¹⁸ Hinaptinmi Josafatta Israelpa reynin nirqa: ¿Manachu nirqayki “manam imatapas ñoqapa allinniypaqqa profetizanchu aswanqa mana allinllatam”, nispay?

¹⁹ Micaiasñataqmi nirqa: Chaynaqa, Tayta Diospa nisqantayá uyariy: Ñoqam Tayta Diosta rikurqani trononpi tiyachkaqta, rikurqanitaqmi hanaq pachapi llapallan tropankunatapas alleqninpi hinaspa ichoqninpi sayachkaqta.

²⁰ Chaymi Tayta Dios nirqa: “¿Pitaq pantarachimunman Galaad lawpi Ramot llaqtata atacamuspa chaypi Acab wañuramunanpaq?” nispa. Chaymi serviqninkunamanta huknin hukta nirqa, hukninpas huktataq.

²¹ Ichaqa huk espiritum Tayta Diospa qayllanman asuykuspan nirqa: “Ñoqa pantarachimusaq”, nispa. Hinaptinmi Tayta Dios nirqa: “¿Imaynatataq ruwamunki?” nispa.

²² Chay espirituñataqmi nirqa: “Lloqsispaymi llapa profetankunata llullakunata rimachisaq”, nispa. Chaymi Tayta Dios nirqa: “Arí, atinkim pantachimuyta, rispayá chaynata ruwaramuy”, nispa.

²³ Chaynaqa, kunanmi llapallan profetaykikunapa siminman llullakuy espirituta Tayta Dios churarun, hinaspam chinkachisunaykipaq tantearun, nispa.

²⁴ Hinaptinmi Quenaanapa churin Sedequías asuykuspan Micaiasta uyanpi takaruspan, nirqa: ¿Maynintataq ñoqamanta Tayta Diospa Espiritun lloqsirurqa qamta rimapayasunaykipaq? nispa.

²⁵ Chaymi Micaías nirqa: Chaytaqa yachanki lluptinaykipaq wasin-wasin pakakusqayki punchawmi, nispa.

²⁶ Hinaptinmi Israelpa reynin nirqa: ¡Micaiasta hapiychik hinaspa llaqtapi gobernador Amonman churiy Joasman pusaychik!

²⁷ Ñoqa reypa kayna nisqaytam nimunkichik: Kay runata carcelpi wichqamuychik hinaspa mikunanpaqpas tantatawan yakullata qoychik, chaynam kanqa guerrapi vencespay kutimunaykama, nispa.

²⁸ Chaymi Micaías nirqa: Sichum hawkalla kutimunki hinaptinqa manam Tayta Dioschu ñoqantakama rimarirqa. Chaynaqa, llapa runakuna nisqayta uyariychik, nispa.

²⁹ Chaynapim Israelpa reynin Acabwan Judapa reynin Josafatqa, Galaad lawpi kaq Ramot llaqtapa contranpi rirqaku.

³⁰ Rey Josafattam Israelpa reynin nirqa: Mana reqsiwanankupaqmi sapaq pachawan guerraman peleaq yaykusaq, qamñataqmi hina rey pachallaykiwan kanki, nispa. Chaymi Israelpa reyninqa sapaq pachawan churakuruspa guerraman peleaq yaykurqa.

³¹ Ichaqa Siria nacionpa reyninmi kimsa chunka iskayniyuq carretankunapi kaq capitanninkunata kaynata kamachirqa: Amam piwanpas peleankichikchu aswanqa Israelpa reynillanwanmi, nispa.

³² Chaymi carretakunapi kaq soldadokunapa capitanninkuna rey Josafatta rikuruspanku nirqaku: Cheqaptapunim payqa Israelpa reynin, nispanku. Payta atacanankupaq muyuykuptinkum rey Josafatqa qaparirqa yanapakuyta mañakuspa.

³³ Hinaspankum carreta-kunapi kaq soldadokunapa capitanninkuna qawaykurqaku payqa mana Israelpa reynin kasqanta, chaymi anchurikururqaku.

³⁴ Ichaqa Siria nacionniyuq hukkaqnin soldado llutanpi flecharuptinmi Israelpa reyninta qasqonpi harkachikunanpa tupanakuqninpi hapirurqa, chaymi reyqa carretan manejaqta nirqa: Muyurichiy carretata hinaspa kaymanta hurqoway, llumpay heridasqam kachkani, nispa.

³⁵ Chay punchawmi guerra llumpay kasqarayku Israel nacionpa reyninta hina carretallanpi sayachirqaku Siria tropakunapa chimpanpi, yawarninpas manam tanimurqachu, hinaptinmi tardeykuyta hina carretanpa ukullanpi wañururqa.

³⁶ Inti seqaykuytañam llapa tropakunapa kasqanpi kay qayakuy uyarikurqa: ¡Sapakamayá llaqtaykichikman hinaspa chakraykichikman kutikuychik!

³⁷ ¡Israelpa reyninmi wañurun! niq. Chaymi reypa ayanta Samaria llaqtaman apamuspanku chaypi pamparurqaku.

³⁸ Chaykunapa qepantam carretapi kaq yawarta Samaria estanquepi mayllarqaku. Chay estanqueqa chuchumikakunapa bañakunanmi karqa. Tayta Diospa nisqanman hinam Acabpa yawarninta allqokuna llaqwarqaku.

³⁹ Acabpa imaynam kawsasqanpas, imakunam ruwasqanpas, marfilmanta palacio ruwachisqanpas chaynataq llaqtakuna ruwachisqanpas Israel nacionpi reykunapa vidanmanta willakuq libropim qellqasqa kachkan.

⁴⁰ Rey Acab wañuruptinmi churin Ocoziasña paypa rantinpi munaychakurqa.

Judá nacionpi Josafat munaychakusqanmanta

⁴¹ Israelpi rey Acab tawa wataña mu-naychakuchkaptinmi Asapa churin Josa-fat Judá nacionpi munaychakuyta qallay-kurqa.

⁴² Rey Josafatqa kimsa chunka pichqayuq watanpim munaychakuyta qallarirqa. Jerusalén llaqtapim iskay chunka pichqayuq wata munaychakurqa; mamanmi karqa Silhipa churin Azuba.

⁴³ Rey Josafatqa taytan Asapa tukuy allinkuna ruwasqanman hinam kawsarqa, mana imallapipas pantaykuspanmi Tayta Diospa munasqanman hina ruwarqa, chaywanpas alto moqokunapi capillakunataqa manam chinkachirqachu; chay capillakunapim runakuna hinalla animalkunata wañuchispa, inciensota kañaspa idolokunata yupaychaqku.

⁴⁴ Rey Josafatqa hawkayaypim Israelpa reyninwan kawsarqa.

⁴⁵ Rey Josafatpa imaynam kawsasqanpas, imakunam ruwasqanpas, vencesqankunapas, guerrakuna ruwasqanpas, Judá nacionpi reykunapa vidanmanta willakuq libropim qellqasqa kachkan.

⁴⁶ Paymi taytan Asapa tiemponmanta puchuq qaripura qachakuspa idolokuna yupaychaqkunata qarqorurqa.

⁴⁷ Chay punchawkunapiqa manaraqmi Edom nacionpiqa rey karqaraqchu, reypa rantinpim huk gobernador kamachikurqa.

⁴⁸ Josafatmi barcokunata ruwarqa Tarsis lawpi barcokunata hina, chaykunam Ofir lawman qorita apamunankupaq rirqaku, ichaqa Ezión-geber llaqtapa hichpanpim pakipakururqaku.

⁴⁹ Chaymi Josafatta rey Acabpa churin Ocozías nirqa: Serviqniykunawan serviqnikikuna barcokunapi richunku, nispa. Rey Josafatmi ichaqa mana munarqachu.

⁵⁰ Rey Josafat wañuruptinmi “Davidpa Llaqtanpi”, ñawpaq taytankunapa kasqanpi pamparurqaku, paypa rantinpiñataqmi churin Joramña munaychakurqa.

Israel nacionpi Ocozías munaychakusqanmanta

⁵¹ Judá nacionpi rey Josafat chunka qanchisniyuq wataña munaychakuchkaptinmi, Acabpa churin Ocozías Israelpi munaychakuyta qallaykurqa, Iskay watallam Israel nacionpi Samaria llaqtamanta munaychakurqa.

⁵² Rey Ocoziasqa Tayta Diospa qayllanpim millakuypaq kaqkunata ruwarqa imaynam tayta-maman hina. Israel nacionniyuq runakuna huchallichiq Nabatpa churin Jeroboam hinam huchallikurqa.

⁵³ Baal idolotam servirqa hinaspa yupaycharqa, tayta-mamanpa imam ruwasqanta hina ruwaspanmi Israelpa yupaychasqan Tayta Diosta piñachirqa.