1~Reyes 18 - CHUYA QELLQA La Biblia en Quechua de Ayacucho 2012

Acabwan Elías tupasqanmanta

¹ Unay tiempo pasaruptinmi kimsa watamantaña Eliasta Tayta Dios nirqa: Rey Acabpa kasqanman riy, kay allpamanmi parata chayachimusaq, nispa.

² Chaymi rey Acabpa kasqanman Elías rirqa. Samariapiqa llumpaymi muchuy kachkarqa.

³ Rey Acabmi mayordomon Abdiasta qayachimurqa. Abdiasqa Tayta Diosta kasukuq runam karqa,

⁴ chaymi Tayta Diospa profetankunata reina Jezabel wañuchiyta qallaykuptin Abdiasñataq pachak profetakunata iskay machaykunapi pakarurqa, sapa machaykunapi pichqa chunkatakama pakaruspanmi mikuyta yakuta qospan kawsachirqa.

⁵ Abdiastam rey Acab nirqa: Lliw nacionpi llapallan pukyukunata wayqokunata pasto maskaq hakuchik, chaynapi caballokunatapas hinaspa mulakunatapas kawsachinanchikpaq, mana chayqa wañurunqakum, nispa.

⁶ Chaymi muyurimunankupaq nacionta iskayman rakirurqa, huknin ñanninta Acab riptinmi Abdiasñataq huklawninta rirqa.

⁷ Abdiasmi ñanninta richkaspan Eliaswan tuparurqa, reqsiruspanmi qonqoranpa kumuykuspan nirqa: ¿Manachum qamqa taytay Elías kachkanki? nispa.

⁸ Chaymi Elías nirqa: Arí ñoqam kani; reyniki Acabta nimuy: “Eliasmi kaypi kachkan”, nispa.

⁹ Abdiasñataqmi nirqa: ¿Imapitaq huchallikuruni Acabpa makinman churaykuwaptiki wañuchi-wananpaq?

¹⁰ Tayta Diosraykum jurani, reyniyqa tukuy hinastinpim qamta maskachimusurqanki, chaymi llapallanku nirqaku: “Manam kaypichu”, nispanku, hinaptinmi nacionkunapi mana tarisusqaykimanta runakunata jurachirqa.

¹¹ ¿Chaychu kunan niwanki: “Reynikita nimuy Eliasmi kaypi kachkan”, nispa?

¹² Reyman willaq rinaykamachá hu-klawman Tayta Diospa Espiritun aparu-sunki, hinaptinchá Acabman willaykuptiy pasamuspa mana tarisuspayki wañu-rachiwanqa. Ñoqaqa joven kasqaymantapunim Tayta Diosta kasukuni.

¹³ ¿Manachu pipas willasurqanki Diospa profetankunata Jezabel wañuchiptin pachakta iskay machaykunapi pichqa chunkatakama pakarusqayta hinaspa mikuywan yakuwan kawsachisqayta?

¹⁴ ¿Kunanñataqchu niwanki: Rispayki reynikiman willamuy Eliasmi kaypi kachkan nispa? ¿Wañurachiwanantachu munanki? nispa.

¹⁵ Eliasñataqmi nirqa: ¡Servisqay Tukuy Atiyniyuq Tayta Diospa qayllanpim kachkani!, kunanmi rey Acabpa kasqanman yaykusaq, nispa.

¹⁶ Chaymi Abdías rirqa rey Acabman willamuq. Willaykamuptinmi Eliaswan tupananpaq Acab hamurqa.

¹⁷ Eliasta qawaykuspanmi rey Acab nirqa: ¿Qamchu kachkanki Israel nacionta chaqwachiq? nispa.

¹⁸ Eliasñataqmi nirqa: Ñoqaqa manam Israel naciontaqa chaqwachinichu, aswanqa qanmi chaq-wachirqankiqa, Tayta Diospa kamachikuyninkunata saqeruspa, taytaykipa mirayninkunapiwan kuska Baal idolokunataña qatispaykichik.

¹⁹ Kunanyá Carmelo orqoman huñuchimuy Israelpi llapallan runakunata, Baal idolopa tawa pachak pichqa chunka profetankunata hinaspa Asera idolopa Jezabelpa mikuchisqan tawa pachak profetankunatapas, nispa.

Baal adoraqkunawan Elías atipanakusqanmanta

²⁰ Rey Acabmi Israelpa llapallan miray-ninkunatawan idolokunapa profetankunata Carmelo orqoman huñurachirqa.

²¹ Eliasmi llapa runakunaman asuykuspan nirqa: ¿Haykapikamataq iskayrayaspa kankichik? Sichum Tayta Dios cheqap Dios kaptinqa paytayá qatiychik, sichum Baal dios kaptinqa paytañayá qatiychik, nispa. Hinaptinmi runakunaqa mana imatapas rimarirqakuchu.

²² Chaymi runakunata Elías nirqa: Sapallayñam Tayta Diospa profetan puchuruni, Baalmanta profetakunam ichaqa tawa pachak pichqa chunkanraq kachkanku.

²³ Chaynaqa, iskay torokunata apamuwayku, paykuna hukninta akllaspanku nakaspa yantapa hawanman churachunku, amam ninataqa ratachinqakuchu. Ñoqapas huknin torota nakaspaymi yantapa hawanman churasaq, ichaqa manam ninataqa ratachisaqchu.

²⁴ Qamkunam diosnikichikta qayakunkichik, ñoqapas yupaychasqay Tayta Diostam qayakusaq. Mayqanpas ninata kachaykamuqmi cheqap Diosqa, nispa. Chaymi llapa runakuna nirqaku: Allinpunim nisqaykiqa, nispanku.

²⁵ Hinaptinmi Baalpa profetankunata Elías nirqa: Qamkunaqa achkam kachkankichik, chaynaqa qamkunaraqyá torota akllaspa puntata nakaychik hinaspa diosnikichikta qayakuychik, ichaqa amam ninata ratachinkichikchu, nispa.

²⁶ Chaymi apamusqanku torota chaskiruspanku nakarurqaku, hinaspam achikyasqanmanta chawpi punchawkama Baal diosninkuta kaynata qayakurqaku: ¡Taytallayku Baal, uyariykullawayku! nispanku. Ichaqa manam ima qayakuyllatapas uyarirqakuchu chayraykum perqasqanku altarpa muyuriqninpi pawaykachaspa muyurirqaku.

²⁷ Chawpi punchawña kachkaptinmi asipayaspan Elías nirqa: Tukuy kallpaykichikwan qayaykachakuychik, payqa diosmi, ichapas yuyaymanachkan otaq ispakuchkanpas otaq illarunpas, icha puñuchkanpas chaynaqa rikchachiychikyá, nispa.

²⁸ Chaymi aswantaraq qaparispanku costumbrenkuman hina espadakunawan hinaspa lanzakunawan yawarpas suturimunankama aychankuta kuchupakurqaku.

²⁹ Chawpi punchaw pasaruptinmi tardeykuqta ofrenda kañana horakama muspaypi hinaña qaparkacharqaku, ichaqa manam imallatapas uyarirqakuchu, manataqmi pipas contestamurqachu.

³⁰ Chaymi llapa runakunata Elías nirqa: Asuykamuwaychik, nispa. Llapallan runakuna asuykuptinkum Tayta Diospa tuñichisqa altarninta allicharqaku.

³¹ Hinaspam chunka iskayniyuq rumikunata hapiykurqa Jacobpa churinkunaman hina, paytam Israelwan Tayta Dios suticharqa.

³² Chay rumikunawan Tayta Diospaq altarta ruwaruspanmi muyuriqninta yarqacharurqa yaqa iskay chunka litro yaku yaykuqpaq.

³³ Yantata churaykuspanmi torota nakarurqa hinas-pam chay yantapa hawanman churaykurqa.

³⁴ Chaynata ruwaruspanmi nirqa: Tawa puyñukunaman yakuta huntachiychik hinaspa yantapa hawanpi kaq nakasqa toroman talliychik, nispa. Talliykuptinkum Elías nirqa: Huktawan talliychik, nispa. Chaymantapas huktawanraqmi tallichirqa. Chaynapim kimsa kutikama tallirqaku.

³⁵ Chaymi yakuqa altarmanta lloqllaspan muyuriqninpi yarqamanpas huntarurqaraq.

³⁶ Wañuchisqan animalta kañananpaq sacrificio hora chayaramuptinmi, altarman asuykuspan profeta Elías kaynata qaparirqa: ¡Dios Taytalláy! ¡Abrahampa, Isaacpa hinaspa Israelpa Diosnin! ¡Israel nacionpi Dios kasqaykitayá kunan reqsichikuy, reqsichiytaq ñoqapas serviqniki kaspay kamachiwasqaykiman hina kaykuna ruwasqayta!

³⁷ ¡Dios Taytalláy uyariykullaway, chaynapi kay runakuna Tayta Dios kasqaykita yachanankupaq hinaspa karunchasqa sonqonkutapas qanman kutirichimunaykipaq! nispa.

³⁸ Hinaptinmi Tayta Diospa ninan wichiykamuspan ruparurqa torota, yantata, rumikunata hinaspa allpatapas, muyuriqnin yarqapi yakutapas chakirachirqam.

³⁹ Llapa runakunañataqmi chayta rikuruspanku qonqoranpa pampaman kumuykuspa nirqaku: ¡Tayta Diosmi cheqap Diosqa, Tayta Diosmi cheqap Diosqa! nispanku.

⁴⁰ Chaymi Elías nirqa: Baalpa profetankunata hapiychik, ama hukllapas lluptichunchu, nispa. Hapiruptinkum Cisón wayqoman Elías pusaspan llapallanta chaypi wañurachirqa.

Paramunanpaq Diosta Elías mañakusqanmanta

⁴¹ Chaymantam rey Acabta Elías nirqa: Rispayki mikumuy hinaspa tomamuy, parapa qapariyninmi uyarikamuchkanña, nispa.

⁴² Chaymi Acabqa mikuq hinaspa tomaq pasarqa, Eliasmi ichaqa Carmelo orqopa puntankama qespirqa, chaypim pampapi qonqorakuykuspan uyantapas moqonkunakama kumuykachirqa.

⁴³ Hinaspam criadonta nirqa: Rispayki lamar qocha lawta qawamuy, nispa. Criadonñataqmi qawamuspan nirqa: Manam imatapas rikumunichu, nispa. Chaymi Elías nirqa: Qanchis kutikama riy, nispa.

⁴⁴ Qanchis kaq kutipiñam criadon nirqa: Runapa maki pampan hina sayayniyuq puyutam lamar qochamanta qespimuchkaqta rikuramuni, nispa. Hinaptinmi Elías nirqa: Rispayki rey Acabta nimuy: “Carretay-kita caballoman wataspayki ripukuy, chaynapi para mana harkarusunaykipaq”, nispa.

⁴⁵ Jezreel llaqtaman carretanpi rey Acab richkaptinmi, cielokunata sinchi wayrayuq yanay-yanay puyukuna tapaykurqa.

⁴⁶ Tayta Diosmi atiyninwan Eliasta huntaykurqa, chaymi pachanta sumaqta watakuykuspan Jezreel llaqtaman kallparqa, hinaspam rey Acabmantapas puntataraq chayarurqa.