1~Reyes 20 - CHUYA QELLQA La Biblia en Quechua de Ayacucho 2012

Siria tropakunata Acab vencesqanmanta

¹ Siria nacionpa reynin Ben-adadmi huñururqa llapa tropankunata, kimsa chunka iskayniyuq reykunata, guerrapaq caballontintakama chaynataq carretantintakama. Hinaspam Samaria llaqtata muyuruspanku atacarurqaku.

² Hinaspanmi Israel nacionpa reynin Acabman runankunata kacharqa kaynata nimunankupaq:

³ Ben-adadmi nin, qorikipas, qollqekipas, warmikikunapas kuyayllapaq churikikunapas ñoqapam, nispa.

⁴ Chaymi Israel nacionpa reynin kaynata nirqa: Reynilláy, nisqaykiman hinayá ñoqapas tukuy imaykunapiwan qampaqña kasaq, nispa.

⁵ Willakuqkunam kutispanku rey Ben-adadpa nimusqanta kaynata nirqaku: Kachamurqaykiqa qorikita qollqekita, warmikikunata, churikikunata qowanaykipaqmi.

⁶ Paqarinmi kay horata hina serviqniykunata kachamusaq, wasikita chaynataq serviqnikikunapa wasinkutapas maskachakuspankum allinnin kaqkunata hapispanku apakunqaku, nispa.

⁷ Chaymi Israel nacionpa reynin lliw nacionpi ancianokunata qayachimuspan nirqa: Yachasqaykichikpi hinapas chay runaqa mana allinninchiktam maskachkan, payqa runankunatam kachamuwasqa warmiykunata, churiykunata hinaspa qoriyta qollqeyta qonaypaq ichaqa manam harkakurqanichu, nispa.

⁸ Llapa ancianokunawan runakunañataqmi nirqaku: Ama paytaqa kasuychu, mañasusqaykitapas ama qoychu, nispanku.

⁹ Chaymi rey Ben-adadpa kachamusqankunata rey Acab nirqa: Reyniyman nimuychik: “Punta kaqpi llapa ima mañakuwasqantaqa qosaqmi, kunan mañakuwasqantam ichaqa mana atiymanchu”, nispa. Hinaptinmi chay kachamusqan runakuna kutispanku imam nisqanta willakurqaku.

¹⁰ Chaymi Ben-adad musoqmanta Acabta nichimurqa: Samaria llaqtata purmarachiptiy ñutu allpallanpas soldadoykunaman putqoyllankapas qonaypaq puchuruptinqa dioskunayá sinchita castigawachun, nispa.

¹¹ Chaymi Israel nacionpa reynin kaynata nichimurqa: Amayá alabakuychu manaraq peleach-kaspaqa, nispa.

¹² Ben-adadmi wakin reykunapiwan ramadapi tomachkarqaku, chaymi Acabpa nimusqanta uyariykuspan capitanninkunata, nirqa: Atacanapaq allichakuychik, nispa. Chaymi llaqtata atacanankupaq alli-chakurqaku.

¹³ Ichaqa Israel nacionpa reynin Acabmanmi huk profeta asuykuspan nirqa: Tayta Diosmi kaynata nin: ¿Rikuch-kankichum kay nana-nanaq runakunata? Kunanmi makikiman churasaq Tayta Dios kasqayta yachanaykipaq, nispa.

¹⁴ Chaymi Acab tapurqa: ¿Pinintakamataq makiyman churamunki? nispa Chaymi profeta nirqa: Tayta Diosmi nin, provinciakunapi kamachikuqkunapa serviqnin jovenninkunatakamam, nispa. Hinaptinmi Acab tapurqa: ¿Pitaq peleayta qallarinqa? nispa. Profetañataqmi nirqa: Qanmi, nispa.

¹⁵ Chaymi provinciakunapi kamachikuqkunapa yanapaqnin jovenkunata Acab yuparuptin iskay pachak kimsa chunka karqaku, yuparqataqmi Israelpa llapallan mirayninkunatapas, chaymi qanchis waranqa soldadokuna karqaku.

¹⁶ Chawpi punchawta lloqsiptinkum rey Ben-adadqa kimsa chunka iskayniyuq yanapaqnin reykunawan ramadapi sinkallaña upyachkarqaku.

¹⁷ Chaymi provinciakunapi kamachikuqkuna yanapaq jovenkunapiwan puntata lloqsirqaku. Rey Ben-adadmi huk runata kacharqa qawamunanpaq, chaymi chay runa apamurqa kay willakuyta: Samaria llaqtamantam tropakuna lloqsimuchkanku, nispa.

¹⁸ Hinaptinmi Ben-adad kamachikurqa: Guerrapaq otaq mana guerrapaq lloq-simuptinkupas kawsachkaqllata hapimuychik, nispa.

¹⁹ Provinciakunapi kamachikuqkunapa yanapaqnin jovenkunam llaqtamanta lloq-sirqaku, paykunapa qepantañataqmi llapa tropakuna.

²⁰ Sapakamam contrankupi hatarimuqta wañuchiyta qallaykurqaku, chaymi Siria soldadokuna lluptiyta qallaykuptinku Israel tropakuna qatirqaku. Siria nacionpa reynin Ben-adadpas caballonpim wakin sillada tropankunapiwan lluptirurqa.

²¹ Hinaptinmi Israel nacionpa reynin venceruspan caballokunatawan carretakunata hapikuykurqa. Chaynatam pasaypaq mancharikuypaqta ruwarurqa.

²² Chaymantam Israel nacionpa reyninman asuykuspa profeta nirqa: Kutispaykiyá aswan allintaraq allichakamuy. Huk watamantam Siria nacionpa reyninqa contraykipi peleaq kutimunqa, nispa.

²³ Siria nacionpa reynintam yanapaqninkuna nirqaku: Israelpa diosninkunaqa orqokunapi dioskunam, chaymi venceruwanchik. Pampapi peleaspanchikqa vencerusunmi.

²⁴ Chaynaqa, kaynatayá ruway: Reykunata puestonmanta hurqospayki paykunapa rantinpi capitankunataña churay,

²⁵ tropakunatapas punta tropaykikunata hina huñuy, hina chaynallataqyá kachun caballokunapas chaynataq carretakunapas, hinaptinmi pampapi peleaq lloqsispanchik venceramusun, nispa. Chaymi Ben-adadqa kasukuspan paykunapa nisqanta hina ruwarqa.

²⁶ Huk watamantam rey Ben-adadqa Siria tropakunata huñuruspan Afec llaqtaman hamurqa Israel tropakunawan peleananpaq.

²⁷ Israel tropakunapas huñusqa kaspankum mikunankupaq qoqawchakuspa peleaq lloqsirqaku, hinaspam Siria tropakunapa chimpanpi samarurqaku. Paykunaqa iskay atajo cabrakuna hinallam karqaku, Siria tropakunam ichaqa pampapas huntaykuq karqaku.

²⁸ Tayta Diospa profetan hamuspanmi Israel nacionpa reyninta nirqa: Siria runakunam nichkanku: “Tayta Diosqa orqokunapi diosmi, manam qechwapi dioschu” nispanku, aswanqa ñoqam wak nana-nanaq runakunata makikiman churasaq chaynapim yachankichik Tayta Dios kasqayta, nispa.

²⁹ Qanchis punchawmi tropakuna chimpa-chimpa karqaku, qanchis kaq punchawpim ichaqa peleayta qallaykurqaku, chay punchawpim Israelpa tropankuna Siria tropakunamanta pachak waranqata wañurachirqaku.

³⁰ Wakinñataqmi Afec llaqtaman lluptirurqaku, ichaqa chay llaqtapa murallanmi tuñiykuspan iskay chunka qanchisniyuq waranqa soldadokunata wañurachirqa. Ben-adadpas llaqtaman lluptiruspanmi cuarton-cuarton pakakurqa.

³¹ Hinaptinmi rey Ben-adadta yanapaqninkuna nirqaku: Uyarirqanikum Israel nacionpi reykunaqa kuyapayakuq kasqankuta, chaynaqa kunanyá qachqa pachawan churakuspa kunkanchikmanpas waskata watakuruspa Israel nacionpa reyninman risunchik, icharaqpas kawsachisunkiman, nispanku.

³² Chaymi qachqa pachawan churakuspa waskakunatapas kunkankuman watakuruspanku Israel nacionpa reyninman hamurqaku, hinaspam nirqaku: Serviqniki Ben-adadmi nimusunki: “Ama wañuchiwaychu”, nispa. Rey Acabñataqmi nirqa: ¿Kawsachkanraqchu? ¡Payqa wawqey hinam! nispa.

³³ Chay nisqanta allinpaq hapispankum utqayman nirqaku: Wawqeki Ben-adadqa kawsachkanmi, nispanku. Chaymi Israelpa reynin nirqa: Rispayá pusaramuychik, nispa. Rey Ben-adadta pusaramuptinkum rey Acabñataq carretanman qespiykachirqa.

³⁴ Chaymi rey Ben-adad nirqa: Taytaykimanta taytaypa qechusqan llaqtakunatam kutichipusqayki. Samaria llaqtapi taytaypa ruwasqanta hinayá qampas Damasco llaqtapi negociota ruwanaykipaq plazakunata ruwakamuy, nispa. Hinaptinmi rey Acab nirqa: Contratota ruwaptinchikmi kacharisqaykiqa, nispa. Chaymi contratota ruwaruptinku kachaykurqa.

³⁵ Profetakunapa churinkunamanta kaq runam profetamasinta Diospa kamachisqanman hina nirqa: ¡Maqaparuway! nispa. Hukninmi ichaqa mana munarqachu.

³⁶ Hinaptinmi chay profeta nirqa: Tayta Diospa nisqanta mana kasukus-qaykiraykum ñoqamanta rakikuykuptillayki huk león wañuchisunki, nispa. Maypacham rakikuykuptillanmi leon-wan tuparuptin wañurachirqa.

³⁷ Profetañataqmi huk runawan tuparuspan paytaña nirqa: ¡Maqaparuway! nispa. Hinaptinmi chay runaqa takaparus-pan kirirurqa.

³⁸ Chaymi Diospa profetanqa pantachikunanpaq ñawinta watakuykuspan rirqa reyta ñanpi suyaq.

³⁹ Rey pasachkaptinmi qaparispa nirqa: Kay serviqnikim guerrapi kachkarqani, hinaptinmi huk soldado saqeykuwarqa huk presota kaynata niwaspan: “Kay runata waqaychay, lluptiruptinqa paypa rantinpim wañunki otaqmi kimsa chunka tawayuq kilo qollqeta paganki”, nispa.

⁴⁰ Ichaqa ruwanaykunata kaypi chaypi ruwanaykamam chay runa chinkarurqa, nispa. Chaymi Israel nacionpa reynin nirqa: Kikillaykim willakuspa sentenciakurunki, nispa.

⁴¹ Ichaqa chay runa ñawin tapakusqanta utqayman hurqokuruptinmi reyñataq Diospa profetan kasqanta reqsirurqa.

⁴² Chaymi profeta nirqa: Tayta Diosmi kaynata nin: Wañunanpaq sentenciasqay runata kacharisqaykimantam paypa rantinpi wañunki, runaykikunañataqmi runankunapa rantinpi wañunqaku, nispa.

⁴³ Hinaptinmi Israel nacionpa reyninqa llakisqa hinaspa piñasqallaña Samaria llaqtapi palacionman kutikurqa.